Coʼ, qué rusiidiʼ Biblia María nga jñaa Dios ne laaca qué riníʼ diʼ ni caquiiñeʼ guni adorar ca cristianu laabe. a Guníʼ ique ndiʼ:

•   Qué lica niníʼ María pa laa nga jñaa Dios. Biblia rusiene gúpabe «Xiiñiʼ Dios ni nuu guibáʼ» o «Xiiñiʼ Dios» ne cadi Dios diʼ (Lucas 1:32, 35).

•   Qué lica niníʼ Jesucristu María nga jñaa Dios ne laaca qué niniʼbe naquiiñeʼ gaca adorar María. Ora bisisaca ti gunaa María pur privilegiu gupa pur naca jñaa Jesús la? laabe gúdxibe laa: «Jma dichoso cani ucaa diaga stiidxa Dios ne guni ni na ni» (Lucas 11:27, 28).

•   Ca diidxaʼ «jñaa Dios» ne Theotokos diidxaʼ griegu ni riníʼ («laabe gúpabe Dios») cadi zeeda diʼ ni lu Biblia.

•   Diidxaʼ «gunaa ni runi mandar guibáʼ» zeeda ni lu Biblia, peru cadi caníʼ diʼ ni de María, sínuque de ti diosa ni cadi dxandíʼ ni biʼniʼ adorar ca israelita ni bidxiideche Dios dxiqué (Jeremías 44:15-19). Zándaca «gunaa ni runi mandar guibáʼ» que nga Istar (Astarté), ti diosa de Babilonia.

•   Ca primé xpinni Cristu qué ñuni adorarcaʼ María ne qué nusisácacaʼ laabe. Ti historiador guníʼ, «qué ñuni adorar ca xpinni Cristu que María, zándaca bidxíbicabe niníʼ ique binni cayuni adorárcabe laa casi ñaca ti diosa ni cadi dxandíʼ». In Quest of the Jewish Mary

•   Biblia ná maca nuu Dios (Salmo 90:1, 2; 93:2). Cumu qué gápabe ra bizulú xquendanabánibe la? nga riníʼ qué ñápabe ti jñaabe. Ne qué ñanda ñuu Dios ndaaniʼ matriz stiʼ María, purtiʼ Biblia ná: «Pa nin guibáʼ ca, neca naroʼbaʼ ni, qué rudiini para lii» (1 Reyes 8:27).

Guca María jñaa Jesús, cadi jñaa Dios

 Dede gule María naca judía ne zabe de familia stiʼ rey David (Lucas 3:23-31). Nabé guyuulaʼdxiʼ Dios modo laabe pur fe ni gúpabe ne pur modo biʼniʼ adorarbe laa (Lucas 1:28). Gulí Dios laabe para gácabe jñaa Jesús (Lucas 1:31, 35). Despué gupanebe xheelabe, José, xcaadxi xiiñicabe (Marcos 6:3).

 Biblia ná guca María tobi de ca xpinni Jesús, peru qué riníʼ diʼ ni stale cosa de laabe (Hechos 1:14).