Ed yéetel Jennie u yataneʼ tu añoil 2010 ka yáax predicarnajoʼob tiʼ teléfono. a Jennieeʼ ku yaʼalik: «Jach maʼ jatsʼuts tin wililiʼ, tin waʼalaj tiʼ in wíichameʼ maʼ tin kaʼa suut predicar tiʼ teléfono». Ed xaneʼ bey tu yuʼubilubaoʼ, letiʼeʼ ku yaʼalik: «Maʼ uts tin tʼaan ka sen tʼaʼanken tumen j-koonoloʼobiʼ, le beetkeʼ teen xaneʼ maʼ in kʼáat predicar tiʼ teléfonoiʼ».

 Ka káaj le COVID-19, u testigoʼob Jéeobaeʼ xuʼul u predicaroʼob joonaj joonajil. Chéen baʼaleʼ como u yojloʼob kʼaʼabéet u yúuchul predicar jeʼex tu yaʼalil Jesúseʼ káaj u tsʼíibtikoʼob cartas yéetel u tʼankoʼob tiʼ teléfono le máakoʼoboʼ (Mateo 24:14; 28:19, 20). Tsʼoʼoleʼ le reuniónoʼoboʼ maʼ xuʼul u beetaʼal cada semanaiʼ tak u reuniónil utiaʼal u jóokʼol máak predicareʼ káaj u beetaʼal tiʼ videoconferencia. Junpʼéel tiʼ le reuniónoʼobaʼ jach tu animartaj Ed utiaʼal u kaʼa predicar tiʼ teléfono. ¿Bix tu yuʼubiluba antes tiʼ u beetik? Letiʼeʼ ku yaʼalik: «Jach nerviosochajen le oʼolal orarnajen tiʼ Jéeoba, ka tsʼoʼokeʼ tin marcartaj le teléfonooʼ. Bey úuchik in kʼaj óoltik Tyronoʼ». b

 Tyron yéetel Edith u yataneʼ, kajaʼanoʼob tiʼ junpʼéel chan kaaj yaan Kentucky, (Estados Unidos). Tyroneʼ yaan 83 años tiʼ yéetel maʼ jach sáasil u paakatiʼ, kex beyoʼ tu kʼamaj ka tsʼaʼabak xook tiʼ tumen Ed yéetel le Bibliaoʼ. Tiʼ teléfono ku tʼaʼanal utiaʼal u tsʼaʼabal xook tiʼ yéetel ku meyajtiʼ junpʼéel lupa utiaʼal u béeytal xook.

 Kex junpʼéel mes káajak u xookeʼ Tyron yéetel Editheʼ káaj u yuʼubikoʼob le reuniónoʼob tiʼ celuraroʼ, tʼanbil u beetaʼaloʼob tumen minaʼan internet tiʼob. Kux túun Edith, ¿bix animarnajik u kan u jaajil?

 Le táan u tsʼáaikoʼob xook tiʼ Tyronoʼ, Ed yéetel Jennieeʼ ku yuʼubikoʼob táan u yáantaʼal Tyron tumen Edith u kaxt u núukil le preguntaʼob bey xan le tekstoʼoboʼ. Chéen baʼaleʼ maʼatech u táakpajal teʼ xookoʼ. Jennieeʼ ku yaʼalik: «Le kéen tʼaanak Editheʼ jach triste u yuʼubaʼal u voz, pero maʼ k-ojel baʼaxten bey u yuʼubaʼaloʼ».

 Junpʼéel kʼiineʼ Jennieeʼ jach taakchaj u tʼaan yéetel Edith. Ka tu tsʼáaj cuenta jeʼel u béeytaleʼ tu kʼáataj tiʼ Ed le teléfonooʼ ka tu yaʼalaj tiʼ Tyron: «Kin masakʼ uʼuyik u voz a watan, in kʼáat in invitart utiaʼal ka u xok junpʼéel teksto teʼ Bibliaoʼ wa tak chéen ka u yaʼaltoʼon wa baʼax yoʼolal le xookoʼ».

 Maʼ sen sáameʼ Editheʼ tu núukaj le teléfonooʼ, yéetel u modo u tʼaan jach tranquilooʼ tu yaʼalaj: «Tsʼoʼok u máan kʼiin taakak in tʼaan ta wéeteleʼex, teneʼ u testigoen Jéeoba. Chéen baʼaleʼ tsʼoʼok u máan 40 años inactivaen».

 Jennieeʼ jach kiʼimakchaj u yóol ka tu yaʼalajtiʼ: «¡Si in kiikech bakáan!». Ka joʼopʼ u yokʼoloʼob.

 Maʼ sen úuch tiʼ leloʼ Edeʼ tu tsʼáaj tiʼ Edith le folleto Jéeobaeʼ u kʼáat ka suunakech. Ka máan wa jaypʼéel semanaʼobeʼ Ed yéetel Jennieeʼ tu tsʼáajoʼob cuentaeʼ Editheʼ maas kiʼimak u yóol. Edeʼ ku yaʼalik: «Kaʼachileʼ jach triste u yuʼubaʼal, pero beoraeʼ maas kiʼimak u yóol». Editheʼ suunaj yiknal Jéeoba, bejlaʼeʼ jach kiʼimak u yóol tumen publicadora tu kaʼatéen. U yíichameʼ okjaʼanaj tu mesil julio tiʼ 2022.

 Le kéen u kʼaʼajs Ed baʼax ku tuklik kaʼach yoʼolal u predicar tiʼ teléfonoeʼ ku kʼaʼajal xan tiʼ le ka tsikbalnaj yéetel Tyronoʼ. Edeʼ tu xokaj Juan 6:44 tiʼ Tyroneʼ ka tu tsolaj tiʼe Jéeoba natsʼik le máakoʼob tu yiknaloʼ. Tyroneʼ tu yaʼaleʼ jach jaaj baʼax ku yaʼalik le Bibliaoʼ, ka xan tu yaʼalaj: «Táan kaʼach in páaʼtik a tʼanken». Jennie xaneʼ kiʼimak u yóol tumen kex saajkoʼob kaʼach predicar yéetel u yíicham tiʼ teléfonoeʼ béeychaj u beetkoʼob. Letiʼeʼ ku yaʼalik: «Le kéen u tsʼáa u yóol máakeʼ ku bendecirtaʼal tumen Jéeoba».