LECCIÓN 53
Cuinu entretenimientu ni chuulaʼdxiʼ Jehová
Naca Jehová «ti Dios ni nayecheʼ» (1 Timoteo 1:11). Ne racaláʼdxibe guibáninu nayecheʼ. Laaca riuuláʼdxibe cueenu tiempu para guiziiláʼdxinu de guiráʼ ni rúninu ne de dxiiñaʼ stinu, ne cueenu tiempu para gaca relajarnu. Lu lección riʼ zadúʼyanu caadxi modo zanda gaca divertirnu ne cueenu tiempu para guiziiláʼdxinu, ne ni jma galán nga purtiʼ riuulaʼdxiʼ Jehová ca ni.
1. ¿Xi naquiiñeʼ guietenaláʼdxinu ora cuinu entretenimientu stinu?
¿Xi riuuláʼdxiluʼ gúniluʼ para gaca relajarluʼ? Nuu tu laa la? riuulaʼdxiʼ guiaana ra lidxi guiziilaʼdxiʼ, guʼndaʼ ti libru, gucaadiaga música, guʼyaʼ ti película o chuʼ lu internet. Ne nuu tu laa riuulaʼdxiʼ guireené ca xhamigu paxaraa, quitené laacabe o chigázecabe xiixa lugar. Intiica si cosa cuinu para gaca divertirnu, naquiiñeʼ guiduʼyaʼ chaahuinu «xii nga ni riuulaʼdxiʼ Señor» (Efesios 5:10). Ne risaca guiénenu ndiʼ. Purtiʼ nanalaʼdxiʼ Jehová stale cosa ni runi binni para gaca divertir, purtiʼ lúcani zeeda guendaridinde, espiritismo ne pecadu sexual (biindaʼ Salmo 11:5). ¿Xi zacané laanu guicaanu ti decisión jneza yaʼ? Pa nadxii ca xhamígunu Jehová la? zanda gacanécabe laanu para cuinu entretenimientu stinu jneza ne ni chuulaʼdxiʼ Jehová. Casi bizíʼdinu lu lección 48 que, «tu canazané binni nuu xpiaaniʼ la? zaca binni nuu xpiaaniʼ». Peru pa guidxaaga tuuxa ca binni ni qué rinanda ca ley stiʼ Jehová la? «qué zié ni laa jneza» (Proverbios 13:20).
2. ¿Xiñee risaca cúʼbiaʼnu tiempu ni riquiiñenu para gaca divertirnu?
Neca jneza ca cosa ni cuinu para gaca divertirnu, naquiiñeʼ gápanu cuidadu cadi cueecani tiempu stinu. Zándaca maʼ qué zápanu tiempu gúninu xcaadxi cosa jma risaca. Biblia cayabi laanu: «Laiquiiñeʼ tiempu stitu jneza» (biindaʼ Efesios 5:15, 16).
GUIZÍʼDIRUNU JMA
Guidúʼyanu xi zanda gúniluʼ para ganda guicaaluʼ decisión jneza ora cuiluʼ entretenimientu stiluʼ.
3. Gucáʼnanu entretenimientu ni zanda guniná laanu
¿Xiñee caquiiñeʼ cuí chaahuinu entretenimientu stinu yaʼ? Laguuyaʼ VIDEU riʼ ne laiquiiñeʼ ca pregunta riʼ para güitu diidxaʼ:
-
¿Xiñee zanda guchaaganu modo gudinde ca gladiador ni guyuu guidxi Roma dxiqué né caadxi diversión ni nuu yanna?
-
Casi bidúʼyanu lu videu riʼ, ¿xi biziidiʼ Danny de entretenimientu stiʼ?
Laguundaʼ Romanos 12:9 ne laiquiiñeʼ ca pregunta riʼ para güitu diidxaʼ:
-
¿Ximodo racané versículo riʼ laanu para cuinu entretenimientu stinu?
¿Gunáʼ nga caadxi de ca cosa ni nanalaʼdxiʼ Jehová? Laguundaʼ Proverbios 6:16, 17 ne Gálatas 5:19-21. Despué de gúʼndatu cada textu, laiquiiñeʼ pregunta riʼ para güitu diidxaʼ:
-
Lade ca cosa ni ruzeeteʼ textu riʼ, ¿gunáʼ nga ca cosa ni jma rihuinni lu ca ni riquiiñeʼ binni para gaca divertir?
