Yaʼab máakoʼob ku kʼuchul u chaʼantoʼob le cascadaʼob yanoʼob naatsʼ tu noj kaajil Pagsanján, Filipinas. In papaeʼ nojochchaj teʼ kaajaʼ, u kʼaabaʼeʼ Nardo Lerón, jach óotsiloʼob kaʼachi. Letiʼeʼ jach kʼaschaj u modos yoʼolal le baʼaloʼob kʼaastak ku yilik u beetik le gobiernooʼ, le policíaʼoboʼ yéetel u yéet meyajoʼob.

 Utiaʼal u tsʼáaikoʼob baʼax kʼaʼabéettoʼoneʼ, in taataʼobeʼ jach yaʼab u meyajoʼob tumen ocho u túulaloʼon. Letiʼobeʼ maases bul kʼiin ku máanskoʼob táan u paakʼaloʼob tak teʼ tuʼux yaan le witsoʼoboʼ. Le oʼolal maases teen yéetel in sukuʼun Rodelio k-kanáantik chan k-íits’ino’ob, toʼoneʼ mantatsʼ k-máansik kaʼach wiʼijil. Kex paalaloʼoneʼ maʼatech jach k-báaxal. Kéen u chuk kaʼach siete años toʼoneʼ k-bisaʼal pakʼal, yaan horaeʼ k-púutik u kúukuchal cocoʼob kex kaʼanal le witsoʼoboʼ. Wa maʼ tu páajtal k-kuchik kaʼacheʼ ku beetaʼal k-jíitik.

 In papaeʼ jach ku sen jatsʼkoʼon kaʼachi, baʼaleʼ maas ku yaatal k-óol kéen k-il bix u jatsʼik in maama. K-oksikba k-tok kaʼachi, baʼaleʼ mix baʼal ku béeytal k-beetik tumen chichnoʼon. Teen yéetel Rodelioeʼ t-chʼaʼtuklaj k-kíimsik kéen nojochchajkoʼon. ¡Jach kin tsʼíiboltik kaʼach ka yanaktoʼon juntúul taatatsil ka u yaabiltoʼon!

 Le yaanten 14 añosoʼ lukʼen tin wotoch tumen jach ku lúubul in wóol yéetel kin pʼuʼujul kéen in wil bix kʼasaʼanil in papá. Chéen bey in máan kaʼachoʼ le oʼolaleʼ káaj tak in tsʼuʼutsʼik marihuana. Ka máan kʼiineʼ ooken meyaj tiʼ junpʼéel chan barco utiaʼal in bisik le máakoʼob u chaʼantoʼob le cascadaʼoboʼ.

 Ka máan wa jaypʼéel jaʼaboʼobeʼ ooken xook tu universidadil Manila. Baʼaleʼ maʼ jach yaanten tiempo utiaʼal in xookiʼ tumen tu jóokʼbal semanaeʼ kin bin meyaj tu kaajil Pagsanján. Kin wuʼuyik minaʼan u biilal in kuxtal tsʼoʼoleʼ pʼáat mix le marihuana áantkenoʼ. Le oʼolaleʼ káaj in usartik u jejeláasil drogaʼob maas kʼaastak jeʼex le metanfetaminasoʼ, le cocaínaoʼ yéetel le heroínaoʼ. Jach kʼaschaj in kuxtal ikil in drogarkinbaoʼ. Kin wilik kaʼach máaxoʼob óotsiloʼob, ku sen muʼyajoʼob yéetel mix máak beetik u cuentaʼob. Kʼuchen in pʼekt le gobiernooʼ tumen kin tuklik kaʼacheʼ u culpaʼob le baʼaxoʼob ku yúuchloʼ. Teneʼ kin kʼáatik kaʼach tiʼ Dios: «¿Baʼaxten bey le kuxtalaʼ?». Baʼaleʼ kex binen tiʼ yaʼab religionoʼobeʼ mix tuʼux núukaʼab ten lelaʼ. Utiaʼal maʼ in maas chiʼichnaktaleʼ joʼopʼ in maas drogarkinba.

