»Guizáʼ nachaʼhuiʼ ca Testigu que né binni, peru laaca guizáʼ nacháʼhuicabe né ca biʼcuhuiiniʼ stinneʼ. Ti dxi zuhuaa ti señora láʼ Elaine cueʼ carruhuiiniʼ que ne bidiibe chupa galleta ni ró biʼcuʼ ca biʼcuhuiiniʼ stinneʼ. Despué de ngue siempre ruxooñeʼ ca biʼcuhuiiniʼ stinneʼ ra nuu señora que para chitocaʼ galletahuiiniʼ.

»Gudiʼdiʼ chupa chonna beeu ne guizáʼ riuulaʼdxiʼ ca biʼcuhuiiniʼ que gudiicabe laacaʼ galleta ne naa la? neca ti ratu rinieniaʼ ca Testigu. Peru huaxiéʼ riuuladxeʼ gusiidicabe naa. Maʼ napaʼ jma de 70 iza ne huaxiéʼ runeʼ cré ni rusiidiʼ ca Testigu. Cumu biiyaʼ qué runi stale religión ni rusiidiʼ la? ngue runi guníʼ iqueʼ jma galán guundaʼ Biblia stubeʼ.

»Peru laaca biiyaʼ xcaadxi Testigu zuhuaanecaʼ carruhuiiniʼ sticaʼ xcaadxi lugar. Laaca nacháʼhuicaʼ. Siempre biquiiñecabe Biblia para bicábicabe ca pregunta stinneʼ, ngue runi jma gupaʼ confianza laacabe.

»Ti dxi gunabadiidxaʼ Elaine naa: “¿Ñee rábiluʼ ti regalu stiʼ Dios nga ca manihuiiniʼ ca la?” Para bicabeʼ labe: “Ti regalu pue”. Óraque biindanebe naa Isaías 11:6-9. Dede dxiqué bichaaʼ modo riníʼ iqueʼ, neca zaqué qué ninaʼyaʼ nicaaʼ nin ti publicación stícabe.

»Dede ca dxi que neca ti ratu si rinieniaʼ Elaine ne xheelaʼ, Brent. Peru nabé risaca ca tema ni rinidu. Gúdxicabe naa guundaʼ Mateo hasta Hechos para guieneʼ xi riníʼ chinanda ti binni ejemplu stiʼ Cristu. Ne zaqué bineʼ ni. Gudiʼdiʼ si caadxi dxi bidieeʼ lugar gudii Brent ne Elaine naa estudiu de lu Biblia. Bizaaca ni cuzeeteʼ riʼ lu iza 2016.

»Guizáʼ riuuladxeʼ gudiicabe naa estudiu de lu Biblia guiráʼ semana ne chaaʼ reunión ra Yoo stiʼ Reinu. Guizáʼ guyuaaʼ nayecheʼ ne bidieeʼ xquixe peʼ ca hermanu que pur bisiidicaʼ naa de lu Biblia. Gudiʼdiʼ si ti iza guyuaanisaʼ. Yanna maʼ napaʼ 79 iza ne nannaʼ ndiʼ nga neza ni dxandíʼ. Maʼ guluu Jehová ndaayaʼ naa purtiʼ maʼ guluube naa ndaaniʼ familia stibe ni runi ni nabe».