«U tʼaan Dioseʼ kuxaʼan yéetel yaan u páajtalil, maas yaan u yej ke jeʼel baʼalak espadail tu kaʼatséelil yaan u yejeʼ, yéetel ku yokol tak tu maas taamil u wíinklil máak utiaʼal u jatsik le bakʼ tiʼ le tuukuloʼoboʼ, bey xan utiaʼal u jatsik le baak tiʼ u tsʼoʼomel le baakoʼ. Tsʼoʼoleʼ jeʼel xan u páajtal u xakʼaltik baʼaxoʼob yaan tu tuukul yéetel tu puksiʼikʼal máakeʼ» (Hebreos 4:12, Túumben Luʼum).

 «Tumen u tʼaan Jajal Dioseʼ kuxaʼan yéetel ku béeytal, séebaʼan u xot ke tuláakal máaskab kaʼamat u yej; ku kʼuchul u buj tak u yóol wíinik, bey xan [u wíinklil máak], u táabal u xiichʼeloʼob, u tsʼoʼomeloʼob, yéetel xan ku chʼaʼnuʼuktik u tuukuloʼob yéetel u tsʼíibolaloʼob puksiʼikʼal» (Hebreos 4:12 Le Tumben Nuptʼan [1970]).

 Le baʼax ku kaʼansik Dios teʼ Bibliaoʼ yaan u páajtalil u jóoʼsik baʼax ku tuklik máak yéetel baʼax péeksik máak u beet wa baʼax. Tsʼoʼoleʼ jeʼel u yáantkoʼon xan utiaʼal ka yanaktoʼon jatsʼuts modoseʼ.

 «U tʼaan Dioseʼ kuxaʼan». Le tʼaan «u tʼaan Dioseʼ» u kʼáat u yaʼal le promesaʼob u beetmaj Jéeoba teʼ Bibliaoʼ. a Junpʼéel tiʼ le baʼax ken u beetoʼ letiʼe u tsʼáaik kuxtal minaʼan u xuul tiʼ wíinik ich jeetsʼelil tiʼ junpʼéel paraíso way Luʼumeʼ (Génesis 1:28; Salmo 37:29; Apocalipsis 21:3, 4).

 ¿Baʼaxten ku yaʼalaʼal u tʼaan Dioseʼ «kuxaʼan»? Tumen le máaxoʼob creertik le promesaʼob ku yaʼalik yéetel ku confiaroʼob de ke yaan u cumplirtikeʼ, ku yantal esperanza tiʼob yéetel ku yáantaj utiaʼal u kʼexik u kuxtaloʼob (Deuteronomio 30:14; 32:47). U táan Dioseʼ «kuxaʼan» tumen Dioseʼ táan u meyaj utiaʼal u cumplirtik tuláakal le baʼax u prometermoʼ (Juan 5:17). Dioseʼ maʼ jeʼex wíinikeʼ, letiʼeʼ ken u beet junpʼéel promesaeʼ maʼatech u tuʼubultiʼ, junpuliʼ maʼ tu pʼáatal wa maʼ u cumplirtik (Números 23:19). Dioseʼ ku yaʼalik: «Bey xan u yúuchul yéetel le tʼaan ku jóokʼol tin chiʼoʼ, maʼ kun kaʼa suut tin wiknal sin ke u béeytal» (Isaías 55:10, 11).

 «U tʼaan Dioseʼ [...] yaan u páajtalil». Le tʼaan «yaan u páajtaliloʼ» jeʼel xan u páajtal u traducirtaʼal beyaʼ: «Jach yaan u páajtalil», wa «ku béeykuntik jeʼel baʼaxakeʼ». Le oʼolaleʼ Jéeobaeʼ b yaan u béeykuntik tuláakal baʼax ku prometertik (Salmo 135:6; Isaías 46:10). Letiʼeʼ jeʼel u beetik jeʼel baʼaxak u kʼáat utiaʼal u cumplirtik le baʼax u prometermoʼ (Efesios 3:20). c

 U tʼaan Dioseʼ ku yaʼalaʼal xan «yaan u páajtalil» tumen ku yáantik máak u kʼex kuxtal yéetel u jatsʼutskíint u modos. Kéen kaanbalnak máak tiʼ Dioseʼ ku chíikpajal ichil u kuxtal tumen ku chʼaʼik en cuenta tiʼ tuláakal baʼax ku beetik (Romanos 12:2; Efesios 4:24). Le oʼolal jeʼel u páajtal u yaʼalaʼaleʼ u tʼaan Dioseʼ ku yáantik le máaxoʼob creertik le baʼaxoʼob ku yaʼalikoʼ (1 Tesalonicenses 2:13).

 «U tʼaan Dioseʼ [...] maas yaan u yej ke jeʼel baʼalak espadail tu kaʼatséelil yaan u yejeʼ». Lelaʼ u kʼáat u yaʼaleʼ u tʼaan Dioseʼ maas jach yaan u yej ke jeʼel baʼalak espadaileʼ, tumen ku kʼuchul tak tu maas taamil k-puksiʼikʼal wa ku páajtal u yeʼesik jach bixoʼon . Lelaʼ junpʼéel baʼal maʼ tu páajtal u beetik chéen wíinik. Koʼox ilik baʼax uláakʼ ku tsolik Hebreos 4:12.

