1, 2. Paraa zeʼ María ne xheelaʼ, ne xiñee nagana gúcani para laabe.

GUIZÁʼ maʼ bidxaga María ne cuyubi modo cuiʼ chaahuiʼ deche burru huiiniʼ dxiʼbaʼ. Xiñee yaʼ. Purtiʼ maʼ xadxí de zúbabe décheme. Ne zaniruʼ José, xheelabe, naaze stoo burru huiiniʼ que zécabe Belén, ti guidxi zitu. Málasi biʼniʼ sentir María caniibi baʼduhuiiniʼ que ndaaniʼ.

² Maʼ cadi candaa para gale xiiñibe, purtiʼ Biblia na: «Beda ganda dxi gapa María baʼduʼ» (Luc. 2:5, 6). Ora zidíʼdicabe lu ca layú que, zándaca biiyaʼ tobi de ca hombre ni cucaa surcu laabe ne guníʼ ique xi zigúnibe zebe sti guidxi pa mayaca gápabe baʼduʼ. Yanna, xiñee biree María de Nazaret, xquidxi, ne zeʼ ti guidxi zitu yaʼ.

3. Xi dxiiñaʼ gucuaa María, ne xi rizíʼdinu de ejemplu stibe.

³ Historia stiʼ baʼdudxaapaʼ judía riʼ bizulú ni raca chupa chonna beeu ante dxi gucuaabe ti dxiiñaʼ nabé risaca ni qué huayuu dxi guicaa sti binni: iquiiñeʼ Dios laabe para gale Xiiñiʼ, ni chigaca Mesías (Luc. 1:35). Neca maʼ dxi si cabeza María para gapa baʼduʼ la? caquiiñeʼ chebe sti guidxi. Raríʼ zadúʼyanu bidxaagalú María stale guendanagana ni bisihuinni pa naguidxi nuu fe stiʼ. Xi gucané laabe chuʼbe jma gaxha de Dios yaʼ.

4, 5. 1) Xiñee zeʼ José ne María guidxi Belén. 2) Xi diidxaʼ riguixhená guca dxi gulee César Augusto ti ley.

⁴ Cadi José ne María si nga zecaʼ Belén. Emperador César Augusto gulee ti ley ra na naquiiñeʼ cheʼ guiráʼ binni guidxi ra gule para guicá lá. Xi biʼniʼ José yaʼ. Biblia na guyebe «Belén ti guidxi de Judea ra gule David. Ne uyé be raqué purti za be de xfamilia David» (Luc. 2:1-4).

⁵ Cadi guiníʼ íquenu málasi gulee emperador que ley riʼ ca dxi que, sínuque maʼ raca biaʼ gadxe gayuaa iza bieeteʼ zale Mesías ndaaniʼ guidxi Belén. Nuu ti guidxi ni riaana biaʼ 11 kilómetru de Nazaret ni láʼ Belén, peru ca diidxaʼ riguixhená ni caníʼ de Mesías que na zálebe «Belén Efrata» (biindaʼ Miqueas 5:2). Pa guireecabe  de Nazaret la? napa xidé sácabe biaʼ 130 kilómetru lade ca dani stiʼ Samaria para chindácabe guidxi huiiniʼ riʼ. Ne raquepeʼ nga naquiiñeʼ cheʼ José ne María, purtiʼ lugar que nga nuu ca binnilídxicabe, cani zá de rey David.

6, 7. 1) Xiñee nagana guca para María cheʼ Belén. 2) Xiñee maʼ qué ñuni María ni racalaʼdxiʼ si ra bichaganabe José. (Biiyaʼ ni cá ñee yaza.)

⁶ Xi guníʼ ique María guni yaʼ. Ñee zinebe José sti guidxi ti gúnicabe casi na ley ni biree que la? Nánnabe nagana zaca para laabe chebe sti guidxi. Purtiʼ zándaca ca dxi que nga cuzulú beeu octubre ra riluxe gusibá ne maʼ ruzulú riaba nisaguié. Ne relatu ni zeeda lu Biblia ruzeeteʼ biree José de guidxi Galilea ne guyé Belén. Cumu maʼ napa dxi bireecabe la? ngue runi zándaca nabé maʼ bidxágacabe ra mayaca chindácabe guidxi que. Laaca zándaca bindaacabe jma que biaʼ rindaa ti binni para chindá guidxi que, purtiʼ stale biaje bizuhuaadxícabe neza para ganda guiziilaʼdxiʼ María. Cumu primeruʼ baʼduʼ ngue chigápabe la? jma ñuuláʼdxibe ñaanabe ralídxibe, ranuu binnilídxibe ne ca xhamígube ti ñacanécabe laabe ora maʼ ñápabe xiiñibe. Ngue runi, nanna dxíchinu gupa xidé gúcabe nadxibalú para chebe guidxi que.

