«Kex ka máanken tuʼux jach táaj éeʼjochʼeʼeneʼ, maʼ saajken u yúuchulten loobiʼ tumen tiaʼanech tin wiknaleʼ. Tu yoʼolal le cheʼ a machmoʼ kin wuʼuyik seguro yanilen» (Salmo 23:4, Túumben Luʼum).

 «Kex ka máanaken ichil u sen éeʼjocheʼenil u taamil áaktuneʼ, maʼ bíin in chʼaʼ saajkil tiʼ mix junpʼéel loobiʼ, tumen techeʼ Yuumtsil, tiʼ yanech tin wéeteleʼ; u yaakʼil a jaatsʼ yéetel a xóolteʼeʼ ku lukʼesik in saajkil» (Salmo 23:4, Quiliʼich Biblia ich Maya).

 Dioseʼ ku kanáantik máaxoʼob meyajtik, maases wa táan u máanskoʼob problemas. Le versículoaʼ ku tsolikeʼ Jéeobaeʼ ku kanáantik le máaxoʼob meyajtik jeʼex u beetik juntúul j-kanan taman yéetel u yalakʼ tamanoʼobeʼ. b Le oʼolal le máaxoʼob meyajtik Jéeobaoʼ maʼatech u yuʼubikubaʼob tu juunaloʼob kex jach difícil baʼax ku aktáantkoʼob. Teʼ versículo xanaʼ ku keʼetel le baʼax ku aktáantkoʼob yéetel junpʼéel lugar jach táaj éeʼjochʼeʼenoʼ, kex beyoʼ maʼ tu sajaktaloʼob tumen ku yuʼubikoʼob tiaʼan Jéeoba tu yiknaloʼobeʼ.

 Úuchjeakileʼ le j-kanan tamanoʼoboʼ ku meyajtiʼob juntsʼíit cheʼ utiaʼal u kanáantik u tamanoʼob tiʼ le tsʼíitsʼik baʼalcheʼoboʼ. Ku meyaj xan tiʼob u xóolteʼob, u suukileʼ junpʼéel chowak cheʼ wúutsʼul le tuʼux ku maʼachloʼ, lelaʼ ku meyajtiʼob utiaʼal u kanáantkoʼob yéetel u nuʼuktikoʼob le tamanoʼoboʼ. Jéeobaeʼ bey jeʼex le j-kanan tamanoʼ, ku kanáantik yéetel ku nuʼuktik le máaxoʼob meyajtikoʼ. Kex jach talam bix kuxlikoʼobeʼ Jéeobaeʼ jejeláas bix u kanáantkoʼob:

•   Ku kaʼanskoʼob yéetel ku líiʼsik u yóoloʼob yéetel le Bibliaoʼ (Romanos 15:4).

•   Ku yuʼubik u oraciónoʼob yéetel ku tsʼáaik jeetsʼelil tiʼob (Filipenses 4:6, 7).

•   Ku péeksik le máaxoʼob meyajtik utiaʼal u tsʼáaikoʼob áantaj tiʼ máax kʼaʼabéet (Hebreos 10:24, 25).

•   Ku tsʼáaik esperanza tiʼob tumen ku yaʼalik yaan u xuʼulsik tuláakal le baʼaxoʼob beetik u muʼyajoʼoboʼ (Salmo 37:29; Apocalipsis 21:3-5).

 David tsʼíibt le Salmo 23, tu táankelmileʼ tu kanáantaj tamanoʼob yéetel ka máan kʼiineʼ tu beetuba reyil tiʼ u kaajil Israel (1 Samuel 17:34, 35; 2 Samuel 7:8). Tu káajbal le salmoaʼ ku ketik Jéeoba yéetel juntúul j-kanan taman ku nuʼuktik, ku tséentik yéetel ku yáantik le máaxoʼob meyajtikoʼ, jach jeʼex u beetik juntúul j-kanan taman yéetel u mejen tamanoʼobeʼ (Salmo 23:1-3).

 Teʼ Salmo 23:4, Davideʼ ku káajal u yaʼalik bix u kanáantaʼal letiʼ tumen Jéeoba, le bix u tʼaan tu yéetel Jéeobaoʼ ku yeʼesik jach maʼalob u biskuba tu yéetel. Davideʼ u yojel Jéeobaeʼ jach ku preocuparkuba tu yoʼolal yéetel u yojel xan jach baʼax ku aktáantik, le oʼolal letiʼeʼ maʼ tu chʼaʼaj saajkiliʼ.

 Teʼ versículo cinco yéetel seisoʼ Davideʼ ku jáawal u comparartik Jéeoba yéetel juntúul j-kanan taman, beoraaʼ ku comparartik yéetel juntúul máax ku kʼamik u yuʼulab. Jéeobaeʼ jach maʼalob tu tratartil David, tu beetaj jeʼex u beetik juntúul máax jach maʼalob u kʼamik u yuʼulabeʼ. Mix u enemigoʼob David beet u jáawal u kanáantaʼal tumen Jéeoba . Tu tsʼoʼokbal le Salmo 23, Davideʼ ku yaʼalikeʼ Jéeobaeʼ jach uts le oʼolal yaan xan u kanáantaʼal tuláakal u kʼiiniloʼob u kuxtal.

 Le Salmo 23, ku yeʼesik bukaʼaj le yaabilaj ku yuʼubik Jéeoba tu yoʼolal le máaxoʼob meyajtikoʼ (1 Pedro 2:25).