Lu Biblia zadxélanu stale prueba ni rusihuinni dxandíʼ nuu Dios. Laaca rusiidini, para gápanu fe nabé risaca «iquiiñenu xquendabiaaninu» ti cadi gúninu ni runi ca religión falsu (1 Juan 5:20; Romanos 12:1). Guidúʼyanu caadxi cosa zeeda lu Biblia ni rusihuinni dxandíʼ nuu Dios.

•   Pur modo nexheʼ chaahuiʼ universu ne modo guyáʼ guendanabani rusihuinni ni nuu tu bizáʼ ni. Biblia ná: «Guiráʼ yoo nuu tu bicuí laa, peru ni bizáʼ guiráʼ xixé cosa nga Dios» (Hebreos 3:4). Neca nabé senciu ca diidxaʼ riʼ la? stale binni preparadu maʼ guníʼ biaʼsi ni. a

•   Guiráʼ binni ruyubi xi guni né xquendanabani ne ora qué guidxélacabe xi gúnicabe qué ribánicabe nayecheʼ. Ribani binni nayecheʼ ora napa guiráʼ ni caquiiñeʼ peru ribánicabe jma galán ora runibiáʼcabe Dios ne rúnicabe ni nabe (Mateo 5:3; Apocalipsis 4:11). Ora runi binni guiráʼ ni bizéʼtenu riʼ, rudiicaʼ cuenta dxandíʼ nuu ti Dios de guendarannaxhii, nga runi, laaca rannaxhiinu ne riuʼnu nayecheʼ (Mateo 4:4).

•   Stale de ca profecía zeeda lu Biblia, guca cumplir ca ni casi peʼ modo gucuá ca ni, nga rusihuinni cadi binni diʼ bicaa ca ni, sínuque Dios (2 Pedro 1:21).

•   Ca hombre ni bicaa Biblia gúnnacaʼ stale jma que ca binni ni bibani tiempu sticaʼ. ¿Xiñee yaʼ? Purtiʼ stale binni bi’ni’ cré nuáʼ ti elefante, ti jabalí, ti toro ne xcaadxi maniʼ Guidxilayú riʼ, peru lu Biblia ná «gastiʼ naguu Dios para guáʼ Guidxilayú riʼ» (Job 26:7). Ne laaca ruzeeteʼ Biblia redondo Guidxilayú riʼ (Isaías 40:22). Stale binni ná gunda gunna ca hombre ni bicaa Biblia guiráʼ ndiʼ purtiʼ Dios peʼ nga gudxi laacabe xi gucaacabe.

•   Ricabi Biblia stale pregunta ni runi binni ni qué runi cré Dios, casi pa nacha’hui’ ne napa Dios poder, ¿xiñee nuu stale cosa malu ne cayuni sufrir binni yaʼ? ¿Xiñee huayaca ca religión ca ti problema para binni? (Tito 1:16). Ra gánnaluʼ respuesta stiʼ ca pregunta riʼ ne xcaadxi, zacané ca ni lii guni creluʼ dxandíʼ nuu Dios.