Bíchidu ne bizánadu ni nadxiidu:

Lu primé revista Torre stiʼ ni rapa 1 stiʼ enero 2008 ni rusaananenu binni bizulú biree tema ni láʼ: «Ejemplu stiʼ cani gupa fe». Dede dxi que bizulú bidúʼndanu ca historia sicarú ni zeeda luni gatigá.

Ximodo huayuni sentir ca binni ni huayuundaʼ ca tema riʼ yaʼ. Guzéʼtenu chupa chonna ejemplu. Despué de biindaʼ ti gunaa historia stiʼ Marta, bicaa ca diidxaʼ riʼ: «Dede bixidxeʼ huiineʼ ora biluxe biindaʼ historia stibe, purtiʼ cásica laabe naa. Ora gueeda ganna ca xhamiguaʼ naa qué liica ribiedxiéʼ ti ganda guneʼ tender laacaʼ dede riaandaʼ naa cueniáʼ laacaʼ ti ratu». Ti dxaapahuiiniʼ ni biʼndaʼ historia stiʼ Ester guníʼ sicaríʼ: «Bidieeʼ cuenta pa qué chuʼ binni cuidadu nisi lari zacá ique siʼ ne laaca zuyubi gapa cani jma nacubi caree. Nannaʼ naquiiñeʼ gácunu lari jneza, peru cadi naquiiñeʼ tiidisunu». Ne laaca guniʼbe: «Ni jma ruuyaʼ Jiobá nga ni nuu ndaaniʼ ladxidoʼno». Biluxe biindaʼ si ti gunaa xpinni Cristu tema ni caníʼ de apóstol Pedru, guníʼ sicaríʼ: «Bixuiʼluaʼ guiráʼ ni biindaʼ lu relatu que. ¡Casi ñaca ñuaaʼ raqué! Cadi cayuundaʼ siaʼ cani bizaaca lu historia que, sínuque casi ora cayuuyaʼ ne cayunadiagaʼ laacabe».

Ni guníʼ ca binni riʼ ne ni huacaa xcaadxi binni ni ruundaʼ tema ca rusihuínnicani dxandíʼ ca diidxaʼ ni guníʼ apóstol Pablu raca gayuaa iza: «Laganna dxichi: irá ni ucuá lu Xquiʼchi Dios ucuá para usiidi laanu» (Rom. 15:4). Bidii Jiobá lugar guicá ca relatu riʼ lu Biblia para gusiidicani laanu stale cosa risaca. Nga runi, neca maʼ xadxí nuunu ndaaniʼ xquidxi Dios zanda gacanécani laanu.

De guidubi ladxidoʼdo rinábadu laatu gúʼndatu libru riʼ casi guicaatu ni. Galán gúnitu pa iquiiñetu libru riʼ ora guni adorartu Dios né binnilídxitu. ¡Guizáʼ ziuulaʼdxiʼ ca xiiñitu libru riʼ! Ne ora guiuundaʼ ni lu Guendaridagulisaa ra Riuundaʼ Biblia rinábadu laatu cadi liica guiaadxatu. Lacuee tiempu para guʼndaʼ chaahuitu ni ne laguxuiʼlú cani gúʼndatu luni casi ñaca ñuutu ra cayaca cani. Laguni stipa pur guni sentirtu ni biʼniʼ sentir ca binni ni rieeteʼ luni ne laguuyaʼ cani bíʼyacabe. Ne laguiníʼ ique xi ñúnitu pa nizaacatu ni bizaacacabe.

Riéchedu nga gudiʼdu laatu libru riʼ, ne ribézadu gacaneni binnilídxitu. Laganna nadxiidu laatu.

Grupu ni zaniruʼ stiʼ ca Testigu stiʼ Jiobá