Qué rusiidiʼ diʼ Biblia naquiiñeʼ guni orarnu ca bidóʼ ca. Caquiiñeʼ guni orarnu Dios si ne gúninu ni lu lá Jesús. Laabe gúdxibe ca discípulo stibe: Naquiiñeʼ guni orartu sicaríʼ: «Bixhózedu ni nuu guibáʼ, guisácapeʼ laluʼ» (Mateo 6:9). Qué niníʼ diʼ Jesús naquiiñeʼ guni adorarnu ti bidóʼ, ti ángel o sti binni, sínuque Dios si.

 Jesucristu laaca guníʼ:« Naa nga neza ca, ne rusiide ni dxandíʼ ne rudiee enda nabani ni qué zaluxe. Iruti zie ra nuu Bixhoze pa cadi pur naa» (Juan 14:6). Jesús si nga napa derechu para guiníʼ pur laanu nezalú Dios (Hebreos 7:25).

¿Ñee zanda guni orarnu Dios ne laaca guni orarnu ca bidóʼ ca la?

 Lu tobi de ca Chii Mandamientu que, guníʼ Dios: «Purtiʼ naa Jehová Dios stiluʼ, nacaʼ ti Dios ni rinabaʼ guni adorárcabe laa si» (Éxodo 20:5). ¿Ximodo nga rinabaʼ Dios guni adorárcabe laa si yaʼ? Ti nota ni zeeda lu Biblia de América cusiene versículo ca sicaríʼ: «Laabe nga tobi lucha Dios [...] nin ti bidóʼ qué ziuu lugar stibe». Dios rinabaʼ guni adorarnu laa si, ne tobi de ca modo rúninu ni nga ora runi orarnu laabe (Isaías 48:11).

 Pa guni orarnu bidóʼ, tuuxa ángel o tutiica laa la? zuninanu ladxidóʼ Dios. Libru stiʼ Apocalipsis (Revelación) ná ora biaba apóstol Juan xañee ti ángel para guni adorarbe laa, ná ángel que rabi laabe: «Cadi guʼnu nga. Naa laca rune xhiiña Dios casi ruʼnuʼ, lii ne ca xcaadxi hermanu stiuʼ ni qué riree chu lu stiidxa Jesús. Bisisaca Dios» (Apocalipsis 19:10).