⁷ Neca zaqué nuube, Lucas na: «Yené [José] María» para guicá lacaʼ. Ne laaca ruzeeteʼ Lucas maʼ bichaganáʼ María José (Luc. 2:4, 5). Yanna cumu maʼ bichaganáʼ María la? maʼ qué zanda guni ni racalaʼdxiʼ si. Laabe nánnabe Jiobá nga gudixhe gaca hombre  xaíque ndaaniʼ lidxi ne laaca nánnabe dxiiñaʼ ni bidii Jiobá gunaa nga gacané xheelaʼ, nga runi, qué nusaana de nuzuubabe stiidxaʼ José ora gudixhe gaca xiixa. * Ne cumu gúpabe fe Dios la? ngue gucané laabe guzuubabe stiidxaʼ xheelabe.

8. 1) Xiruʼ gucané María para cheʼ Belén. 2) Xiñee guizáʼ sicarú ejemplu bisaana María para guiráʼ xpinni Dios.

⁸ Xiruʼ gucané María guzuubaʼ diidxaʼ yaʼ. Ñee nánnabe nuu ti diidxaʼ riguixhená ni ruzeeteʼ Belén nga chigale Mesías que la? Qué ruzeeteʼ diʼ Biblia pa gúnnabe ni. Peru zándaca gúnnabe ni, purtiʼ guiráʼ binni bibani dxiqué gúnnacaʼ xiná diidxaʼ riguixhená riʼ, cásica ca xaíque yuʼduʼ ne zaqueca binni guidxi (Mat. 2:1-7; Juan 7:40-42). Ne laaca nabé gunna María xiná Stiidxaʼ Dios (Luc. 1:46-55). Qué gánnanu xiñee guyebe Belén, zándaca bíʼnibe ni pur bizuubabe stiidxaʼ xheelabe, pur gúnibe ni na ley que o para ganda gaca ni na Jiobá o zándaca pur guiráʼ ni bizéʼtenu riʼ. Peru ra guyebe Belén, gudíxhebe ti ejemplu guizáʼ sicarú para laanu. Nabé rusisaca Jiobá guiráʼ hombre ne gunaa ni ruzuubaʼ diidxaʼ ne ni qué rudxiibaʼ laca laa. Cumu ca dxi nabáninu riʼ qué risaca para  binni guzuubaʼ diidxaʼ la? nga runi guiráʼ xixé xpinni Dios galán chinándacaʼ ejemplu stiʼ María.

9, 10. 1) Xi zándaca bietenalaʼdxiʼ José ne María laga zidxíñacaʼ Belén. 2) Paraa biaana José ne María gueelaʼ que, ne xiñee.

⁹ Guizáʼ biecheʼ María ora biʼyaʼ de zitu maʼ rihuinni guidxi Belén. Laga ziguiʼbaʼ José ne María cueʼ dani ranuu stale yaga naze aceituna lu —laani nga yaga rudii dede últimu—, ziyetenaláʼdxicaʼ historia stiʼ Belén. Nabé nahuiiniʼ guidxi riʼ, casi guníʼ Miqueas, ni riguixhená que, qué liica riguucabe cuenta ni lade ca guidxi stiʼ Judá. Peru ndaaniʼ guidxi huiiniʼ riʼ gule chupa chonna binni ni rieeteʼ lu Biblia, casi Boaz, Noemí ne David raca jma de ti mil iza.

¹⁰ Cumu cacá lá binni raqué la? nuu stale binni ndaaniʼ guidxi que. Ne nuuruʼ stale tu yendá ante chindácabe, ne maʼ gastiʼ lugar ra guiaanacabe. * Ngue runi, maʼ ndaaniʼ ti currá si nga gunda biaanacabe gueelaʼ que. Málasi bizulú cayuubaʼ ndaaniʼ María, qué huayuu dxi guni sentir zaqué ne zeʼ ora jmaruʼ si ziroobaʼ yuubaʼ que. Guxuíʼlunu cadúʼyanu José qué guidxela xi guni ora biʼyaʼ maʼ chigapa María baʼduʼ. ¡Ne ndaaniʼ ti currá nga chigale baʼduhuiiniʼ que!

11. 1) Xiñee nanna guiráʼ gunaa ni napa xiiñiʼ ni biʼniʼ sentir María. 2) Xi chupa modo zanda guininu beeda gaca Jesús «baʼduʼ lugola».

