Lunes huadxí que biree Jesús de Jerusalén ne zeʼ Betania, ni riaana ñee dani Olivo. Zándaca biaanabe gueelaʼ que ra lidxi ca xhamígube Lázaro, María ne Marta.

Sti dxi siadóʼ que, 11 de nisán, bibiguetaʼ Jesús ne ca discípulo stiʼ Jerusalén. Ndiʼ nga últimu biaje cheʼ Jesús ndaaniʼ templu. Ne laaca ndiʼ nga últimu dxi guni predicarbe binni ante guni celebrarbe Pascua, ne quíxhebe guietenalaʼdxiʼ ca discípulo que guendaguti stibe ne guni juzgárcabe ne guuticabe laabe.

Neza ni riree de Betania zeʼ Jerusalén, ridiʼdiʼ ni dani Olivo, laga zécabe neza que biiyaʼ Pedro yaga duʼgaʼ ni biʼniʼ maldecir Jesús ti dxi ante, óraque bicaa ti ridxi ne ná: «¡Rabí, biiyaʼ! Maʼ bibidxi yaga duʼgaʼ ni biʼniʼ maldecirluʼ que» (Marcos 11:21).

Peru, ¿xiñee biʼniʼ maldecir Jesús yaga duʼgaʼ que yaʼ? Laabe guniʼbe: «Gábecaʼ laatu, pa nápatu fe ne qué guni dudartu la? cadi ni bineʼ siaʼ yaga riʼ zanda gúnitu, sínuque laaca zábitu dani riʼ “Biasa ne yeguiaba ndaaniʼ nisadóʼ” ne zaca ni. Ne guiráʼ cosa ni guinábatu lu oración, pa nápatu fe la? zacaatu ni» (Mateo 21:21, 22). Bibiguetaʼ guníʼ Jesús ti cosa ni maca bisiidiʼ: pa napa tuuxa fe zanda guniibi ti dani (Mateo 17:20).

Ngue runi ora biʼniʼ maldecir Jesús yaga que cusiidiʼ laacabe, risaca nga gápacabe fe Dios. Gúdxibe laacaʼ: «guiráʼ ni guinábatu ora guni orartu, laguinabaʼ ni né fe ne laguiníʼ ique maʼ gucuaatu ni, ne zápatu ni» (Marcos 11:24). ¡Guizáʼ risaca ni cusiidiʼ Jesús ca xpinni! Ne jmaruʼ si para ca apóstol que purtiʼ maʼ cadi candaa chiguidxaagalucaʼ stale guendanagana. Yanna, ¿xiruʼ zanda guizíʼdinu de yaga duʼgaʼ ni bibidxi que ne gápanu fe yaʼ?

Guidxi Israel zeeda gaca casi yaga duʼgaʼ que purtiʼ ruluíʼ napa cuananaxhi peru nisi bandaga napa. Cumu biʼniné Dios guidxi que ti pactu, ruluíʼ zinándacabe ni ná Ley stiʼ Dios, peru rusihuínnicabe qué gápacabe fe ne qué rúnicabe ni jneza. ¡Purtiʼ dede Xiiñiʼ Dios qué nacaʼ guni crecaʼ! Nga runi ra biʼniʼ maldecir Jesús yaga duʼgaʼ ni qué gapa cuananaxhi que ne bibidxi ni, bisihuínnibe xi chiguizaaca guidxi Israel purtiʼ qué ñapa fe ne que ñuni ni jneza.

Gupa si ora, yendá Jesús ne ca discípulo stiʼ Jerusalén. Casi maca runi Jesús, guyebe ra templu que ne bizulube cusiidibe. Ti dxi ante que guládxibe ca ni cutoo, ngue runi zándaca pur ni bizaaca que gunabadiidxaʼ ca sacerdote principal ne ca ancianu laabe: «¿Xi autoridad nápaluʼ para gúniluʼ ca cosa riʼ? ¿Tu bidii autoridad lii para gúniluʼ ca cosa riʼ?» (Marcos 11:28).

Para bicabi Jesús laacabe: «Naa laaca zanabadiidxaʼ laatu xiixa. Pa guicábitu naa la? laaca zabeʼ laatu xi autoridad napaʼ para guneʼ ca cosa riʼ. ¿Tu biseendaʼ Juan guedanduunisa? ¿Dios ni nuu guibáʼ la? o binni? Laguicabi naa». Yanna maʼ laacabe nga chiguicábicabe Jesús. Para bizulú ca sacerdote que ne ca ancianu que candaa íquecaʼ xi guicábicaʼ laabe: «Pa guininu Dios ni nuu guibáʼ la? zábibe laanu: “¿Yanna, xiñee qué ñuni cretu laabe yaʼ?”. Peru ¿tuu nga guiníʼ binni biseendaʼ laabe yaʼ?». Guniʼcaʼ zaqué purtiʼ cadxíbicaʼ guiráʼ ca binni que «purtiʼ para laacaʼ dxandíʼ guca Juan ti profeta» (Marcos 11:29-32).

Peru qué nidxela ca xhenemigu Jesús xi nicábicaʼ, ngue runi nacaʼ: «Qué gánnadidu». Para gudxi Jesús laacabe: «Naa laaca qué zabeʼ laatu xi autoridad napaʼ para guneʼ ca cosa riʼ». (Marcos 11:33).