 Tu añoil 1972, tuláakal le máaxoʼob ku binoʼob xook tu luʼumil Filipinasoʼ tu tsʼáajubaʼob tu contra le gobiernooʼ. Teneʼ binen marchar tu yéeteloʼob baʼaleʼ chéen baʼatelil tsʼoʼokik. Yaʼaboʼobeʼ kʼaʼaloʼob cárcel yéetel ka máan wa jaypʼéel mesoʼobeʼ aʼalaʼabeʼ le soldadoʼoboʼ yaan u jeʼelsikoʼob le baʼateʼel jeʼex u tuklikoʼob maas maʼalobeʼ, kex jeʼel baʼaxak ka anchajak u beetkoʼobeʼ (ley marcial).

 Pʼáat chéen bey in máan tu kaʼatéenoʼ baʼaleʼ saajken kaʼach u beetaʼal ten wa baʼax tumen le autoridadoʼob úuchik in táakpajal teʼ marchaʼoboʼ. Utiaʼal u seguer in manik drogaeʼ káaj in wookol, ka tak káaj in konik in wíinklil tiʼ le máaxoʼob ayikʼaloʼob yéetel yaanal tuʼux u taaloʼoboʼ. Baʼaliʼ in kʼáajtiʼ kaʼach wa kíimeneʼ.

 In maama yéetel juntúul in wíitsʼineʼ táan kaʼach u xokikoʼob le Biblia yéetel u testigoʼob Jéeobaoʼ. In papaeʼ jach tsʼíikilnaji ka tu tóokaj u revistaʼob yéetel u libroʼob. Chéen baʼaleʼ letiʼobeʼ jach chúukpaj u yóoloʼob ka tu beetubaʼob u testigoʼob Jéeoba.

 Juntéenjeakeʼ juntúul Testigoeʼ tu tsikbaltaj tiʼ in papá yaan u kʼuchul u kʼiinil u yutskíintaʼal tuláakal baʼal kʼaas ku beetaʼal teʼ yóokʼol kaabaʼ (Salmo 72:12-14). Tumen jatsʼuts tu yuʼubileʼ taakchaj u yojéeltik u maasil tiʼ le Bibliaoʼ. Letiʼeʼ tu kanaj yaan u yantal junpʼéel gobierno jach uts yéetel tu kanaj xan baʼax ku páaʼtik Dios tiʼ juntúul íichamtsil yéetel tiʼ juntúul taatatsil (Efesoiloʼob 5:28; 6:4). Maʼ úuch tiʼ leloʼ letiʼ yéetel u maasil in láakʼtsiloʼobeʼ tu beetubaʼob Testigoʼob. Tumen náach yanen kaʼach tiʼobeʼ maʼ tin wojéeltaj lelaʼ.

 Tu añoil 1978, binen kajtal Australia. Kex yaan jeetsʼelil kaʼach teʼ luʼumilaʼ teneʼ láayliʼ maʼ kiʼimak in wóoliʼ. Maʼ xuʼul in káaltal yéetel in drogarkinbaiʼ. Teʼ añooʼ tu xíimbalten le Testigoʼoboʼ, teneʼ jatsʼuts tin wuʼuyil u kaʼanskoʼob ten yaan u yantal jeetsʼelil way Luʼumeʼ, baʼaleʼ maʼ tin jach creertoʼobiʼ.

 Ka máan kʼiineʼ binen Filipinas wa jaypʼéel kʼiinoʼob. In wíitsʼnoʼobeʼ tu yaʼaloʼob teneʼ k-papaeʼ táan kaʼach u kʼexik u modos, baʼaleʼ tumen láayliʼ jach in pʼekmeʼ, maʼ tin wóotaj in wiliʼ.

 U maas chichnil in wíitsʼnoʼobeʼ tu tsolajten yéetel le Biblia baʼaxten jach yaan baʼaloʼob kʼaastak teʼ yóokʼol kaabaʼ. Jaʼakʼ in wóol ka tin wilaj chéen juntúul chan x-chʼúupal núuk ten le baʼaxoʼob taak in wojéeltikoʼ. Táanil tiʼ in lukʼleʼ in papaeʼ tu tsʼáajten le libro Usted puede vivir para siempre en el paraíso en la Tierra. a Tu yaʼalajten: «Xul a kaaxan. Le libroaʼ yaan u núukik tech le baʼaxoʼob taak a wojéeltikoʼ». Tu yaʼalaj xan ten ka in kaxt le Testigoʼob kéen kʼuchken Australiaoʼ.

