«Jéeobaeʼ a ku yaʼalik: ‹Teneʼ in wojel baʼax ken in beet ta woʼolaleʼex, maʼ ken in taas kʼaas ta wóokʼoleʼex, baʼaxeʼ yaan in beetik u yantalteʼex jeetsʼelil, utiaʼal ka xiʼikteʼex maʼalobil yéetel utiaʼal ka béeychajak le baʼax ka páaʼtkeʼexoʼ›» (Jeremías 29:11, Túumben Luʼum).

 «Baʼaxoʼob in tukultmaj teʼexeʼ, baʼaxoʼob utstak a tiaʼaleʼex, maʼ u tiaʼal [a] kʼaasileʼexiʼ, utiaʼal in tsʼáaik tiʼ teʼex u kʼiiniloʼob nojoch alab óolal. Teen Yuumtsil, teen aʼalik» (Jeremías 29:11, Quiliʼich Biblia ich Maya).

 Jéeobaeʼ tu yaʼalaj u tsʼáaik jeetsʼelil tiʼ le máaxoʼob meyajtikoʼ. Le tʼaanoʼobaʼ tu yaʼalaj tiʼ le máaxoʼob meyajtik úuchjeakiloʼ, chéen baʼaleʼ láayliʼ letiʼe baʼax ku tuklik u tsʼáaik tiʼ le máaxoʼob meyajtik bejlaʼoʼ. Letiʼeʼ ku yáantkoʼon «k-páaʼt le baʼax ku taal u kʼiinoʼ» (Romanos 15:13). Tsʼoʼoleʼ tu beetaj u tsʼíibtaʼal teʼ Biblia le tʼaanoʼobaʼ utiaʼal ka yanaktoʼon esperanza wa utiaʼal ka «k-páaʼt le baʼax ken u tsʼáatoʼon[oʼ]» (Romanos 15:4).

 Le tʼaanoʼobaʼ táakaʼan ichil junpʼéel carta tsʼíibtaʼab utiaʼal le israelitaʼob yanoʼob kaʼach Jerusalénoʼ, pero bisaʼaboʼob Babilonia (Jeremías 29:1). b Ichil le cartaoʼ aʼalaʼabtiʼobeʼ yaan u xáantaloʼob Babilonia, le oʼolal aʼalaʼabtiʼob ka u beet u yotochoʼob, ka u beet u paakʼaloʼob yéetel ka yanak u paalaloʼob teʼeloʼ (Jeremías 29:4-9). Chéen baʼaleʼ Dioseʼ tu yaʼalaj xan tiʼob: «Le kéen chúukpajak 70 años yanakeʼex Babiloniaeʼ, teneʼ yaan in kaʼa eʼesik in wutsil tiʼ teʼex, yaan in béeykuntik baʼax in waʼalmaj, tumen yaan in sutkeʼex [Jerusalén]» (Jeremías 29:10). Yéetel le tʼaanoʼobaʼ Dioseʼ tu yeʼesajtiʼob maʼ ken u tuʼubsoʼob, tsʼoʼoleʼ yaan u kʼuchul u kʼiinil u suutoʼob tu luʼumoʼob (Jeremías 31:16, 17).

 Dioseʼ tu béeykuntaj le baʼax tu prometertaj tiʼ le israelitaʼoboʼ. Ciro, le rey persaoʼ, tu chʼaʼaj u kaajil Babilonia (Isaías 45:1, 2; Jeremías 51:30-32). Ka tsʼoʼokeʼ Ciroeʼ tu chaʼaj u suut le judíoʼob tu luʼumoʼoboʼ. Chéen baʼaleʼ anchaj u máan 70 años utiaʼal u suutoʼob Jerusalén (2 Crónicas 36:20-23; Esdras 3:1).

 Jach ku beetik k-maas confiar tiʼ Jéeoba úuchik u béeykuntik le promesa yaan tiʼ Jeremías 29:11. Leloʼ ku yáantkoʼon k-creert jach tu jaajil yaan u béeytal le uláakʼ baʼaxoʼob u prometermoʼ. Por ejemploeʼ u yaʼalmeʼ yéetel u Reino Dioseʼ Jesúseʼ yaan u beetik u yantal jeetsʼelil way yóokʼol kaabeʼ (Salmo 37:10, 11, 29; Isaías 55:11; Mateo 6:10).

 Baʼax ku creertaʼal: Dioseʼ ku prometertik yaan u ayikʼaltal le máaxoʼob meyajtikoʼ.

 U jaajil: Jujunpʼéel bibliaʼobeʼ ku tsʼáaikoʼob le tʼaan «ayikʼalil» ichil u tekstoil Jeremías 29:11. Chéen baʼaleʼ u jaajileʼ le tʼaan ich hebreo meyajnaj teʼ tekstooʼ ku tsʼáaik naʼatbil «jeetsʼelil yéetel toj óolal». U contekstoil le tekstooʼ ku yeʼesikeʼ Dioseʼ maʼ táan kaʼach u prometertik wa yaan u ayikʼaltal le israelitaʼoboʼ, baʼaxeʼ chéen táan u yaʼalik kaʼacheʼ yaan u yantaltiʼob jeetsʼelil yéetel yaan u bintiʼob maʼalobil. Tsʼoʼoleʼ yaan u kʼuchul u kʼiinil u kaʼa suutoʼob tu kaʼatéen Jerusalén (Jeremías 29:4-10).