 «U tʼaan Dioseʼ [...] ku yokol tak tu maas taamil u wíinklil máak utiaʼal u jatsik le bakʼ tiʼ le tuukuloʼoboʼ, bey xan utiaʼal u jatsik le baak tiʼ u tsʼoʼomel le baakoʼ». «U tʼaan Dioseʼ» bey jeʼex junpʼéel espada ku yokol tak «tu tsʼoʼomel le baakoʼ» tumen ku páajtal u yeʼesik baʼaxoʼob k-tuklik yéetel jach bix k-uʼuyikba. Le baʼaxoʼob ku kaʼansiktoʼon Jéeobaoʼ ku jóoʼsik yóoʼkabil le baʼaxoʼob maʼ tu páajtal u yilaʼal tumen u maasiloʼ, wa ku yeʼesik jach bixoʼon. Leloʼ ku péeksikoʼon k-jatsʼutskíint k-modos. Le ken k-kʼex k-modoseʼ ku kiʼimaktal k-óol bey xan Jéeoba.

 «U tʼaan Dioseʼ [...] jeʼel xan u páajtal u xakʼaltik baʼaxoʼob yaan tu tuukul yéetel tu puksiʼikʼal máakeʼ». Le bix u reaccionar máak le ken u xok le Bibliaoʼ ku yeʼesik baʼax jach tu jaajil ku tuklik, baʼax taak u beetik yéetel baʼax péeksik u beet wa baʼax. Por ejemploeʼ, le kéen u tsʼáa ichil u kuxtal juntúul máak le baʼax ku yaʼalik le Bibliaoʼ ku yeʼesik tu jaajil u yóol ku natsʼkuba tu yiknal Jéeoba, humilde yéetel u kʼáat u kiʼimakkúunt u yóol. Chéen baʼaleʼ wa maʼ tu jaajil u yóol ku natsʼkuba máak yiknal Dioseʼ yaan u káajal u tʼaan tu contra le Bibliaoʼ. Maʼ xaaneʼ chéen utiaʼal u taʼakik junpʼéel baʼax maʼ maʼalob táan u beetkiʼ (Jeremías 17:9; Romanos 1:24-27).

 Junpʼéel libro ku tsolik u tʼaaniloʼob le Bibliaoʼ ku yaʼalikeʼ u tʼaan Dioseʼ «ku kʼuchul tak tu maas taamil k-puksiʼikʼal». Dioseʼ jeʼel u páajtal u yilik jach bixoʼoneʼ, maʼ tu páajtal u taʼakaʼal mix baʼal tiʼ letiʼ. Hebreos 4:13, ku yaʼalik: «Mix baʼal ku páajtal u taʼakal tiʼ letiʼ, baʼaxeʼ láaj jéechkab yéetel jeʼekʼab tu táan u yich, tumen tiʼ letiʼ kun kʼubbil cuenta».

 U libroil Hebreoseʼ junpʼéel carta ku taal tiʼ Dios, tsʼíibtaʼab tumen apóstol Pablo utiaʼal le judíoʼob adorartik Dios kajaʼanoʼob Jerusalén yéetel Judea kex teʼ año 61.

 Teʼ capítuloʼob 3 yéetel 4, Pabloeʼ tʼaanaj tiʼ le baʼaxoʼob tu beetaj le israelitaʼob utiaʼal u yeʼesik tiʼ le máaxoʼob adorartik Dios le baʼaxoʼob maʼ unaj u beetkoʼoboʼ (Hebreos 3:8-12; 4:11). Jéeobaeʼ tu yaʼaleʼ yaan u beetik u xuʼulul u esclavizartaʼal le israelitaʼoboʼ yéetel yaan u biskoʼob kajtal tiʼ junpʼéel lugar maas seguro (Deuteronomio 12:9, 10). Chéen baʼaleʼ le israelitaʼob jóokʼoʼob Egiptooʼ maʼ tu creertoʼob le baʼax tu yaʼaloʼ, hasta pʼáat maʼ kʼaas u yilik u beetkoʼob baʼaloʼob kʼaastak tu táan Jéeobaiʼ. Tu yoʼolal leloʼ maʼ ookoʼob «tuʼux ku jeʼelel Diosiʼ», wa maʼ tu bisubaʼob tu yéeteliʼ, ka tsʼoʼokeʼ tiʼ kíimoʼob teʼ desiertooʼ. Tsʼoʼoleʼ kex u paalaloʼob ookoʼob teʼ luʼum aʼalaʼan u tsʼaʼabaltiʼoboʼ letiʼob xaneʼ maʼ tu yuʼuboʼob u tʼaan Jéeobaiʼ. Jach yaj bix úuchik u tsʼoʼokoltiʼob tumen maʼ tu yuʼuboʼob tʼaaniʼ (Nehemías 9:29, 30; Salmo 95:9-11; Lucas 13:34, 35).

 Pabloeʼ tu yaʼalaj ka kaanbalnakoʼon tiʼ u ejemplo le israelitaʼoboʼ. Toʼoneʼ jeʼel u páajtal k-okol tuʼux ku jeʼelel Dios wa k-beetik baʼax ku yaʼalik yéetel k-tsʼáaik fe tiʼ u promesaʼobeʼ (Hebreos 4:1-3, 11).

 Utiaʼal a wilik tiʼ uláakʼ baʼaxoʼob ku tʼaan u libroil Hebreoseʼ chaʼant le videoaʼ.