Ni rusiidiʼ Biblia

 Chúʼnisa tuuxa riníʼ ni guiaaziʼ guidubi nácabe ndaaniʼ nisa ne guireebe sti biaje. a Lu Biblia riete guyuunisa stale binni (Hechos 2:41). Ne tobi de laacabe nga Jesús, ni guyuunisa ndaaniʼ guiiguʼ Jordán (Mateo 3:13, 16). Despué guyuunisa ti etíope «ti lugar ra daʼ nisa» neza ra zidíʼdicaʼ (Hechos 8:36-40).

 Jesús bisiidiʼ pa tuuxa racalaʼdxiʼ gaca discípulo stiʼ naquiiñeʼ chúʼnisa (Mateo 28:19, 20). Ne apóstol Pedro guníʼ dxandíʼ ni (1 Pedro 3:21).

Lu artículo riʼ zadúʼyanu:

•  ¿Xi riníʼ chúʼnisa binni?

•  ¿Ñee rusiidiʼ Biblia naquiiñeʼ chúʼnisa ca baʼduhuiiniʼ ca la?

•  ¿Xi riníʼ chuʼnísacabe lu lá Dios, lu lá Xiiñiʼ ne lu lá espíritu santu yaʼ?

•  ¿Ñee malu nga chúʼnisa binni sti biaje la?

•  Lu Biblia riete de xcaadxi binni ni guyuunisa

•  Caadxi cosa ni cadi jneza runi cré binni

 ¿Xi riníʼ chúʼnisa binni?

 Chúʼnisa tuuxa riníʼ ni gusihuínnibe nezalú binni maʼ guca arrepentirbe de ca pecadu stibe ne maʼ biʼniʼ prometerbe Dios zúnibe ni ná neca guidxagalube guendanagana. Ndiʼ riníʼ zuzuubabe stiidxaʼ Dios ne stiidxaʼ Jesús lu guiráʼ ni gúnibe ne ndiʼ nga primé ni naquiiñeʼ gúnibe para ugaandabe guendanabani ni qué zaluxe.

 Guiaaziʼ tuuxa ndaaniʼ nisa riníʼ ni maʼ bichaa modo nabani. Ne Biblia ruchaaga ora chúʼnisa tuuxa zeeda gácani casi ora nucaachicabe laa (Romanos 6:4; Colosenses 2:12). Ora riuunisa ti binni la? casi xa ora ñati ne nibani sti biaje purtiʼ rusaana modo guca dxiqué ne maʼ ribani para guni ni ná Dios casi ti xpinni Cristu.

 ¿Ñee rusiidiʼ Biblia naquiiñeʼ chúʼnisa ca baʼduhuiiniʼ ca la?

 Qué rusiidiʼ Biblia naquiiñeʼ chúʼnisa ca baʼduhuiiniʼ ca. b Ni rusiidiʼ Biblia nga ante chúʼnisa tuuxa naquiiñeʼ guni caadxi cosa. Primeca naquiiñeʼ gánnabe ca cosa ni zeeda lu Biblia ne chinándabe ca ni. Laaca naquiiñeʼ gaca arrepentirbe ne gusaanabe modo gúcabe dxiqué. Ne gúnibe ti oración de guidubi ladxidoʼbe ra gudiibe xquendanabánibe Dios (Hechos 2:38, 41; 8:12). Peru ndiʼ qué zanda guni ca baʼduhuiiniʼ ne ca xcuidihuiiniʼ ni.

¿Xi riníʼ chuʼnísacabe lu lá Dios, lu lá Xiiñiʼ ne lu lá espíritu santu yaʼ?

  Gudxi Jesús ca discípulo stiʼ: «Lagacané binni de guiráʼ guidxi gaca discípulo stinneʼ. Lacuunisa laacaʼ lu lá Bixhozeʼ, lu lá Xiiñiʼ ne lu lá espíritu santu (Mateo 28:19, 20). Chúʼnisa tuuxa lu lá riníʼ ni guni crebe napa Jehová ne Jesús autoridad ne laasicaʼ nga nápacaʼ derechu de gudiicaʼ espíritu santu. Ti biaje dxi chigusianda apóstol Pedro ñee ti hombre nachiitaʼ dede dxi gule gúdxibe laa pur lá. Sicaríʼ guniʼbe: «¡Pur lá Jesucristu cayabeʼ lii, guzá!» (Hechos 3:6). ¿Xiñee guniʼbe zaqué yaʼ? Purtiʼ nánnabe napa Jesús autoridad para guni milagru que ne racaláʼdxibe Jesús nga guisaca pur milagru ni chigúnibe que.

