«Le espíritu santo tu tsʼáajtoʼon Diosoʼ maʼ utiaʼal k-chʼaʼik saajkiliʼ, baʼaxeʼ utiaʼal ka yanaktoʼon páajtalil, yaabilaj yéetel maʼalob tuukul» (2 Timoteo 1:7, Túumben Luʼum).

 «Jajal Dioseʼ maʼ tu tsʼáajtoʼon u pixanil saajkiliʼ, baʼaleʼ u pixanil páajtalil, yaakunaj yéetel maʼalob tuukul» (2 Timoteo 1:7, Le Tumben Nupt’an, LTN (1978)).

 Dioseʼ jeʼel u yáantik máak utiaʼal u beetik baʼax maʼalobeʼ. Letiʼeʼ maʼ u kʼáat ka k-chʼaʼ saajkiliʼ. U chʼaʼik saajkil máakeʼ maʼ maʼalobiʼ tumen jeʼel u beetik u xuʼulul u beetik baʼax uts tu tʼaan Dioseʼ.

 Le tekstoaʼ ku yaʼalik óoxpʼéel jatsʼuts modos ku tsʼáaiktoʼon Dios jeʼel u yáantkoʼon utiaʼal u xuʼulul k-chʼaʼik saajkileʼ. Koʼoneʼex ilik máakalmáakoʼobiʼ.

 «Páajtalil». Le máaxoʼob meyajtik Diosoʼ ku aktáantkoʼob yaʼab problemas, tsʼoʼoleʼ yaʼab máaxoʼob pʼekmiloʼob, kex beyoʼ tsʼoʼok u chúukpajal u yóoloʼob u meyajtoʼob Dios. Ku yeʼeskoʼob jach maʼ saajkoʼobiʼ (2 Corintios 11:23-27). ¿Baʼax wal áantkoʼob utiaʼal maʼ u sajaktaloʼobeʼ? Le apóstol Pablooʼ tu yaʼalaj: «Yaanten u muukʼil utiaʼal in beetik tuláakal baʼal, tu yoʼolal le máax tsʼáaikten u páajtalil in beetkoʼ» (Filipenses 4:13). Utiaʼal u aktáantoʼob jeʼel baʼaxak problemaileʼ Dioseʼ jeʼel u tsʼáaik tiʼ le máaxoʼob meyajtik «le páajtalil ku píitmáan tiʼ u muukʼ wíinikoʼ» (2 Corintios 4:7).

 «Yaabilaj». Máax u yaabiltmaj Dios yéetel tuláakal u puksiʼikʼaleʼ ku defendertik le baʼax maʼaloboʼ. Tsʼoʼoleʼ wa u yaabiltmaj u maasileʼ ku yilik u kaxtik u yutsiloʼob tak teʼ súutukiloʼob difíciltakoʼ (Juan 13:34; 15:13).

 «Maʼalob tuukul». Teʼ Bibliaoʼ le modo jeʼelaʼ u kʼáat u yaʼal le páajtalil yaan tiʼ juntúul cristiano utiaʼal u chʼaʼik maʼalob decisiónoʼob jeʼex u yaʼalik le Bibliaoʼ. Juntúul máak beyaʼ tak tiʼ le súutukiloʼob difíciltakoʼ ku jóoʼsik tiempo utiaʼal u tuklik tubeel baʼax ken u beete. Tsʼoʼoleʼ kéen u chʼaʼ junpʼéel decisióneʼ yáax táanil ku yilik baʼax ku tuklik Dios tu yoʼolal, tumen u yojleʼ le baʼax maas importanteoʼ letiʼe u biskuba yéetel Diosoʼ, maʼ le baʼax ku yaʼalik u maasiloʼ.

 Le u kaʼapʼéel cartail Timoteo yaan teʼ Bibliaoʼ apóstol Pablo tsʼíibt tiʼ Timoteo. Teʼeloʼ tu líiʼsaj u yóol utiaʼal u seguer u tsʼáaik u yóol teʼ kʼaʼaytajoʼ (2 Timoteo 1:1, 2). Maʼ xaaneʼ teʼ kʼiinoʼob jeʼeloʼ Timoteoeʼ kʼas suʼlak kaʼachi, le oʼolal wal yaʼab baʼaloʼob maʼ tu jach beetik teʼ múuchʼuliloʼ (1 Timoteo 4:12). Pabloeʼ tu kʼaʼajsaj tiʼ Timoteoeʼ le meyaj ku beetik teʼ múuchʼuliloʼ junpʼéel regalo ku taal tiʼ Dios, junpʼéel nojoch privilegio. Tu yaʼalaj xan tiʼeʼ maʼ unaj u chʼaʼik saajkil u meyaj tiʼ le autoridad tsʼaʼantiʼ bey superintendente teʼ múuchʼuliloʼ, maʼ u chʼaʼik xan saajkil predicar wa kéen u máans wa baʼax problemail yoʼolal u fe (2 Timoteo 1:6-8).

 Kex tiʼ Timoteo túuxtaʼab le cartaaʼ, u jaajileʼ jeʼel u yáantik tuláakal le máaxoʼob taak u meyajtikoʼob Diosoʼ. Yéetel le tʼaanoʼobaʼ Dioseʼ ku yaʼalikeʼ yaan u tsʼáaik tuláakal baʼax kʼaʼabéet tiʼ máak kex ka u aktáant nukuch problemas.