DANIEL guca ti israelita ni bizuubaʼ stiidxaʼ Jiobá. Dxi nahuiinibe yenécabe laabe de esclavu ndaaniʼ guidxi Babilonia ante guinitilú Jerusalén. Neca de esclavu nga guyuunebe xcaadxi judíu ndaaniʼ guidxi Babilonia, peru gunda bíʼnicabe caadxi cosa ni gucaláʼdxicabe. Qué nusaanaʼ Dios Daniel biaʼ dxi bibani ndaaniʼ guidxi que. Dede gucané laabe guilabe ndaaniʼ ti bizé ra dxaʼ jma lión, ne biluíʼ laabe xi guiráʼ zazaaca despué. Ca diidxaʼ riguixhená jma risaca guníʼ Daniel nga de Mesías ne Reinu stiʼ.

Dxi nexheʼ gueeda Mesías. Pabiáʼ tiempu naquiiñeʼ tiidiʼ para guʼyaʼ xquidxi Dios gueeda «Mesías Xaíque que» yaʼ. Gúdxicabe Daniel zácani despué de chuʼ tu guni mandar guibiguetaʼ cuí ca lindaa stiʼ Jerusalén naquiiñeʼ tiidiʼ 69 semana de iza. Cumu ti semana stinu napa gadxe gubidxa la? pa ugábanu ni pur iza zeeda gácani ti semana de gadxe iza. Lu iza 455 ante de ca dxi stiʼ Jesús, biʼniʼ mandárcabe guibiguetaʼ cuí lindaa que, ne bizaaca nga gudiʼdiʼ si stale iza de guti Daniel. Pa de lu iza ca guzulú ugábanu 69 «semana», o 483 iza, biáʼsipeʼ zindanu lu iza 29 despué de ca dxi stiʼ Jesús. Xi guca lu iza ca yaʼ. Despué zazíʼdinu ni. Laaca gunna Daniel zuuticabe Mesías para quixe donda stiʼ guiráʼ ca binni guidxilayú (Daniel 9:24-26).

Zaca Mesías Rey guibáʼ. Daniel biiyaʼ lu ti visión zidxiña tuuxa ni zeeda gaca «casi ti xiiñiʼ binni» ra nuu trono stiʼ Dios, ne laa nga Mesías. Óraque bidii Jiobá laabe «guendaruni mandar ne guendarisaca ne reinu» ne qué ziuu dxi gusaana de guni mandarbe. Despué gunna Daniel sti cosa sicarú de Reinu stiʼ Mesías que: Rey stiʼ Reinu ca zuni mandarné ti grupu de binni ni zábicabe laacaʼ xpinni Dios (Daniel 7:13, 14, 27).

Reinu riʼ zunitilú guiráʼ ca gobiernu nuu lu guidxilayú. Dios gucané Daniel para gunda bisiene xi riníʼ bacaandaʼ ni cuchibi Nabucodonosor, rey stiʼ Babilonia que. Nabucodonosor biiyaʼ ti estatua naroʼbaʼ lu ti bacaandaʼ ni napa ique de oro, xpechu ne naʼ de plata, ndaaniʼ ne xcoʼreʼ de cobre, ca ñee de guiibaʼ ne ca batañee de guiibaʼ nuchaʼ beñe. Ne laaca biiyabe biree ti guié de lu ti dani ne bidxelasaani batañee estatua que ne binideni laa. Daniel bisiene rey que, Babilonia nga zeeda gaca ique de oro que, ne xcaadxi ndaa stiʼ estatua que zeeda gácani xcaadxi guidxi ni zuni mandar lu guidubi naca Guidxilayú despué. Peru ora maʼ cayuni mandar ca últimu guidxi ni zeeda gaca casi ca batañee de guiibaʼ nuchaʼ beñe que, zeeda Reinu stiʼ Dios para gunitilú guiráʼ gobiernu ni nuu lu guidxilayú riʼ. Despué maʼ qué zusaana de guni mandarbe lu guidubi naca Guidxilayú (Daniel, capítulo 2).

Daniel bibani xadxí dede biiyaʼ dxi binitilú Babilonia. Casi maca bizeetecabe, Ciro binitilú guidxi que. Nin qué nindaa de gucuaabe guidxi que, bizaa setenta iza de nuu xquidxi ca judíu que stubi ne laacaʼ bireecaʼ de esclavu. Stale de cani biʼniʼ mandar, cani ruzaaquiʼ guʼxhuʼ ne ca profeta ni biʼniʼ ni na Jiobá gudíxhecaʼ modo guibiguetaʼ gucuí ca judíu que Jerusalén ne guni chaahuicaʼ yuʼduʼ stiʼ Jiobá. Peru xi bizaaca gudiʼdiʼ si 483 iza guníʼcabe que yaʼ.

(Zeedani lu libru stiʼ Daniel.)