Maʼ bidúʼyanu caadxi cosa ni racané laanu gánnanu tuu nga Dios. Maʼ bizíʼdinu rusiidiʼ Biblia labe nga Jiobá ne cualidad stibe ni jma rihuinni nga guendarannaxhii. Laaca maʼ bidúʼyanu xi maʼ bíʼnibe ne xi chigúnibe pur binni guidxilayú. Peru cadi ngasi nga caquiiñeʼ gánnanu para gunibiaʼnu Dios, zándaca guinabadiidxaluʼ laaca lii pa risaca gunibiaʼluʼ laabe jma.

Cayuni prometer Jiobá lii pa guyúbiluʼ laa «zudiibe lugar guidxélaluʼ laabe» (1 Crónicas 28:9). Pa gúniluʼ stipa pur gunibiaʼluʼ laabe, zápaluʼ ti ndaayaʼ guizáʼ galán: zaca xhamíguluʼ laabe jma (Salmo 25:14). ¿Ximodo zacané amistad riʼ lii yaʼ?

Dxandipeʼ zabániluʼ nayecheʼ. Biblia ná naca Jiobá «ti Dios ni nayecheʼ» (1 Timoteo 1:11, TNM). Pa guidxíñaluʼ gaxha de Dios ne chinándaluʼ ejemplu stibe, dxandipeʼ zabániluʼ nayecheʼ ne nga zacané lii chuʼluʼ galán en sentidu físicu, mental ne emocional (Salmo 33:12). Laaca zacané ni lii para cadi gúniluʼ xiixa cosa malu ni zuniná lii, ne zacané ni lii guiaaluʼ gúniluʼ ni jneza ne ziuulaʼdxiʼ xcaadxi binni chuʼ gaxha de lii. Ne zaniʼluʼ casi guníʼ ti salmista: «Galán runeʼ sentir chuaaʼ gaxha de Dios» (Salmo 73:28).

Zapa Dios lii. Cayuni prometer Jiobá ca xhamigu ca diidxaʼ riʼ: «Zudieeʼ conseju lii ne qué zaxhaluáʼ luguialuʼ» (Salmo 32:8). Ndiʼ riníʼ rapa Jiobá cada tobi de ca xpinni ne rudiibe nipeʼ caquiiñecaʼ (Salmo 139:1, 2). Ora guiroobaʼ amistad napaneluʼ Jiobá zuuyaluʼ qué zusaanabe lii.

Zápaluʼ ti futuro galán. Cadi yanna si nga cayacané Jiobá lii para guibániluʼ nayecheʼ, laaca cayuni ofrecerbe lii ti futuro galán (Isaías 48:17, 18). Biblia ná: «Ne zacaa cabe enda nabani ca ra gunibiáʼ cabe lii ne ra gunibiáʼ cabe Jesucristu ni biseenda luʼ. Lii nga tobi lucha Dios ni dxandíʼ» (Juan 17:3). Zeeda gaca esperanza ni cudii Dios riʼ laanu casi ti ancla ni rinaazeʼ dxiichiʼ laanu ca tiempu nagana riʼ (Hebreos 6:19).

Cani bizéʼtenu riʼ nga caadxi si de ca ndaayaʼ ni zápanu pa gunibiaʼnu Dios ne gaca xhamígunu laa. Pa racaláʼdxiluʼ gánnaluʼ jma, runi invitardu lii guiníʼneluʼ ti testigu stiʼ Jiobá o chuʼluʼ lu sitiu nápadu lu Internet jw.org.