LECCIÓN 60
Gudixhe ique chuʼluʼ jma gaxha de Jehová
Biaʼ tiempu cacaaluʼ estudiu, maʼ biziidiluʼ stale cosa de Jehová. Ne pur guiráʼ ni maʼ biziidiluʼ jma nadxiiluʼ Dios yanna, dede zándaca maʼ bidiiluʼ xpídaluʼ laabe ne maʼ guyuunísaluʼ. Ne pa coʼ la? zándaca maʼ caníʼ íqueluʼ gúniluʼ ni. Peru despué de maʼ guyuunísaluʼ, cadi gusaana de guyúbiluʼ chuʼluʼ jma gaxha de Jehová. Zanda gaca xhamíguluʼ laabe jma yanna ne para siempre. Guidúʼyanu ximodo zanda gúniluʼ ni.
1. ¿Xiñee caquiiñeʼ guyúbiluʼ chuʼluʼ jma gaxha de Jehová?
Guiranu caquiiñeʼ gúninu stipa para chuʼnu jma gaxha de Jehová. ¿Xiñee yaʼ? «Para cadi guixélenu» de laabe (Hebreos 2:1). ¿Xi zacané laanu cadi gusaana de gúninu ni ná Jehová yaʼ? Ti cosa ni zanda gacané laanu nga cadi gusaana de guni predicarnu ne guidúʼyanu xiruʼ zanda gúninu lu xhiiñaʼ Dios (biindaʼ Filipenses 3:16). ¡Gástiruʼ sti cosa jma galán qué gúninu ni ná Jehová! (Salmo 84:10).
2. ¿Xi cadi naquiiñeʼ gusaana de gúniluʼ?
Neca maʼ caluxe guicaaluʼ estudiu, deruʼ peʼ nga cuzulú guibániluʼ casi ti xpinni Cristu. Ndiʼ nga ni ná Biblia caquiiñeʼ guni ca xpinni Cristu: «Laguibani modo racalaʼdxiʼ Dios casi ora ñácutu ti lari nacubi» (Efesios 4:23, 24). Pa qué gusaana de gúʼndaluʼ Stiidxaʼ Dios ne cheluʼ reunión la? zaziidiluʼ stale cosa de Jehová ne zunibiáʼ chaahuiluʼ ximodo nácabe. Biiyaʼ xi zanda gúniluʼ para gácaluʼ casi laabe. Ne pa caquiiñeʼ guchaarouʼ xiixa lu xquendanabániluʼ la? biʼniʼ ni, purtiʼ zacá zusiécheluʼ Jehová.
3. ¿Ximodo zacané Jehová lii chuʼluʼ jma gaxha de laa?
Biblia ná: «Dios [...] gunduuxeʼ entrenamientu stitu. Zuni laatu fiel, zuni laatu nadipaʼ ne zuzuhuaa laatu lu ti base naguidxi» (1 Pedro 5:10). Stale cosa nga ni zanda gucaa laanu gúninu ni cadi jneza, peru racané Jehová laanu para cadi guchéʼnenu laa (Salmo 139:23, 24). Cadi guiaandaʼ lii, Jehová peʼ zudii lii deseu ne poder para cadi gusaana de gúniluʼ ni ná (biindaʼ Filipenses 2:13).
GUIZÍʼDIRUNU JMA
Guidúʼyanu xi zanda gúniluʼ para chuʼluʼ jma gaxha de Jehová ne xi guiráʼ ndaayaʼ zudiibe lii.
4. Cadi gusaana de guiníʼneluʼ ne gucaadiágaluʼ amigu ni jma risaca nápaluʼ
Ni huayacané lii gaca xhamíguluʼ Jehová nga guni orarluʼ ne guni estudiarluʼ Biblia. ¿Ñee zanda gacaneruʼ ca ni lii chuʼluʼ jma gaxha de Jehová la? ¿Ximodo yaʼ?
Laguundaʼ Salmo 62:8 ne laiquiiñeʼ pregunta riʼ para güitu diidxaʼ:
-
Pa gúniluʼ ca oración stiluʼ jma galán, zacané ni lii chuʼluʼ jma gaxha de laabe. ¿Ximodo zanda gúniluʼ ni yaʼ?
Laguundaʼ Salmo 1:2 ne laiquiiñeʼ pregunta riʼ para güitu diidxaʼ:
-
Pa guni mejorarluʼ modo ruundaluʼ Biblia, zacané ni lii chuʼluʼ jma gaxha de Jehová. ¿Ximodo zanda gúniluʼ ni yaʼ?
