U testigoʼob Jéeobaeʼ, ¿bix u yilkoʼob le divorciooʼ?

PAX ICH

U testigoʼob Jéeobaeʼ ku chʼaʼikoʼob en cuenta le principioʼob yanoʼob teʼ Biblia yaan yil yéetel le tsʼoʼokol beeloʼ bey xan le divorciooʼ. Dios beet u yantal le tsʼoʼokol beeloʼ, le oʼolal maʼ u kʼáat ka u divorciartuba le máaxoʼob tsʼokaʼan u beeloʼoboʼ. Le Bibliaoʼ ku yaʼalikeʼ chéen jeʼel u páajtal u divorciarkuba máak tiʼ u núupeʼ wa juntúul tiʼ letiʼobeʼ ku yantal relaciones sexuales yéetel máax maʼ u núupiʼ (Mateo 19:5, 6, 9).

U testigoʼob Jéeobaeʼ, ¿ku yáantkoʼob wa le tsʼokaʼan u beeloʼob yaan problemas tiʼoboʼ?

Ku yáantkoʼob, koʼoneʼex ilik bix le áantaj ku tsʼaʼabaltiʼoboʼ.

U beetmoʼob publicaciónoʼob. Le publicaciónoʼoboʼ ku yáantik le máaxoʼob tsʼokaʼan u beeloʼob utiaʼal u maas yaabiltikubaʼoboʼ. Tsʼoʼoleʼ ku yáantik xan le máaxoʼob ku tuklik u divorciarkubaʼob utiaʼal maʼ u pʼatkubaʼoboʼ. Ilawil le xook «Bix jeʼel u muʼukʼaʼantal le compromiso yaan ichil le tsʼokaʼan u beeloʼoboʼ», bey xan le xookoʼob ich español «Cómo perdonar» yéetel «Cómo recuperar la confianza perdida».
Ku beetkoʼob reuniónoʼob. Teʼ reuniónoʼob ku beetaʼal cada semana yéetel teʼ asambleaʼoboʼ k-xakʼaltik le consejoʼob ku tsʼáaik le Biblia tiʼ le tsʼokaʼan u beeloʼoboʼ.
Ancianoʼob. Le ancianoʼob wa le máaxoʼob tsʼaʼan u kanáantoʼob le congregaciónoʼoboʼ ku yáantkoʼob le tsʼokaʼan u beeloʼoboʼ. Ku xakʼaltaʼal tu yéeteloʼob le consejoʼob ku tsʼáaik le Bibliaoʼ, jeʼex le ku yaʼalik Efesios 5:22-25.

Wa juntúul Testigo u kʼáat u divorciartubaeʼ, ¿unaj wa u kʼáatik tiʼ le ancianoʼob wa jeʼel u páajtal u beetkoʼ?

Maʼatech. Le ancianoʼoboʼ maʼ tu páajtal u prohibirkoʼob tiʼ le máaxoʼob tsʼokaʼan u beeloʼob ka u divorciartubaʼoboʼ. Pero jeʼel u páajtal u yáantaʼaloʼob utiaʼal u yutskíintik u problemaseʼ (Gálatas 6:5). Chéen baʼaleʼ wa maʼ yoʼolal núupkʼeban ku divorciarkuba máakeʼ maʼ tu páajtal u kaʼa tsʼoʼokol u beel mix u kʼubéentaʼaltiʼ meyajoʼob ichil u kaajal Dios (1 Timoteo 3:1, 5, 12).

U testigoʼob Jéeobaeʼ, ¿bix u yilkoʼob le u pʼatkuba máakoʼ?

Le Bibliaoʼ maʼatech u yaʼalik tiʼ le máaxoʼob tsʼokaʼan u beeloʼob ka u pʼatubaʼob kéen yanaktiʼob problemasoʼ (1 Corintios 7:10-16). Le problemas ku yantaltiʼoboʼ jeʼel u páajtal u yutstal wa ku kʼáatkoʼob u yáantaj Dioseʼ, ku beetkoʼob baʼax ku yaʼalik le Bibliaoʼ yéetel wa ku yeʼeskoʼob yaabilaj tiʼ u núupoʼob (1 Corintios 13:4-8; Gálatas 5:22).

Chéen baʼaleʼ yanoʼobeʼ tsʼoʼok u pʼatik u núupoʼob yoʼolal le baʼaloʼobaʼ:

Maʼ tu tsʼaʼabal u gasto wa maʼ tu mantenertaʼal tumen u núup (1 Timoteo 5:8).
Ku sen maltratartaʼal yéetel jeʼel tak u kíimsaʼal tumen u núupeʼ (Salmo 11:5).
Maʼ tu chaʼabal u meyajtik Dios. Maʼ xaaneʼ jeʼel tak u obligartaʼal u beet junpʼéel baʼal ku bin tu contra le baʼax ku yaʼalik le Bibliaoʼ, le oʼolal ku chʼaʼtuklik u pʼatik u núup tumen ku tsʼáaik cuenta ‹unaj u yuʼubik u tʼaan Dios, maʼ u tʼaan chéen máakoʼobiʼ› (Hechos 5:29).