•   «Bixhozeʼ» caniʼni de Jehová c Dios. Laabe nga bizaʼbe laanu ne cudiibe laanu guendanabani ne laabe nga ni jma napa poder. Ne ni jma napa autoridad (Génesis 17:1; Apocalipsis 4:11).

•   «Xiiñiʼ» caniʼni de Jesucristu ni bidii xpida pur laanu (Romanos 6:23). Para ganda guilanu caquiiñeʼ guni crenu Jesús nga ni maʼ gulí Jehová para gudii laanu guendanabani ni qué zaluxe (Juan 14:6; 20:31; Hechos 4:8-12).

•   «Espíritu santu» caniʼni de stipa stiʼ Dios ne laani nga riquiiñebe para gúnibe intiica cosa gacaláʼdxibe. d Biquiiñeʼ Dios espíritu santu stiʼ para guzáʼ guiráʼ cosa ne gudii guendanabani ne laaca biquiiñebe ni para guiníʼnebe ca profeta stibe ne xcaadxi binni. Ne para gudiibe laaca poder gúnicaʼ ni racaláʼdxibe (Génesis 1:2; Job 33:4; Romanos 15:18, 19). Ne laaca biquiiñebe ni para gábibe caadxi hombre xii nga ni racaláʼdxibe ne gucaacaʼ ni lu Biblia (2 Pedro 1:21).

¿Ñee malu nga chúʼnisa binni sti biaje la?

  Nuu stale binni maʼ bichaa de religión. Peru pa maʼ guyuunísacabe, ¿ñee malu nga chuʼnísacabe sti biaje la? Nuu tu ná malu ni, zándaca pur modo riénecabe Efesios 4:5 ra ná: «Ti Señor si nuu, ti fe si ne ti bautismo si». Peru cadi caníʼ diʼ versículo riʼ qué zanda chúʼnisa binni sti biaje. ¿Xi caniʼni ya?

 Guidúʼyanu contextu stini. Pa guiduʼyaʼ chaahuinu contextu stiʼ Efesios 4:5 riʼ la? raríʼ caníʼ apóstol Pablo pabiáʼ risaca chuʼnu tobi. Ca ni dxandíʼ xpinni Cristu tobi si ni naquiiñeʼ guni crecaʼ (Efesios 4:1-3, 16). Ne zanda chuʼnu tobi si pa ngueca Dios runi adorarnu ne pa ngueca fe nápanu, ndiʼ riníʼ pa ngueca si riénenu ni cá lu Biblia. Ne pa guiráʼ rinanda ni cá lu ni para ganda chúʼnisa.

 Ne ti biaje gudxi apóstol Pablo caadxi binni zanda chuʼnísacaʼ stiʼ biaje neca maʼ guyuunísacaʼ. Purtiʼ ca binni riʼ guyuunísacabe sin guiénecabe ca cosa ni naquiiñeʼ ganna ca xpinni Cristu (Hechos 19:1-5).

 Chúʼnisa tuuxa de dxandíʼ peʼ. Para ganda chúʼnisa tuuxa modo rinabaʼ Dios la? naquiiñeʼ guiziidiʼ chaahuibe ni rusiidiʼ Biblia (1 Timoteo 2:3, 4). Peru pa tuuxa chúʼnisa ne cadi jneza modo bisiidicabe laa ni zeeda lu Biblia la? para Dios qué risaca diʼ ni (Juan 4:23, 24). Zándaca binni riʼ guyuunisa de interu ladxidóʼ peru cadi «casi peʼ» modo rinabaʼ Dios (Romanos 10:2). Caquiiñeʼ guiziidibe ni dxandíʼ peʼ rusiidiʼ Biblia, gúnibe ni caziidibe, gudiibe xquendanabánibe Dios ne chúʼnisabe sti biaje. Nga runi cadi cucheedibe nga chúʼnisabe sti biaje purtiʼ nga nga ni jma jneza gúnibe.

Lu Biblia riete de xcaadxi binni ni guyuunisa

  Lu Biblia riete xcaadxi modo guyuunisa binni de modo guluunisa ca xpinni Cristu. Guidúʼyanu caadxi de laacani:

 Modo guluunisa Juan Bautista. e Dxiqué ora cheʼ ti judíu o tuuxa binni de sti guidxi ni beeda gaca judíu ra nuu Juan para chúʼnisa, rúnibe ni purtiʼ maʼ guca arrepentirbe de guiráʼ ra bicheenebe Ley stiʼ Moisés (Ley ni bidii Jehová Moisés para ca israelita). Ra guluunisa Juan laacabe que gucané ni laacabe para chúʼcabe listu ora guedandá Mesías que, Jesús de Nazaret (Lucas 1:13-17; 3:2, 3; Hechos 19:4).

