U testigoʼob Jéeobaeʼ, ¿baʼaxten maʼatech u celebrarkoʼob le Navidadoʼ?

PAX ICH

Baʼax ku creertik le máakoʼoboʼ yéetel baʼax ku creertik u testigoʼob Jéeoba

Baʼax ku creertik le máakoʼoboʼ: U testigoʼob Jéeobaeʼ maʼatech u celebrarkoʼob le Navidadoʼ tumen maʼatech u creerkoʼob Jesús.

Baʼax ku creertik u testigoʼob Jéeoba: Toʼoneʼ jach k-creertik Jesús, k-ojel chéen tu yoʼolaleʼ jeʼel u páajtal k-salvartikbaeʼ (Hechos 4:12).

Baʼax ku creertik le máakoʼoboʼ: Ku beetkoʼob u jatskuba le familiaʼoboʼ tumen ku yaʼalikoʼobeʼ maʼ maʼalob u celebrartaʼal le Navidadoʼ.

Baʼax ku creertik u testigoʼob Jéeoba: Toʼoneʼ jach importante k-ilik ka u paklan yaabiltuba le familiaʼoboʼ. Le oʼolal k-kaʼansik baʼax unaj u beetkoʼob utiaʼal ka u bisubaʼob tubeel.

Baʼax ku creertik le máakoʼoboʼ: Tu temporadail le Navidadoʼ ku tsʼaʼabal regaloʼob, ku yeʼesik máak u yaabiltmaj u maasil yéetel jatsʼuts bix u biskuba tuláakal máak, pero le Testigoʼoboʼ maʼatech u beetkoʼob le baʼaloʼobaʼ.

Baʼax ku creertik u testigoʼob Jéeoba: Toʼoneʼ sáamsamal k-ilik k-eʼesik utsil yéetel yaabilaj tiʼ u maasil (Proverbios 11:25; Romanos 12:18). Kéen k-muchʼba utiaʼal k-adorartik Dioseʼ maʼatech k-kʼáatik taakʼin tiʼ le máaxoʼob ku binoʼoboʼ. Maʼatech xan k-cobrartik ikil k-kaʼansik u maasil, tumen k-beetik le baʼax tu yaʼalaj Jesúsaʼ: «Siibil úuchik u beetaʼalteʼex siibil xan unaj a beetkeʼex» (Mateo 10:8). Tsʼoʼoleʼ k-kaʼansikeʼ chéen u Reino Dios kun beetik u biskuba maʼalob tuláakal máak (Mateo 10:7).

¿Baʼaxten maʼatech u celebrarkoʼob Navidad u testigoʼob Jéeoba?

Jesúseʼ tu yaʼalaj ka k-kʼaʼajs le fecha ka kíimoʼ maʼ le kʼiin ka síijoʼ (Lucas 22:19, 20).
U apóstoloʼob Jesúseʼ maʼ tu celebrartoʼob le Navidadoʼ mix le cristianoʼob yanchajoʼob teʼ yáax siglooʼ. Le Diccionario del cristianismooʼ ku yaʼalikeʼ le Navidadoʼ káaj u celebrartaʼal tu kaajil Roma kex tu añoil 330 tsʼoʼokok u taal Jesús, maas tiʼ 200 años kíimik le u tsʼook apóstoloʼ.
Mix baʼal eʼesik wa Jesúseʼ síij 25 tiʼ diciembre, le Bibliaoʼ maʼatech u yaʼalik baʼax kʼiin ka síiji.
Dioseʼ maʼatech u aprobartik ka celebrartaʼak le Navidadoʼ tumen u yojel lelaʼ táakaʼan ichil le baʼaxoʼob suukaʼan u beetaʼal tumen yaʼab máakoʼoboʼ (2 Corintios 6:17).

¿Baʼaxten maʼ tu beetkoʼob jeʼex u maasil máakoʼobeʼ?

Yaʼab máakeʼ kex u yojloʼob maʼ teʼ Biblia u taal le Navidadoʼ láayliʼ ku celebrarkoʼobeʼ, ku tuklikoʼobeʼ maʼ jach kʼaas ka u beetoʼobiʼ. Ku celebrarkoʼob xan tumen bey u beetik u maasiloʼ.

Le Bibliaoʼ ku yaʼaliktoʼoneʼ unaj u meyaj k-tuukul utiaʼal k-ilik baʼax uts yéetel baʼax kʼaas (Romanos 12:1, 2). Ku yaʼalik xan toʼoneʼ unaj k-chaʼik tiʼ Dios ka u nuʼuktoʼon yéetel u Tʼaan (Juan 4:23, 24). Toʼoneʼ k-respetartik baʼax ku yaʼalik u maasil, baʼaleʼ maas importante k-ilik beetik baʼax ku yaʼalik Dios maʼ le baʼax ku beetik u maasiloʼ.

Toʼoneʼ maʼatech k-celebrartik le Navidadoʼ, pero maʼatech k-obligartik xan u maasil ka u beet beyoʼ. Baʼaxeʼ cada juntúul ken u chʼaʼtukult baʼax ken u beete.