Romanos 7:1-25
7 Hermanu caʼ, (canieniaʼ ca ni runibiáʼ ley) ¿ñee qué gánnatu pa runi mandar Ley binni biaʼ dxi nabani la?
2 Casi ti gunaa ni maʼ bichaganáʼ, qué zanda guixeleʼ de xheelaʼ biaʼ dxi nabani xheelaʼ, purtiʼ nga nga ni ná ley; peru pa gatiʼ xheelaʼ gunaa riʼ la? maʼ biaanabe libre casi ná ley.
3 Pa nabániruʼ xheelabe ne guichaganabe sti hombre la? maʼ nápabe jnadxiibe ngue. Peru pa gatiʼ xheelabe la? maʼ nuube libre casi ná ley stiʼ xheelabe, ne cadi gunaa napa jnadxii laabe pa guichaganabe sti hombre.
4 Nga runi, hermanu stinneʼ caʼ, laatu laaca maʼ gútitu para Ley pur cuerpu stiʼ Cristu para gácatu stiʼ stobi, laa nga Cristu ni biasa de lade gueʼtuʼ, ti ganda gúninu ca cosa ni riuulaʼdxiʼ Dios.
5 Purtiʼ dxi bibáninu para gúninu ni ná ca deseu stiʼ cuerpu stinu,* bicuaaniʼ Ley que ca deseu stiʼ pecadu ni nuu lu cuerpu stinu para gúninu cosa ni chiné laanu lu guendaguti.
6 Peru yanna maʼ nuunu libre de Ley. Dxiqué biʼniʼ mandarni laanu, peru yanna maʼ gútinu para laani ti gácanu esclavu stiʼ Dios pur espíritu de sti modo nacubi, ne cadi casi dxi yenándanu ni ná lu libru ra cá ley.
7 Yanna, ¿xi guininu yaʼ? ¿Ñee pecadu nga Ley la? ¡Coʼ, cadi zacá diʼ ni! Pa ñaca qué ñuu Ley la? qué ñunebiaʼyaʼ pecadu. Qué ñannaʼ pa malu nga guicá ique’ gapa’ jma* pa qué ñabi Ley naa «Cadi guicá íqueluʼ gápaluʼ jma».*
8 Peru biquiiñeʼ pecadu que oportunidad ni rudii mandamientu laa, ngue runi jmaruʼ si bicaani naa guicá iqueʼ gapaʼ jma, purtiʼ ante chuʼ ley la? nuu pecadu casi ti gueʼtuʼ.
9 Guyuu tiempu bibaneʼ sin ley. Peru dxi maʼ guʼtaʼ mandamientu, bibani pecadu nuu luguiaʼyaʼ, peru naa guteʼ.
10 Ne bidieeʼ cuenta ziné mandamientu riʼ naa lu guendaguti, lugar de nineni naa lu guendanabani.
11 Purtiʼ biquiiñeʼ pecadu que oportunidad ni rudii mandamientu laa, ngue runi gudxíteni naa ne biitini naa.
12 Peru qué ruchee* Ley ne mandamientu laaca qué ruchee,* jneza ni ne nachaʼhuiʼ ni.
13 Yanna, ¿ñee zanda guuti ni nachaʼhuiʼ naa la? ¡Qué ziuu dxi! Pecadu nga biiti naa, ne zacá nga bihuinni xii nga pecadu. Peru biquiiñeʼ pecadu ni nachaʼhuiʼ para biiti naa. Ne ra gutaʼ mandamientu, bihuinni nabé runiná pecadu binni.
14 Nánnanu de Dios nga zeeda Ley, peru pecador naa* ne bitoocabe naa para gacaʼ esclavu stiʼ pecadu.
15 Purtiʼ qué gannaʼ xi runeʼ: qué runeʼ ni runeʼ desear, sínuque runeʼ ni nanaladxeʼ.
16 Peru pa runeʼ ni qué runeʼ desear la? nuaaʼ de acuerdu jneza ni cá lu Ley.
17 Peru yanna maʼ cadi naa runeʼ ni, sínuque pecadu ni nuu luguiaʼyaʼ runi ni.
18 Purtiʼ nannaʼ binni guidxilayú naa, ne gastiʼ ni nachaʼhuiʼ luguiaʼyaʼ;* neca runeʼ desear guneʼ ni jneza, peru qué randa runeʼ ni.
19 Purtiʼ qué runeʼ ca cosa galán ni runeʼ desear guneʼ, sínuque runeʼ ca cosa malu ni qué runeʼ desear.
20 Peru yanna, pa guneʼ ni qué runeʼ desear la? maʼ cadi naa runeʼ ni, sínuque pecadu ni nuu luguiaʼyaʼ runi ni.
21 Ndiʼ nga ley ni runi controlar naa: ora runeʼ desear guneʼ ni jneza, laga cosa malu maʼ zuhuaa nezaluáʼ.
22 De ndaaniʼ ladxiduáʼ riecheniaʼ ley stiʼ Dios,
23 peru ruuyaʼ nuu sti ley lu cuerpu stinneʼ* ni cadindené ley ni nuu lu xquendabiaaneʼ, ne laani nga ruseguyooni naa lu ley stiʼ pecadu ni nuu lu cuerpu stinneʼ.*
24 ¡Aque naná nuaaʼ xa! Yanna, ¿tuu ndiʼ zanda gulá naa de cuerpu ni cayati riʼ yaʼ?
25 ¡Rudieeʼ xquixe peʼ Dios pur Jesucristu Señor stinu! Ndiʼ nga laani: né xquendabiaaneʼ la? nacaʼ esclavu lu ley stiʼ Dios, peru né cuerpu stinneʼ la? nacaʼ esclavu lu ley stiʼ pecadu.
Nota
^ Lit. «ca miembru stinu».
^ O «guneʼ codiciar».
^ O «Cadi guni codiciarluʼ».
^ Lit. «santo».
^ Lit. «santo ni».
^ O «Purtiʼ nánnanu espiritual Ley, peru carnal naa».
^ Lit. «lu beela ladeʼ».
^ Lit. «lu ca miembru stinneʼ».
^ Lit. «lu ca miembru stinneʼ».