¹¹ Guiráʼ gunaa nanna pabiáʼ naná yuubaʼ cayuni sentir María. Tapa mil iza ante, maca guníʼ Jiobá, zapa gunaa yuubaʼ ora gapa baʼduʼ pur bichee Adán ne Eva (Gén. 3:16). Ne rihuinni dxichi laaca gupa María yuubaʼ. Lucas qué nuzeeteʼ diʼ stale cosa de dxi gupa María baʼduʼ, ni guníʼsibe nga: «Gupa be primé xiiñi be» (Luc. 2:7). Neca despué gupa María biaʼ xi xhoopaʼ xiiñiʼ la? baʼduʼ primé stibe riʼ gadxepeʼ laa de xcaadxi xiiñibe (Mar. 6:3). Ne cadi gúcasibe baʼduʼ lugola stiʼ María, sínuque laaca laabe nga «baʼduʼ lugola stiʼ guiráʼ xixé ni guyáʼ». ¡Laabe nga tobi lucha Xiiñiʼ Dios! (Col. 1:15, TNM.)

12. Paraa gudixhe María baʼduhuiiniʼ que, ne xiñee maʼ gadxé guiráʼ ni runi binni de modo gule Jesús.

¹² Lu relatu riʼ rieeteʼ sti cosa ni nánnanu biʼniʼ María, nani: «Bichenda be laa lari, gudixhe be laa ndaani ti cajón ra ro mani guixi» (Luc. 2:7). Guiráʼ ladu runi binni modo gule Jesús, rúnicabe dibuju de laani ne lu guidubi naca Guidxilayú rusihuínnicabe modo riníʼ íquecabe bizaaca ni para guʼyaʼ binni. Ora rúnicabe  zacá, rusihuínnicabe nabé sicarú ra gúlebe, peru cadi zacá diʼ ni. Xiñee yaʼ. Primé la? ndaaniʼ ti cajón ra ró maniʼ guixi nga gudixhe María laabe. Ne cadi guiaandaʼ laanu, ndaaniʼ ti currá nga nuucabe, ne nánnanu ca currá ni guyuu dxiqué cadi nayá diʼ ndaaniʼ cani ne qué rinaazeʼ bi. Tu laa nuyubi ti lugar zacá para ñale xiiñiʼ yaʼ. Cadi dxandíʼ jma nga ricá ique binni gudii xiiñiʼ ni galán la? ¡Jmaruʼ si José ne María, purtiʼ laacaʼ chigusiniisicaʼ Xiiñiʼ Dios!

13. 1) Ximodo bisihuinni José ne María bíʼnicaʼ guiráʼ ni gunda para chuʼ baʼduhuiiniʼ que galán. 2) Ximodo zanda guni ca binni ni napa xiiñiʼ casi biʼniʼ José ne María ora gusiniisicaʼ xiiñicaʼ.

¹³ Peru qué ñuucabe triste pur gule baʼduhuiiniʼ riʼ lugar que, sínuque jma nga gucuá íquecabe chuʼ baʼduhuiiniʼ que galán. Ni biʼniʼ María nga bichenda lari baʼduhuiiniʼ que ne gudixhe laabe ndaaniʼ ti cajón ra ró maniʼ guixi para gásibe, ne biyubi modo gata chaahuibe ne cadi gaca nándabe. Neca huaxiéʼ galán ra gule baʼduhuiiniʼ que la? bidiibe guiráʼ ni biquiiñeʼ. Laabe ne José nánnacabe ni jma risaca gúnicabe nga gusiidicabe xiiñicabe gannaxhii Jiobá (biindaʼ Deuteronomio 6:6-8). Ca dxi stinu riʼ, stale binni qué riuulaʼdxiʼ guni ni na Dios. Neca zacá, ca binni ni nanna gusiidiʼ xiiñiʼ rúnicaʼ cásica biʼniʼ José ne María ora rusiidicaʼ laacabe de Dios.

14, 15. 1) Xiñee nuu ca hombre rapa dendxuʼ que gúʼyacaʼ baʼduhuiiniʼ ni gule que. 2) Xi biʼniʼ ca hombre rapa dendxuʼ que ora bíʼyacaʼ Jesús ndaaniʼ currá que.

