Pa huayacaláʼdxiluʼ guinaazeluʼ ti bialazi, zudiiluʼ cuenta nagana para guinaaze binni laame. Cumu guizáʼ nagueenda ca manihuiiniʼ riʼ la? nga racané laacame cadi chuʼ tu guinaazeʼ laacame nagueenda.

 Ca científicu gúnnacaʼ nuu ti tipu de bialazi ni ró cuananaxhi, laacame randa rieequecame cásica runi ti avión de guerra, peru jma nagueenda. Profesor Michael Dickinson guníʼ dede ora gálecame maca nánnacame guipápacame. Ne laaca guniʼbe: Casi ñaca niguʼnu ti baʼduhuiiniʼ ndaaniʼ ti cabina stiʼ ti avión de guerra ne ñanna nusani.

 Ca investigador ca biʼniʼ grabarcaʼ modo rieequeʼ ca bialazi riʼ, ne gúnnacabe runiibi xhiaacame 200 biaje lu ti segundu. Ne ti biaje si quibi xhiaacame randa runi dirigírcame xcuérpucame ne guxooñelúcame.

 ¿Yanna pabiáʼ rindaa para guxooñecame yaʼ? Ca investigador ca nacaʼ, ora riuu ca manihuiiniʼ riʼ lu peligru riniibicame 50 biaje jma nagueenda que ora quiñelaga ti binni. Profesor Dickinson bisiene: «Guizáʼ nagueenda rieequeʼ ca bialazi riʼ, ne qué rindaa para gánnacame paraa nuu peligru ne paladu qué zácacame gastiʼ».

 ¿Ximodo randa rúnicame guiráʼ ndiʼ, neca nahuiiniʼ cerebru stícame yaʼ? Ti misterio ni, peru ca investigador ca racaláʼdxicaʼ gánnacaʼ de laani.

 ¿Xi rábiluʼ yaʼ? Modo rieequeʼ ca bialazi ni ró cuananaxhi, beeda gaca ni pur evolución la? o guyuu tu bizáʼ laacame.