Ximodo cuí chaahuiluʼ entretenimientu stiluʼ
Gunabadiidxaʼ:
-
¿Xi zeeda luni? ¿Ñee zeeda cosa ni nanalaʼdxiʼ Jehová luni la?
-
¿Pora? ¿Ñee pur laani maʼ qué zuneʼ xcaadxi cosa jma risaca la?
-
¿Tu né? ¿Ñee zucaani naa guidxaaga binni ni cadi nadxii Jehová la?
Para cadi guizaacanu xiixa la? caquiiñeʼ guixélenu de ca cosa ni zanda guniná laanu. Zacaca nga naquiiñeʼ guixélenu o gucáʼnanu entretenimientu ni zándaca zuniná laanu.
4. Biquiiñeʼ tiempu stiluʼ jneza
Laguuyaʼ VIDEU riʼ ne laiquiiñeʼ pregunta riʼ para güitu diidxaʼ:
-
Neca cadi cayuni hermanu ni bihuinni lu videu riʼ cosa malu, ¿xi guendanagana cayápabe?
Laguundaʼ Filipenses 1:10 ne laiquiiñeʼ pregunta riʼ para güitu diidxaʼ:
-
¿Ximodo zanda gacané versículo riʼ laanu cúʼbiaʼnu pabiáʼ tiempu cueenu para gaca divertirnu?
5. Gulí entretenimientu ni zacané lii
Dxandíʼ, nuu caadxi cosa ni runi binni para gaca divertir ni qué riuulaʼdxiʼ Jehová, peru nuu xcaadxi cosa ni zanda gúninu. Laguundaʼ Eclesiastés 8:15 ne Filipenses 4:8, ne laiquiiñeʼ pregunta riʼ para güitu diidxaʼ:
-
¿Gunáʼ nga ca cosa ni riuuláʼdxiluʼ gúniluʼ para gaca divertirluʼ?
Zanda gaca divertirnu ne gusiéchenu ladxidóʼ Jehová.
NUU TU NÁ: «Inque si cadi cayúniluʼ ni la? gastiʼ naca gúʼyaluʼ xiixa ni napa espiritismo, guendaridinde o pecadu sexual».
-
¿Lii xi riníʼ íqueluʼ yaʼ?
XI BIZÍʼDINU
Racalaʼdxiʼ Jehová gaca divertirnu ne chuʼnu nayecheʼ, peru gúninu ni jneza.
Xi biziidiluʼ
-
¿Xi entretenimientu rucaanáʼ ca xpinni Cristu?
-
¿Xiñee caquiiñeʼ guiduʼyaʼ chaahuinu pabiáʼ tiempu ribeenu para gaca divertirnu?
-
¿Ñee racaláʼdxiluʼ gusiécheluʼ ladxidóʼ Jehová pur ca cosa ni cuiluʼ para gaca divertirluʼ la? ¿Xiñee yaʼ?
BIIYAʼ XIRUʼ ZANDA GUIZIIDILUʼ
Biiyaʼ tuu nga caquiiñeʼ cuí entretenimientu stinu.
Biiyaʼ ximodo zanda cuí chaahuiluʼ ca cosa ni riquiiñeluʼ para gaca divertirluʼ.
Biiyaʼ xiñee bisaana ti hombre caadxi entretenimientu lu historia ni láʼ «Bisaana de guneʼ menu binni de sti raza».
«Gucané Biblia laacabe para bichaacabe» (Torre stiʼ ni rapa, 1 de febrero de 2010)
Biiyaʼ xiñee bicaanáʼ gunaa ni rihuinni lu videu riʼ entretenimientu ni né espiritismo.
Laaca zándaca ziuuláʼdxiluʼ ca ndiʼ
CANI NABÉ RINABADIIDXAʼ BINNI
¿Ximodo runi estudiarné ca testigu stiʼ Jehová binni Biblia?
Zanda gacané ca testigu sti’ Jehová lii guiénelu’ Biblia jma nagueenda ne zanda iquiiñelu’ Biblia ni jma riuulá’dxilu’. Laaca zanda guni invitarlu’ familia stilu’ o tuuxa xhamígulu’.
