Gatigá ruzeeteʼ Biblia Jesús nga «Xiiñiʼ Dios» (Juan 1:49). Diidxaʼ «Xiiñiʼ Dios» riniʼni Dios nga bizáʼ guiráʼ ni nuu ne laa nga rudii guendanabani, ne ndiʼ riníʼ Dios nga bizáʼ Jesús (Salmo 36:9; Apocalipsis 4:11). Biblia ruzeeteʼ Dios qué rapa diʼ xiiñiʼ casi rapa binni xiiñiʼ ndaaniʼ guidxilayú.

 Laaca ruzeeteʼ Biblia zeeda gaca ca ángel xiiñiʼ Dios ni dxandíʼ (Job 1:6). Laaca ruzeeteni beeda gaca Adán «xiiñiʼ Dios» (Lucas 3:38). Peru lu Biblia riete Jesús nga xiiñiʼ Dios ni jma risaca purtiʼ laabe bizáʼ Dios primé.

•  ¿Ñee maca guyuu Jesús guibáʼ ante gale lu Guidxilayú riʼ la?

•  ¿Xi biʼniʼ Jesús dxi guyuu guibáʼ ante gueeda lu Guidxilayú?

 Maca. Ante gale Jesús ndaaniʼ Guidxilayú riʼ, gúcabe ti ángel guibáʼ. Ne laapebe guniʼbe: «Bieteʼ de guibáʼ» (Juan 6:38; 8:23).

 Jesús nga primé ni bizáʼ Dios. Sicaríʼ riníʼ Biblia de Jesús:

•   Laabe nga «ni bizáʼ Dios primé lade guiráʼ cosa» (Colosenses 1:15).

•   Laabe nga «ni bizáʼ Dios primé lade guiráʼ cosa» (Apocalipsis 3:14).

 Guca cumplir ti profecía luguiáʼ Jesús ni caníʼ de tuuxa ni maca xadxí de nuu, maʼ raca stale peʼ iza (Miqueas 5:2; Mateo 2:4-6).

 Gúpabe ti puestu nabé risaca guibáʼ. Sicaríʼ guníʼ Jesús de puestu ni gupa guibáʼ ora gudxi Dios ca diidxaʼ riʼ: «Bixhozeʼ, bisisaca naa cueʼluʼ, cásica bisacaʼ cueʼluʼ ante chaʼ binni guidxilayú» (Juan 17:5).

 Gucanebe Bixhózebe para guyáʼ guiráʼ cosa. Biʼniʼ Jesús dxiiñaʼ né Dios «casi ti maestru de obra» (Proverbios 8:30). Ne sicaríʼ riníʼ Biblia de Jesús: «Pur mediu de laabe guyáʼ xcaadxi cosa ni nuu guibáʼ ne ni nuu lu guidxilayú» (Colosenses 1:16).

 Biquiiñeʼ Dios Jesús para guzáʼ guiráʼ cosa, casi ca ángel zaqueca universu (Apocalipsis 5:11). Zanda guininu beeda gaca Dios ne Jesús casi ti arquitectu ne ti binni ni rucuí yoo. Arquitectu ca runi diseñu stiʼ yoo ca ne constructor ca rucuí ni.

 Beeda gácabe Diidxaʼ. Ante gueeda Jesús lu Guidxilayú, Biblia ruzeeteʼ laabe nga «Diidxaʼ» (Juan 1:1). Ndiʼ riníʼ biquiiñeʼ Dios xiiñiʼ para gabi ca ángel ni nuu guibáʼ xi gúnicaʼ.

 Laaca biquiiñeʼ Dios Jesús para guiniʼné binni. Zándaca biquiiñeʼ Jehová Diidxaʼ o Jesús para gabi Adán ne Eva xi gúnicaʼ ndaaniʼ jardín de Edén (Génesis 2:16, 17). Zándaca Jesús nga ángel ni gucané ca israelita dxi guzacaʼ lu desiertu ne zándaca laca laabe nga voz ni gudxi Dios ca israelita guzuubacaʼ stiidxaʼ (Éxodo 23:20-23). a