和平——你點樣可以得到？
我哋生活喺一個充滿難題嘅世界，要付出努力先可以得到和平。即使我哋已經喺某程度上得到和平，但如果想繼續保持，就要不斷奮鬥。上帝嘅話語點樣幫助我哋揾到真正同恆久嘅和平？我哋可以點樣幫助其他人得到呢種和平？
點樣先可以享有真正嘅和平？
要得到真正嘅和平，我哋就需要有安全感以及平和嘅心境，亦都需要同其他人建立良好嘅關係。最重要嘅係，我哋必須同上帝培養親密嘅關係先可以享有恆久嘅和平。我哋可以點樣做？
生活上嘅憂慮使好多人失去内心嘅安寧
我哋聽從耶和華正義嘅誡命同原則，就表明我哋信賴佢，好想同佢有和睦嘅關係。（耶利米書17:7,8；雅各書2:22,23）我哋噉樣做，耶和華就會親近我哋，使我哋内心得享安寧。以賽亞書32:17話：“正義嘅成果就係和平，正義嘅成效就係永恆嘅寧靜與安穩。”我哋衷心服從耶和華，内心就可以得到真正嘅安寧。（以賽亞書48:18,19）
聖靈係天父賜俾我哋無與倫比嘅禮物，亦都可以幫助我哋培養和平呢種特質。（使徒行傳9:31）
上帝嘅聖靈幫助我哋培養和平
和平係使徒保羅列出嘅第三種聖靈果實特質。（加拉太書5:22,23）既然和平係聖靈果實嘅其中一種特質，我哋順應聖靈就可以培養出真正嘅和平。等我哋嚟睇吓聖靈幫助我哋得到和平嘅兩個方法。
第一，上帝嘅話語係由聖靈啟示嘅，經常閲讀可以幫助我哋培養和平呢種特質。（詩篇1:2,3）我哋沉思聖經内容嗰陣，上帝嘅聖靈就會幫助我哋明白耶和華對各種事情嘅睇法。例如，我哋可以睇出佢點樣促進和睦同埋點解佢咁重視和平。我哋喺生活上實踐學到嘅聖經知識，就可以得享更多平安。（箴言3:1,2）
第二，我哋要向上帝祈求聖靈。（路加福音11:13）耶和華承諾，如果我哋向佢尋求幫助，“［佢］就一定會賜［我哋］平安，超越人所能理解嘅。呢種平安通過基督耶穌，可以守護［我哋］嘅内心同頭腦”。（腓立比書4:6,7）如果我哋向耶和華禱告並仰賴佢嘅聖靈，佢就會使我哋嘅内心充滿和平安寧。只有同上帝關係親密嘅人先可以得享呢種平安。（羅馬書15:13）
以下嘅例子表明，我哋實踐呢個聖經原則並作出必要嘅調整，就可以使自己内心享有平安，同耶和華及其他人保持和睦嘅關係。
佢哋點樣揾到恆久嘅和平
喺今日嘅基督徒會衆，一啲曾經“容易發怒嘅人”而家喺待人方面變得更加温和體貼、耐心仁慈。 *（箴言29:22）請留意兩個傳道員點樣得到幫助，克服脾氣暴躁嘅缺點，而且同其他人建立和睦嘅關係。
實踐聖經原則；向耶和華禱告，祈求佢賜聖靈幫助我哋同其他人和睦相處
戴維嘅壞品格影響佢嘅講話方式。喺獻身俾耶和華之前，佢經常挑剔其他人，而且對家人講話尖酸刻薄。戴維睇出自己需要作出改變，經過努力之後，佢慢慢學識同其他人和睦相處。點解佢能够培養出和平呢種特質？佢話：“我喺生活上努力實踐聖經原則，結果我同家人更加彼此尊重。”
瑞秋嘅成長背景影響佢嘅行為態度。佢話：“我嘅家人經常嘈交。因為喺噉樣嘅家庭環境長大，即使而家我仲係要控制自己暴躁嘅脾氣。”乜嘢幫助佢變得更加平和？佢回答話：“不斷禱告，信賴耶和華。”
戴維同瑞秋嘅例子表明，如果我哋實踐聖經原則並倚靠上帝嘅聖靈，就能够結出和平嘅果實。就算生活喺一個充滿敵意嘅世界，我哋都可以得享内心安寧。呢種和平有助於我哋同家人、弟兄姊妹和睦共處。除此之外，耶和華亦都鼓勵我哋“要盡力同所有人和睦相處”。（羅馬書12:18）有冇可能做到？我哋再嚟睇吓，努力促進和睦會帶嚟乜嘢益處。
追求和睦
我哋向地區嘅人傳道，就係幫助人從上帝王國嘅和平信息得益。（以賽亞書9:6,7；馬太福音24:14）令人開心嘅係，好多人都作出響應。佢哋接受真理之後，對周圍所發生嘅事唔再感到絶望或者憤怒，反而對未來嘅真正希望懷有信心，並且受推動去“尋求和睦，追求不已”。（詩篇34:14）
不過，唔係所有人一開始就會馬上接受我哋傳講嘅信息。（約翰福音3:19）即使係噉，我哋都得到上帝聖靈嘅幫助，用平和、尊重嘅態度向人傳講好消息。我哋噉樣做就係聽從耶穌喺傳道工作上嘅教導。馬太福音10:11-13記錄咗耶穌所講嘅：“你哋入嗰一家嘅時候，要向家裏嘅人問好。嗰一家如果係配得嘅，就願你哋所求嘅平安臨到佢哋；如果係唔配得嘅，就願你哋所求嘅平安歸於你哋。”我哋按照耶穌嘅指引去做，離開嘅時候内心依然可以保持平和，同時期望對方將來會接受好消息。
我哋以尊重嘅態度對待政府官員，包括嗰啲反對我哋工作嘅人，就可以促進和睦。例如喺非洲某個國家，政府因為偏見而唔准我哋建造王國聚會所。為咗以和平嘅方式解決呢個問題，一個曾經喺非洲做過特派傳道員嘅弟兄受委派去見呢個國家駐英國倫敦嘅大使。弟兄想同大使説明，耶和華見證人喺佢國家嘅工作。呢次拜訪嘅結果點樣呢？
弟兄話：“去到前台嗰陣，我從接待員嘅衣着睇出佢屬於某個部族。我學過佢嘅語言，於是就用佢嘅母語同佢打招呼。佢覺得好驚訝，就問我：‘你嚟呢度有乜嘢事？’我禮貌噉話俾佢知，我想同大使見面。佢打電話俾大使，之後大使就出嚟見我，用佢嘅語言同我打招呼。佢認真噉聽我講述有關見證人嘅和平活動。”
弟兄以尊重嘅態度向呢位大使作出解釋，消除咗佢對我哋工作嘅誤解同偏見。一段時間之後，呢個非洲國家嘅政府批准咗見證人嘅建築申請。事情以和平嘅方式得到解決，弟兄真係感到好開心！尊重待人的確帶嚟好多益處，包括和平。
永遠享有和平
今日，耶和華嘅子民喺屬靈樂園享有真正嘅和平。你喺生活上努力培養和平呢種特質，就可以得享更多平安。最重要嘅係，你會得到耶和華嘅悦納，喺上帝嘅新世界得到豐富同恆久嘅和平。（彼得後書3:13,14）
^ 13段 “聖靈嘅果實”系列文章將會喺日後討論仁慈呢種特質。
