Pa ruundané ca testigu stiʼ Jiobá lii Biblia, zándaca dede ante ruundaluʼ ndaa ra raca caber guʼndanécabe lii. Para ganda guiziidiluʼ jma ora cheluʼ ca guendaridagulisaa riʼ, laaca galán gúʼndaluʼ dede ante. Zabeenduluʼ stale ni galán pa quixhe chaahuiluʼ modo gúniluʼ ni.

Gudixhe pora ne paraa gúʼndaluʼ. Pora rábiluʼ gástipeʼ ni guchiiñaʼ lii para gúʼndaluʼ. Ñee siadóʼ roʼ ante guzululuʼ xhiiñaluʼ la? o huaxhinni ora maʼ nexheʼ ca xiiñiluʼ. Ne pa huaxiéʼ tiempu nápaluʼ la? gudixhe pabiáʼ tiempu gúʼndaluʼ ne cadi gudiiluʼ lugar chuʼ xiixa ni gucueeza lii gúniluʼ ni. Biyubi ti lugar ra gastiʼ guchiiñaʼ lii ne bisuíʼ radiu stiluʼ, televisión o teléfono. Pa guni orarluʼ ante guzululuʼ la? zacaneni lii gusiaandaluʼ ca cosa ni naguu xaíqueluʼ dxi ca ne jma zacá íqueluʼ ni cayuundaluʼ lu Stiidxaʼ Dios (Filipenses 4:6, 7).

Bizaa raya xaʼnaʼ ca diidxaʼ ni jma cayeeteʼ ne guyuu listu para guicábiluʼ. Cada tema gúʼndaluʼ primeru biyubi guiéneluʼ xidé caníʼ ni. Biiyaʼ xi láʼ título o capítulo ni chiguundatu, biiyaʼ ximodo zanda gacané ca subtítulo stini lii para guieʼnuʼ tema stini, biiyaʼ ca dibuju zeeda luni ne biindaʼ ca guendarinabadiidxaʼ ni zeeda ra ruzulú o ra riluxe cada tema. Despué biindaʼ cada párrafo ne biyubi ni cacabi ca guendarinabadiidxaʼ ca luni. Biquiiñeʼ Biblia stiluʼ para guyúbiluʼ ca textu ni cadi cá xiná ne biiyaʼ ximodo racaneni lii guieʼnu tema ca (Hechos 17:11). Ora maʼ bidxélaluʼ ni cacabi guendarinabadiidxaʼ ca bizaa raya xaʼnaʼ ca diidxaʼ ni jma risaca zeeda luni purtiʼ zacané nga lii guietenaláʼdxiluʼ ca diidxaʼ ca. Pa gúniluʼ zacá, zanda guindisanaluʼ ora maʼ cayaca guendaridagulisaa ne guicábiluʼ ni biéneluʼ.

Pa gúʼndaluʼ guiráʼ ni chiguiuundaʼ lu cada guendaridagulisaa guiráʼ semana la? jma zaziidiluʼ de Biblia (Mateo 13:51, 52).

• Ximodo zanda quixhe chaahuiluʼ tiempu stiluʼ ti ganda gúʼndaluʼ cani chitiidiʼ lu guendaridagulisaa.

• Ximodo zanda chuʼluʼ listu para guicábiluʼ ora cheluʼ guendaridagulisaa.