Guidúʼyanu xi zanda gúniluʼ ora guni estudiarluʼ Biblia stúbiluʼ. Laguuyaʼ VIDEU riʼ. Despué laiquiiñeʼ ca pregunta riʼ para güitu diidxaʼ:
-
¿Xi bíʼyaluʼ lu videu ca ni ñuuláʼdxiluʼ ñúniluʼ?
-
¿Xi tema ñuuláʼdxiluʼ ñuni estudiarluʼ?
5. Gudixhe ique gúniluʼ jma lu xhiiñaʼ Jehová
Pa quixhe íqueluʼ gúniluʼ jma lu xhiiñaʼ Jehová zacané ni lii chuʼluʼ jma gaxha de laabe. Laguuyaʼ VIDEU riʼ ne laiquiiñeʼ pregunta riʼ para güitu diidxaʼ:
-
Ra gudixhe ique Cameron gapa meta, ¿ximodo gucané ni laabe?
Cadi guiráʼ diʼ tu laa zanda cheʼ chindeza sti guidxi para guni predicar. Peru guiranu zanda quíxhenu meta ni zanda ugaandanu. Laguundaʼ Proverbios 21:5 ne laguuyaʼ xi meta ñuuláʼdxiluʼ nugaandaluʼ...
-
... ndaaniʼ congregación.
-
... lu predicación.
¿Ximodo zanda gacané principiu ni zeeda lu Biblia riʼ lii ugaandaluʼ ca meta stiluʼ?
Ca meta ni zanda ugaandaluʼ
-
Zanda gúniluʼ ca oración stiluʼ jma galán.
-
Gúʼndaluʼ guidubi naca Biblia.
-
Gunibiaʼluʼ guiráʼ ca hermanu de congregación stiluʼ.
-
Gusiidiluʼ tuuxa de lu Biblia.
-
Gácaluʼ precursor auxiliar o regular.
-
Ne casi ca hombre la? zanda gúnicaʼ stipa para gácacaʼ siervu ministerial.
6. ¡Zanda guibániluʼ nayecheʼ!
Laguundaʼ Salmo 22:26 ne laiquiiñeʼ pregunta riʼ para güitu diidxaʼ:
-
¿Xi caquiiñeʼ gúniluʼ para guibániluʼ nayecheʼ yanna ne para siempre?
XI BIZÍʼDINU
Cadi gusaana de chuʼluʼ jma gaxha de Jehová ne gudixhe ique gápaluʼ meta ndaaniʼ xquídxibe. ¡Zacá zanda guibániluʼ nayecheʼ!
Xi biziidiluʼ
-
¿Xiñee zanda chuʼluʼ seguru zacané Jehová lii cadi gusaana de gúniluʼ ni ná?
-
¿Xi zanda gúniluʼ para chuʼluʼ jma gaxha de Jehová?
-
¿Xiñee nabé risaca gápaluʼ meta para chuʼluʼ jma gaxha de Jehová?
BIIYAʼ XIRUʼ ZANDA GUIZIIDILUʼ
¿Xi jma rusisaca Jehová: gúninu xiixa para gusihuínninu runi adorarnu laabe ti biaje si la? o gúninu ni nabe guiráʼ dxi?
Chinándanu ejemplu stiʼ Abrahán ne cadi gusaananu Jehová (9:20)
Dede tuuxa ni maʼ xadxí de cayuni ni ná Jehová zanda gusaana de chuʼ nayecheʼ. Biiyaʼ xi zanda gúniluʼ para chuʼluʼ nayecheʼ sti biaje.
Xi gucané naa guneʼ ni ná Jiobá ne guendanayecheʼ sti biaje (5:25)
¿Xi zacané lii quíxheluʼ meta ne ugaandaluʼ ni?
«Quíxhenu meta para gusisácanu ni bizáʼ laanu» (Torre stiʼ ni rapa, 15 de julio de 2004)
Biiyaʼ xiñee nabé risaca guiene chaahuiluʼ ni ná lu Stiidxaʼ Dios ne ximodo zanda gúniluʼ ni.
Laaca zándaca ziuuláʼdxiluʼ ca ndiʼ
CANI NABÉ RINABADIIDXAʼ BINNI
¿Ximodo runi estudiarné ca testigu stiʼ Jehová binni Biblia?
Zanda gacané ca testigu sti’ Jehová lii guiénelu’ Biblia jma nagueenda ne zanda iquiiñelu’ Biblia ni jma riuulá’dxilu’. Laaca zanda guni invitarlu’ familia stilu’ o tuuxa xhamígulu’.