 Teneʼ tin beetaj baʼax tu yaʼalajten in papá, ka kʼuchen Brisbaneeʼ tin wilaj yaan junpʼéel u Najil Reino naatsʼ tin wotoch, ka túun káaj in xokik le Biblia tu yéeteloʼoboʼ. Teʼ capítulo 7 tiʼ Daniel yéetel capítulo 9 tiʼ Isaíasoʼ, tin kaneʼ chéen u Reino Dios kun utskíintik tuláakal baʼal, tin kanaj xaneʼ le yóokʼol kaabaʼ yaan u suʼutul junpʼéel paraíso. In kʼáat ka u kʼamen Dios kaʼachi baʼaleʼ in wojleʼ utiaʼal leloʼ unaj in pʼatik le kʼaakʼas kuxtal yaantenoʼ, in káaltal yéetel in drogartkinba. Tin pʼataj le koʼolel kajakbal tin wéeteloʼ bey xan u maasil baʼaloʼob kʼaastak kin beetkoʼ. Jeʼex úuchik in maas kʼaj óoltik Jéeobaeʼ bey úuchik in kʼáatik tiʼ ka u yáanten in kʼex in kuxtaloʼ.

 Jujunpʼíitil tin wileʼ le baʼax kin kanikoʼ jeʼel u kʼexik u kuxtal máakeʼ. Le Bibliaoʼ ku yaʼalikeʼ unaj ‹k-búukbesikba yéetel le túumben kuxtaloʼ› (Colosasiloʼob 3:9, 10). Le ka káaj in kʼexik in kuxtaloʼ tin tsʼáaj cuentaeʼ maʼ xaaneʼ jaaj le baʼax tu yaʼalajten in wíitsʼinoʼob yoʼolal bix u kʼexik u modos in papaoʼ. Káaj in wuʼuyik maʼ in pʼekmaj in papaiʼ baʼaxeʼ taakchaj in kaʼa biskinba tu yéetel. Tin perdonartaj ka tin tuʼubsaj tuláakal baʼax u beetmajtoʼon desde tin paalil.

 Tin táankelmileʼ kin beetik kaʼach le baʼaloʼob kʼaastak ku beetik u maasiloʼ. Jeʼex u yaʼalik le Bibliaoʼ in biskinba yéetel máaxoʼob kʼasaʼanoʼobeʼ tu kʼaskúuntaj in kuxtal (1 Corintoiloʼob 15:33). Baʼaleʼ ichil u testigoʼob Jéeobaeʼ tin kaxtaj amigoʼob áantken in beet baʼax maʼalob. Ichiloʼobeʼ tin kʼaj óoltaj Loretta, in watan. Junmúuchʼ yéeteleʼ k-kaʼansik tiʼ uláakʼ máakoʼob jeʼel u yáantaʼaloʼob tumen le Bibliaoʼ.

 Yéetel u yáantaj le Bibliaoʼ in papaeʼ tu yeʼesaj yaabilaj yéetel kabal óolal, mix juntéen tin tuklaj wa jeʼel u yúuchul lelaʼ. Tu añoil 1987, le ka tsʼoʼok in wokjaʼeʼ in papaeʼ tu méekʼen. ¡Lelaʼ letiʼe yáax juntéen ka tu méekʼenoʼ!

 In papá yéetel in maamaeʼ kʼaʼaytajnajoʼob maas tiʼ treinticinco años. In papaeʼ kʼuch kʼaj óoltbil bey juntúul j-meeyjil máak yéetel jach ku yáantik u maasileʼ. Jach kʼuchen in yaabilte yéetel kiʼimak in wóol in waʼalik tiʼ u maasil in papá. Letiʼeʼ kíim tu añoil 2016, baʼaleʼ láayliʼ in kʼaʼajsik yéetel yaabilajeʼ tumen tu kaʼatúulaloʼon t-beetaj yaʼab kʼeexoʼob ichil k-kuxtal yéetel u yáantaj le Bibliaoʼ. Bejlaʼeʼ junpuliʼ maʼ in pʼekmaj mix máakiʼ. Jach kiʼimak in wóol tumen tin kaxtaj Jéeoba, in taata yaan teʼ kaʼanoʼ, le Máax kun xuʼulsik tuláakal le baʼax beetik u muʼyaj le familiaʼoboʼ.