Primé carta para Timoteo 5:1-25
5 Cadi gácaluʼ naduxhuʼ né ti hombre ni maʼ huaniisi, sínuque guniʼné laa casi ora niníʼneluʼ bixhózeluʼ; ne ca hombre ni jma nahuiiniʼ la? biiyaʼ laacaʼ casi bíʼchiluʼ.
2 Ne ca gunaa ni maʼ huaniisi la? biiyaʼ laacaʼ casi jñaaluʼ; ne ca gunaa ni jma nahuiiniʼ la? biiyaʼ laacaʼ casi bizáʼnaluʼ, peru sin guiníʼ íqueluʼ sti cosa de laacaʼ.*
3 Biʼniʼ respetar* ne gupa ca viuda, ca ni dxandíʼ viuda laa.*
4 Peru pa napa ti viuda xiiñiʼ o nietu la? primeru naquiiñeʼ guiziidiʼ ca xiiñibe ne ca xniétube gápacaʼ familia sticaʼ ne gudiicaʼ ni caquiiñeʼ bixhózecaʼ ne jñaacaʼ, bixhozebiidacaʼ ne jñaabiidacaʼ, zacá zusihuínnicaʼ nabánicaʼ modo ná Dios,* ne jneza ruuyaʼ Dios gúnicaʼ zacá.
5 Ni dxandíʼ viuda laa ne maʼ qué gapa gastiʼ la? maʼ lu náʼ Dios nga naguixhe esperanza stiʼ ne qué rusaana de guni rogar Dios ne qué rusaana de guni orar ridxíʼ ne huaxhinni.
6 Peru viuda ni nabani para guni ni ná ca deseu stiʼ la?* casi ñaca maʼ guti neca nabani.
7 Gudxi guirácabe gúnicabe ni cayabeʼ lii riʼ* ti cadi chuʼ tu guiníʼ mal de laacabe.
8 Pa nuu tuuxa cadi cudii ni iquiiñeʼ familia stiʼ, ne jmaruʼ si pa qué gudii ni iquiiñeʼ ca ni nabeza ndaaniʼ lidxi la? maʼ bixeleʼ de ni runi crenu* ne jma pior laa que ti binni ni qué gapa fe.
9 Lu lista ra ricá lá* ca viuda la? lagucaa lá ca viuda si ni maʼ bisaa 60 iza, ni qué ñapa sti hombre laga nabani xheelaʼ.
10 Biiyaʼ pa runibiáʼ binni laacabe pur ca cosa galán ni bíʼnicabe, pa jneza bisiniisicabe ca xiiñicabe, pa bidxagalúcabe binni ra lídxicabe,* pa gudiibicabe ñee ca xpinni Dios,* pa gucanécabe ca ni cayuni sufrir ne pa biʼnirúcabe xcaadxi cosa galán.
11 Peru cadi gucaaluʼ lá* ca viuda ni jma nahuiiniʼ lu lista, purtiʼ ora gudiicabe lugar cubayú ca deseu sexual ca laacabe la? zachaganácabe, ne pur nga maʼ qué zúnicabe xhiiñaʼ Cristu.
12 Ne zaca juzgárcabe purtiʼ maʼ qué ñuni cumplírcabe né promesa ni maca bíʼnicabe.
13 Ne cadi ngasi, riaacabe puru si enda floja ne maʼ canazácabe ra lidxi binni. Ne cadi enda floja si maʼ canazanécabe, sínuque rácacabe chismosa ne riuucabe lu xpida binni ne riníʼcabe cosa ni qué runi deber guiníʼcabe.
14 Nga runi racalaʼdxeʼ guichaganáʼ ca viuda ni jma nahuiiniʼ, gápacaʼ xiiñicaʼ ne gápacaʼ ra lídxicaʼ, ti cadi gapa ca ni rucaalú laanu razón para guni criticarcaʼ laanu.
15 Purtiʼ maʼ bixeleʼ chupa chonna de ca viuda riʼ de lu neza stiʼ Dios, ne maʼ zinándacaʼ Binidxabaʼ.
16 Pa nuu ti hermana napa ti pariente viuda la? naquiiñeʼ gacanebe viuda riʼ ti cadi gaca ti carga para congregación, ne zacá maʼ zanda gacané congregación ca ni dxandíʼ viuda laa.*
17 Naquiiñeʼ guni respetartu* ca ancianu de guidubi ladxidoʼto, purtiʼ jneza modo cayúnicaʼ dxiiñaʼ ndaaniʼ congregación,* jmaruʼ si ca ni cayuni dxiiñaʼ nadipaʼ para guiniʼcaʼ ne gusiidicaʼ de stiidxaʼ Dios.
18 Purtiʼ lu Stiidxaʼ Dios ná: «Cadi cuʼluʼ guixhexii* ruaa buey ora maʼ cayutuñee trigu». Ne laaca nani: «Runi merecer ti trabajador guiaxa».
19 Cadi casi zeluʼ guni creluʼ ora cúʼcabe xqueja ti hombre ni maʼ huaniisi,* pa gastiʼ testimonio stiʼ chupa o chonna testigu.
20 Pa cuchee tuuxa la? guníʼ paraa cucheebe* nezalú guiráʼ binni, ti guidxibi xcaadxi.
21 Nezalú Dios ne Cristu Jesús ne nezalú ca ángel ni gulí, canabaʼ lii guʼnuʼ guiráʼ ni cayabeʼ lii riʼ, ne ora guʼnuʼ ni la? biʼniʼ ni sin guni juzgarluʼ binni dede ante ne biʼniʼ tratar binni igual.*
22 Cadi nagueendaca quixhenaluʼ luguiáʼ ti hermanu para guni nombrarluʼ laa. Ne cadi gácaluʼ cómplice de pecadu stiʼ stobi. Biʼniʼ ni jneza.*
23 Cumu nabé raca huará ndaaniluʼ la?* maʼ cadi gueluʼ nisa si, sínuque güeʼ caadxi vinu.
24 Nuu binni rihuinni paraa cuchee ne nagueenda raca juzgar, peru nuu xcaadxi la? maʼ despué nga rihuinni paraa cucheecaʼ.
25 Laaca rihuinni ca cosa galán ni runi ti binni, ne neca qué rihuínnicani yanna la? qué zanda diʼ guiaanacani nagaʼchiʼ.
Nota
^ O «biiyaʼ laacaʼ né castidad».
^ O «honrar».
^ O «ca ni dxandíʼ cadiʼdiʼ lu necesidad». Raríʼ caniʼbe de ti viuda ni qué gapa tu guni mantener laa.
^ Raríʼ la? zándaca caniʼbe de ca deseu sexual.
^ O «ni ná ca mandatu riʼ».
^ O «maʼ biʼniʼ rechazar fe».
^ O «xlá».
^ Lit. «ca santo».
^ O «pa gúcacabe hospitalaria».
^ O «xlá».
^ O «ca ni dxandíʼ cadiʼdiʼ lu necesidad». Raríʼ caniʼbe de ti viuda ni qué gapa tu guni mantener laa.
^ O «guni honrartu».
^ O «runi dirigircaʼ congregación».
^ O «bozal».
^ O «ti ancianu».
^ O «biʼniʼ censurar laa».
^ O «biʼniʼ ni sin prejuicio ne sin parcialidad».
^ O «Guca casto».
^ O «estómago stiluʼ».