¹⁴ Málasi binadiágacabe guyuu caadxi hombre ni rapa dendxuʼ ndaaniʼ currá ra nuucabe que. Ca hombre riʼ bireecaʼ de cueʼ dani ra cayápacaʼ dendxuʼ sticaʼ ne zeeda guxooñecaʼ bedandacaʼ ra nuucabe ne racaláʼdxicaʼ gúʼyacaʼ familia que, peru jma nuucaʼ gúʼyacaʼ baʼduhuiiniʼ ni gule que. * Nabé nayecheʼ nuucabe dede capapa ladxidóʼcabe ora cayábicabe bixhoze ne jñaa baʼduhuiiniʼ que ni bizaacacabe. Málasi bihuinni ti ángel nezalúcabe huaxhinni ora cayápacabe dendxuʼ. Bizaaniʼ biaaniʼ stiʼ Jiobá laacabe, ne ángel que gudxi laacabe maʼ guleʼ Cristu (o Mesías) ndaaniʼ guidxi Belén ne zadxélacabe laa renda lari nexheʼ ndaaniʼ ti cajón ra ró maniʼ guixi. De raqué, bizaaca sti cosa ni jma bidxagayaacabe: ¡biiyacabe stale ángel dagulisaa para gusisácacaʼ Jiobá! (Luc. 2:8-14.)

¹⁵ Ngue runi, ¡biree guxooñecabe ne zécabe Belén! Zanda  guxuíʼlunu pabiáʼ nayecheʼ nuu ca hombre riʼ ora bíʼyacaʼ baʼduhuiiniʼ ni gule que cásipeʼ modo gudxi ángel que laacaʼ. Ngue runi, ca hombre riʼ qué nusaana de niniʼcaʼ guiráʼ ni bíʼyacaʼ ne ni binadiágacaʼ, sínuque «byuíʼ né cabe laaca irá ni gudxi ángel que laacabe [...]. Bidxagayaa irá ni bina diaga ni uníʼ cabe que» (Luc. 2:17, 18). Zándaca ca xaíque yuʼduʼ ni guyuu dxiqué bíʼnicaʼ menu cani rapa dendxuʼ. Peru rihuinni dxichi nabé bisisaca Jiobá ca hombre riʼ, purtiʼ qué nudxiibacaʼ laca laacaʼ ne bíʼnicaʼ ni nabe. Yanna, xi biʼniʼ sentir María ora yeganna ca hombre riʼ laa yaʼ.

16. Xiñee nánnanu guníʼ ique María cani binadiaga, ne ximodo gucané ni laabe.

¹⁶ Neca biaana María sin stipa ora gupa baʼduʼ la? bicaadiágabe guiráʼ ni caníʼ ca hombre que, peru cadi bicaadiágasibe, sínuque relatu riʼ na: «[María] cayapa irá ni ndaani ladxidóʼ ne candaa ique né ni» (Luc. 2:19). Cumu naca María ti baʼdudxaapaʼ ni nabé riníʼ ique la? ngue runi, nagueendaca biene ni guníʼ ca ángel que. Jiobá, Dios stibe, racalaʼdxiʼ gánnabe tuu nga chigaca baʼduhuiiniʼ que ne pabiáʼ risaca. Ngue runi, cadi bicaadiágasibe, sínuque gúpabe guiráʼ ca diidxaʼ que ndaaniʼ ladxidoʼbe ne guníʼ íquebe cani biaʼ dxi bibánibe. Rihuinni dxíchica ra guníʼ ique María guiráʼ diidxaʼ que guizáʼ gucané ni laa para iguidxi fe stiʼ (biindaʼ Hebreos 11:1).

17. Ximodo zanda chinándanu ejemplu stiʼ María.

¹⁷ Yanna lii yaʼ. Ñee zúniluʼ casi biʼniʼ María la? Lu Biblia bicaa Jiobá stale cosa risaca ni zanda gacané laanu chuʼnu gaxha de laa. Peru qué zanda diʼ gacanécani laanu pa qué gúninu ni nácani. Nga runi, naquiiñeʼ guidúʼndanu Biblia guiráʼ dxi, ne cadi guidúʼyanu ni casi intiica si libru, sínuque guidúʼyanu ni casi Stiidxaʼ Dios (2 Tim. 3:16). De racá, naquiiñeʼ gápanu cani rusiidini ndaaniʼ ladxidoʼno ne guiníʼ íquenu ximodo zanda gacané cani laanu lu xquendanabáninu, cásica biʼniʼ María. Pa guiníʼ íquenu ni guidúʼndanu ne guyúbinu modo gúninu guiráʼ ni nani lu xquendanabáninu la? zaca fe stinu jma naguidxi.

18. 1) Ximodo biʼniʼ José ne María ni na Ley ni bidii Dios Moisés gule si Jesús. 2) Xi rusihuinni ofrenda ni bidii José ne María que.