 Modo guyuunisa Jesús. Juan Bautista nga guluunisa Jesús, peru maʼ gadxé ni que modo guluunísabe xcaadxi binni. ¿Xiñee maʼ gadxé ni yaʼ? Purtiʼ Jesús naca ti hombre perfectu ne qué nuchee (1 Pedro 2:21, 22). Nga runi cadi guyuunisa diʼ Jesús purtiʼ maʼ guca arrepentir de ca pecadu stiʼ o para guinábabe Dios gudii laabe «ti conciencia nayá» (1 Pedro 3:21). Sínuque guyuunísabe para gúnibe ni ná Dios casi maca nexheʼ guni Mesías que o Cristu. Ne gudiibe xquendanabánibe pur laanu (Hebreos 10:7-10).

 Chúʼnisa tuuxa né espíritu santu. Cásica Juan ne Jesús guníʼcabe ziuu binni ni ziuunisa né espíritu santu (Mateo 3:11; Lucas 3:16; Hechos 1:1-5). Maʼ gadxé ni qué chuʼnísacabe lu lá espíritu santu (Mateo 28:19). ¿Xiñee maʼ gadxé ni yaʼ?

 Maʼ gadxé ni purtiʼ cadi stale binni nga ziuunisa né espíritu santu. Ne maʼ bibícabe né espíritu santu para chécabe guibáʼ ne guni mandarnécabe Jesús casi rey ne sacerdote lu Guidxilayú  f (1 Pedro 1:3, 4; Apocalipsis 5:9, 10). ¿Tu laa chiguni mandárcabe yaʼ? Guiráʼ ca xpinni Cristu ni chiguibani lu Guidxilayú riʼ ora maʼ nácani ti paraísu (Mateo 5:5; Lucas 23:43).

 Ca ni riuunisa tobi si né Cristu Jesús ne lu guendaguti stibe. Ca ni riuunisa tobi si né espíritu santu laaca riuunísacabe «tobi si né Cristu Jesús» (Romanos 6:3) Ne sicaríʼ nga riuunisa ca xpinni Cristu ni maʼ bibí para guni mandárnecaʼ Cristu guibáʼ. Ne ora maʼ guyuunísacabe tobi si né Cristu reeda gácacabe parte de ca ni maʼ bibí: Cristu nga xaíque stícabe ne laacabe nga cuerpu stibe (1 Corintios 12:12, 13, 27; Colosenses 1:18).

 Ca xpinni Cristu ni bibí laaca guyuunísacabe lu guendaguti stiʼ Cristu (Romanos 6:3, 4). Nácacabe casi Jesús purtiʼ rúnicabe stale sacrificiu lu xquendanabánicabe ne ruzuubacabe stiidxaʼ Dios. Ne laaca qué riníʼ íquecabe esperanza de guibánicabe ndaaniʼ Guidxilayú riʼ. Bautismo simbólico riʼ rizaa ni ora gáticabe ne guiásacabe né ti cuerpu de espíritu para chécabe guibáʼ (Romanos 6:5; 1 Corintios 15:42-44).

 Ca ni riuunisa né bele. Juan Bautista guníʼ: «Laa [Jesús] zaguunisa laatu né espíritu santu né bele. Naazebe pala ni riguibinebe biidxiʼ ne zusiá chaahuibe ra riguíbibe biidxiʼ. Zutópabe trigu stibe ne zuchabe ni ndaaniʼ troja, peru zucaaguibe guixi stini né bele ni qué ziuu dxi guizuíʼ» (Mateo 3:11, 12). Ca diidxaʼ riʼ cusiene ni gadxé nga chúʼnisa tuuxa né espíritu santu ne gadxé nga chúʼnisa né bele. ¿Ximodo zanda guiénenu ni guníʼ Juan riʼ yaʼ?

 Trigu ca nga zeeda gaca ca xpinni Cristu ni ruzuubaʼ stiidxaʼ Jesús ne rúnicaʼ ni nabe. Ne zanda chuʼnísacabe né espíritu santu. Ne guixi ca nga zeeda gaca ca binni ni qué ruzuubaʼ stiidxaʼ Jesús. Laacabe nga ziuunísacabe né bele, ni riníʼ ni nga zanitilúcabe para siempre (Mateo 3:7-12; Lucas 3:16, 17).