NDAA 7
Xii nga Reinu stiʼ Dios
1. Xii nga Reinu stiʼ Dios
Xiñee zanda guininu biáʼsipeʼ Jesús nga naquiiñeʼ gaca rey (MARCOS 1:40-42)
Laani nga ti gobiernu ni nuu guibáʼ ni mayaca cuee guiráʼ ca gobiernu ni nuu yanna riʼ, ne zacaneni gaca ni na Dios lu Guidxilayú cásica rácani guibáʼ. Reinu stiʼ Dios nga gobiernu ni caquiiñeʼ binni, ne laani nga zacaneni guiráʼ binni chuʼcaʼ tobi si. Cadi dxandíʼ nabé sicarú ca diidxaʼ ca la? Biindaʼ Daniel 2:44; Mateo 6:9, 10, ne 24:14.
Ndaaniʼ cada guidxi naquiiñeʼ chuʼ tuuxa ni guni mandar. Nga runi, maʼ gulí Jiobá xiiñiʼ Jesucristu para gaca Rey lu Reinu stiʼ. Biindaʼ Apocalipsis 11:15.
Biiyaʼ videu ni láʼ Xii nga Reinu stiʼ Dios
2. Xiñee biáʼsipeʼ Jesús nga naquiiñeʼ gaca rey
Biáʼsipeʼ Xiiñiʼ Dios nga naquiiñeʼ gaca rey purtiʼ nachaʼhuiʼ ne runi ni jneza (Mateo 11:28-30). Ne nápabe poder para gacanebe binni, ne zaquiiñebe ni ora maʼ guni mandarbe Guidxilayú dede guibáʼ. Dxi biasa Jesús de lade gueʼtuʼ guyé guibáʼ para cuiʼ ladu derechu stiʼ Dios ne raqué guleza dede ora bidii Dios laa poder para guni mandar (Hebreos 10:12, 13). Despué bidii Dios poder laabe para guni mandarbe. Biindaʼ Lucas 1:32, 33.
3. Ñee ziuuruʼ tu guni mandarné Jesús la?
Biblia na ziuu ti grupu de binni ni guni mandarné Jesús. Lu Daniel 7:27 rieeteʼ lácabe ca xpinni Dios ni bibí. Ca primé binni ni gulí Dios para gaca xpinni nga ca apóstol stiʼ Jesús. Ne dede yanna cuyubi Jiobá hombre ne gunaa para gácacaʼ xpínnibe ni bibí. Cásica Jesús, ca binni ca laaca ziecaʼ guibáʼ ora gáticaʼ ne zacaacaʼ ti cuerpu de espíritu. Biindaʼ Juan 14:1-3 ne 1 Corintios 15:42-44.
Panda binni nga cheʼ guibáʼ yaʼ. Biblia riníʼ maca nexheʼ panda nga ca binni riʼ, ngue runi Jesús guníʼ nácacabe ti «grupu huiiniʼ de dendxuʼ» (Lucas 12:32). Biaʼsi 144,000 binni nga chiguni mandarnebe Guidxilayú. Biindaʼ Apocalipsis 14:1.
4. Xi bizaaca dxi guca Jesús rey
Lu iza 1914 nga guca Jesús rey ne primé ni bíʼnibe nga guládxibe Binidxabaʼ né ca demonio stiʼ de guibáʼ ne bisábabe laacaʼ lu Guidxilayú. * Cumu guizáʼ cadxiichi Binidxabaʼ la? nga runi cutiidibe binni lu stale guendanagana lu guidubi naca Guidxilayú (Apocalipsis 12:7-10, 12). Dede dxi ca zeʼ dxi jma zinitilú binni guidxilayú. Ca guendaridinde, ca xu roʼ, ca guendahuará, gubiña ni cayaca yanna cusihuínnicani cayaca ni na ti diidxaʼ riguixhená ni caníʼ maʼ qué zandaa zuni chaahuiʼ Reinu stiʼ Dios guiráʼ ni cayaca lu guidubi naca Guidxilayú. Biindaʼ Lucas 21:7, 10, 11, 31.
5. Xi cayuni Reinu stiʼ Dios yanna ne xi zúnini despué
Cumu careecheʼ diidxaʼ lu guidubi naca Guidxilayú la? cayanda cutagulisaa Reinu stiʼ Dios «jma binni» de guiráʼ guidxi. Millón de hombre ne gunaa ni nayá ladxidóʼ maʼ beeda gácacaʼ xpinni Cristu ni ruzuubaʼ diidxaʼ. Guiráʼ ca binni riʼ zalacaʼ ora gunitilú Reinu stiʼ Dios guidxilayú malu riʼ. Nga runi, pa riuuláʼdxinu guicaanu ca ndaayaʼ stiʼ Reinu riʼ la? naquiiñeʼ guzúʼbanu stiidxaʼ Jesús. Biindaʼ Apocalipsis 7:9, 14, 16, 17.
Lu ti mil iza, zuni Reinu ca ni maca gudixhe ique Dios para binni guidxilayú. Dxi ca nga zaca Guidxilayú riʼ ti paraísu, ne óraca zudxiguetaʼ Jesús Reinu ca Bixhoze (1 Corintios 15:24-26). Ñuuláʼdxiluʼ ñuíʼneluʼ tuuxa de Reinu riʼ la? Biindaʼ Salmo 37:10, 11, 29.
^ párrafo 6 Para gánnaluʼ jma de diidxaʼ riguixhená ni cuzeeteʼ de iza 1914, biiyaʼ yaza 215 dede 218 stiʼ libru Xipeʼ ndiʼ cusiidiʼ Biblia.