¹⁸ Gudiʼdiʼ si xhono gubidxa de gule baʼduhuiiniʼ que, biʼniʼ  circuncidar José ne María laabe casi na Ley ni bidii Dios Moisés, ne casi maca guníʼ ángel que, gulee lácabe laabe Jesús (Luc. 1:31). Ora bisaa baʼduhuiiniʼ que cuarenta dxi, yenécabe laa Jerusalén, ti guidxi ni riaana biaʼ 10 kilómetru de ra nuucabe que. Yendásicabe raqué bidiicabe ti ofrenda ni na Ley que zanda gudii binni pobre ora gapa baʼduʼ: chupa guugu huiiniʼ o chupa paloma. Zándaca bituilúcabe purtiʼ qué ñanda nudiicabe ti dendxuʼ barracu ne ti guuguhuiiniʼ, casi bidii xcaadxi binni; peru bíʼnicabe stipa pur chinándacabe ni na Ley qué. Modo tiica biʼniʼ sentírcabe la? guyuu tu guluu gana laacabe ndaaniʼ yuʼduʼ que (Lev. 12:6-8; Luc. 2:21-24). Guidúʼyanu xi bizaaca.

19. 1) Xi guníʼ Simeón ni bicaa María guiníʼ ique. 2) Xi biʼniʼ Ana ora biʼyaʼ Jesús.

¹⁹ Bidxiña ti binnigola láʼ Simeón laacabe ne gúdxibe María caadxi diidxaʼ ni gupa ndaaniʼ ladxidóʼ. Bisiénebe María maca gudxi Dios laabe zuuyabe Mesías ante gátibe. Ne espíritu santu stiʼ Jiobá gudxi laabe Jesús, baʼduhuiiniʼ ni gupa María que, nga ni rieeteʼ lu Stiidxaʼ Dios chigulá binni. Peru Simeón laaca gudxi María zedandá ti dxi zuni sentirbe ti yuubaʼ naná, casi ora nidiʼdiʼ laaga ti gudxíu ladxidoʼbe (Luc. 2:25-35). Treinta y tres iza despué guca ni na ca diidxaʼ riʼ, ne zándaca ca diidxaʼ ni guníʼ Simeón que nga cani gucané María guni huantar yuubaʼ naná ni biʼniʼ sentir. De raqué, nuucabe ndaaniʼ yuʼduʼ que bidxiña Ana, ti gunaa ni riguixhená, ra nuucabe, biiyabe Jesús ne guniʼbe de laa nezalú guiráʼ  ca binni ni cabeza guedandá dxi guilá Jerusalén (biindaʼ Lucas 2:36-38).

20. Xi ndaayaʼ gucuaa José ne María ra yenecaʼ Jesús ndaaniʼ yuʼduʼ que.

²⁰ ¡Stale ndaayaʼ nga gucuaa José ne María ra yenecaʼ baʼduhuiiniʼ que ndaaniʼ yuʼduʼ stiʼ Jiobá ni nuu Jerusalén! Ndiʼ nga primé biaje yenécabe Jesús ndaaniʼ yuʼduʼ que, ne dede dxiqué qué ñaadxabe raqué biaʼ dxi bibánibe. Dxi que, bidiicabe Jiobá guiráʼ ni nápacabe, ne laa guluu ndaayaʼ laacabe ra bisiidiʼ laacabe stale cosa risaca ne ra biquiiñeʼ binni para uguu gana laacabe. Nanna dxíchinu biguidxi fe stiʼ María ora biree de ndaaniʼ yuʼduʼ que, ne dxaʼ tipa ladxidóʼ de stale diidxaʼ risaca ni zanda guiníʼ ique ne ni zanda güiné xcaadxi binni.

21. Xi zanda gúninu para iguidxi fe stinu.

²¹ Nabé galán runi sentirnu ora ridúʼyanu zinanda ca binni ni napa xiiñiʼ ejemplu riʼ. Ca testigu stiʼ Jiobá laaca maʼ biaacaʼ chinecaʼ xiiñicaʼ ca guendaridagulisaa ni rapa ca xpinni Cristu. Cásica biʼniʼ José ne María, ca binni riʼ laaca rudiicaʼ Dios guiráʼ ni nápacaʼ. Lu ca guendaridagulisaa riʼ riguucabe gana ca bíʼchicabe ne ca bizáʼnacabe. Ne laaca riuucabe gana, riguidxi fe stícabe, riuucabe nayecheʼ ne laaca ridxá tipa ladxidóʼcabe de ca diidxaʼ sicarú ni zanda güinécabe xcaadxi binni. ¡Guizáʼ nayecheʼ runi sentirnu ora ridagulisaanenu laacabe! Ora gúninu zacá, ra tiidiʼ dxi zudiʼnu cuenta jma zaguidxi fe stinu, cásica guca fe stiʼ María.