Rapa ti hombre ne ti gunaa guendanagana ora guichaganacaʼ, purtiʼ gadxé gadxé ni riníʼ íquecaʼ ne ni runi sentircaʼ o zándaca gadxé gadxé modo biniisicaʼ. Laaca zándaca gápacaʼ guendanagana pur sti binni o pur xiixa cosa ni cadi cabézacaʼ guizaaca.

Stale guendaxheelaʼ qué rizaalaʼdxiʼ guni chaahuiʼ ca guendanagana riʼ, peru Biblia na naquiiñeʼ gudxiilú binni cani (Mateo 5:23, 24). Pa chinanduʼ ca principiu zeeda lu Biblia la? jma jneza zuni chaahuiluʼ ca guendanagana stitu.

NI RUSIIDIʼ BIBLIA: «Nuu [...] tiempu para guininu» (Eclesiastés 3:1, 7). Gulee tiempu para guiniuʼ de guendanagana nápatu; gudxi xheeluʼ ximódopeʼ cayuni sentirluʼ ne xi caníʼ íqueluʼ de laani. Qué chuʼ dxi gusiguiiluʼ laabe (Efesios 4:25). Neca guidxiichiluʼ, biʼniʼ stipa cadi tíndeluʼ. Pa guicábiluʼ né diidxaʼ nadóʼ la? zucueezuʼ de gaca ti pleitu naroʼbaʼ ora chuʼ xiixa cosahuiiniʼ ni guchiichi laatu (Proverbios 15:4; 26:20).

Guca nachaʼhuiʼ né xheeluʼ ne cadi gusaana de gannaxhiiluʼ ne gápaluʼ respetu laa, neca cadi cayuulaʼdxuʼ ni nuu guni (Colosenses 4:6). Biyubi guni chaahuiluʼ guendanagana stitu nagueenda ne cadi gusaana de guiniʼtu (Efesios 4:26).

NI ZANDA GUʼNUʼ:

• Biiyaʼ chaahuiʼ pora zanda güitu de guendanagana nápatu

• Biʼniʼ stipa cadi guchuuguluʼ lu stiidxaʼ xheeluʼ ora maʼ caníʼ. Guleza ora gaca caber lii guiniuʼ

NI RUSIIDIʼ BIBLIA: «Laganaxhii saa [...], cada tobi usisaca stobi ne cadi laca laa» (Romanos 12:10). Nabé risaca gannuʼ gucaadiaʼguʼ xheeluʼ ne guʼnuʼ stipa guieʼnuʼ ni riníʼ ique, gunnaxhii laa casi ti compañeru o compañera stiuʼ ne cadi gudxiibaluʼ laca lii (1 Pedro 3:8; Santiago 1:19). Cadi guʼnuʼ sica ora cucaadiaʼguʼ xheeluʼ. Pa ganda la? bisaana ni cayuʼnuʼ ne bicaadiaga chaahuiʼ laabe, o gudxi laabe pa zanda güitu diidxaʼ sti ora. Qué zadxiichineluʼ xheeluʼ nagueenda, pa guʼyuʼ laa casi ti compañeru o compañera stiuʼ ne cadi casi ti enemigu (Eclesiastés 7:9).

NI ZANDA GUʼNUʼ:

• Biʼniʼ stipa guieʼnuʼ ni gabi xheeluʼ lii, neca qué chuulaʼdxuʼ ni

• Biiyaʼ chaahuiʼ xi nuu xheeluʼ gabi lii. Biiyaʼ lube, modo cuniibi nabe ne modo caniʼbe

NI RUSIIDIʼ BIBLIA: «Rireendú guiráʼ dxiiñaʼ runi binni, peru ni riníʼ si chiguni xiixa ne qué guni ni la? riaana lu guendaziʼ» (Proverbios 14:23, La Biblia Latinoamérica, 2011). Cadi guyúbisitu ximodo jma jneza gaca chaahuiʼ guendanagana stitu, laaca naquiiñeʼ gúnitu ni gudixhe íquetu ca. Zándaca gaca ni nagana, peru ziuutu galán pa gúnitu ni (Proverbios 10:4). Jma stale ni zabeendutu, pa guirópatu guni chaahuitu ca guendanagana stitu (Eclesiastés 4:9).

NI ZANDA GUʼNUʼ:

• Guníʼ ique xi zanda guni cada tobi de laatu para guni chaahuitu guendanagana stitu

• Gatigá biiyaʼ pabiaʼtiʼ cayúnitu ni gudixhe íquetu