STI DXI laaca gudindené gunaa que laabe. Xi biʼniʼ Toñi yaʼ. Laabe nabe: «Guizáʼ feu ni bizaaca que ne cadi dxandíʼ diʼ cani gúdxibe naa que». Neca zaqué, gunabaʼ Toñi laabe gutiidiláʼdxibe laa sti biaje ne gudxi laabe riene modo nuube que.

Xi ñúniluʼ pa ñúnicabe lii zacá. Ñee ñúniluʼ stipa pur cadi nicábiluʼ ne ñácaluʼ nadóʼ la? Ñee ñaca nagana para lii nucueezuʼ lii la? Dxandíʼ, nagana nga gucueeza binni laa ora guidxaagalú ti guendanagana casi nga. Nagana nga gaca binni nadóʼ ora nuu tu racalaʼdxiʼ guchiichi laa ne ora nuu xizaa pur stale cosa.

Peru Biblia cayabi laanu gácanu binni nadóʼ. Ne ruchaaga ni ti binni ni galán modo laa ne nadóʼ né guendanuuxpiaaniʼ. Santiago 3:13 ná: «Pa nuu de laatu riene ne nuu xpiaani la? uluíʼ ni pur modo nabani sin udxiiba laca laa, ti ihuinni dxandíʼ riene» o nuu xpiaaniʼ. Xiñee riníʼ Biblia nga yaʼ. Ximodo nga rusihuinni binni napa guendanuuxpiaaniʼ ni zeeda  de Dios ora nadóʼ. Xi zacané laanu gápanu cualidad ni naquiiñeʼ gapa ca xpinni Cristo riʼ yaʼ.

Rindeteʼ ni xiana. «Ora ricabi binni né diidxaʼ nadóʼ la? rindeteʼ xiana, peru ora guiníʼ ti diidxaʼ ni runiná la? guizáʼ ruchiichi» (Proverbios 15:1).

Pa gúninu xiixa ora maʼ cadxiichinu la? zeeda gácani casi ora niguʼnu yaga lu gui ne guni laani guiroobaʼ xiixa guendanagana (Proverbios 26:21). Peru ora guicabi binni né diidxaʼ nadóʼ, racané ni para guiete xiana stiʼ. Ne pur laani zanda chuʼdxí ti binni ni cadxiichi.

Ne biiyaʼ Toñi dxandíʼ ni. Ora biiyaʼ gunaa que nuudxibe la? bizulú biinaʼ. Bisiene gunaa que laabe maʼ biaʼ qué gaca si ique né guirá guendanagana ni napa ne ni napané familia stiʼ. Gunda biʼniʼ predicar Toñi laabe ne bizulú bisiidiʼ laabe de Biblia; gunda bíʼnibe ni purtiʼ qué nidxiichibe ne gúcabe nadóʼ.

Riuʼnu nayecheʼ. «Dichoso ni nadóʼ purti zudii Dios laaca guidxilayú» (Mateo 5:5).

Stale binni maʼ bichaa modo laa ne maʼ bisaanacaʼ xiana sticaʼ ti ladu ne maʼ nácacaʼ binni nadóʼ ne nayecheʼ. Xiñee yaʼ. Purtiʼ jma maʼ galán modo nabánicabe ne cabézacabe guibánicabe jma galán (Colosenses 3:12). Adolfo, ti superintendente de circuito ni nuu España, gunda bichaa. Guidúʼyanu ximodo bibánibe ante.

Laabe guniʼbe: «Qué lica nisaca xquendanabaneʼ dxiqué. Qué rucueezaʼ naa, dede bidxibi caadxi xhamiguaʼ naa purtiʼ nabé feu modo ridxiicheʼ ne maca nuaaʼ tindeniáʼ binni. Ra guníʼ iqueʼ guchaaʼ modo naa que nga dxi bidiicabe xhoopaʼ puñalada naa lu ti guendaridinde. Bixhieeʼ ziáʼ rini, ne maʼ gastiʼ biaadxaʼ para ñateʼ».

Yanna la? rabi Adolfo binni gaca nadóʼ ne rúnibe stipa pur gácabe ti ejemplu para laacaʼ. Stale tu riuulaʼdxiʼ chuʼ gaxha de laabe yanna, purtiʼ nácabe ti binni ni nadxii xcaadxi ne galán modo ruiʼbe diidxaʼ. Nabé nayecheʼ nuube pur maʼ bichaabe modo laabe ne rudiibe xquíxepeʼ Jiobá pur gucané laabe gácabe ti binni nadóʼ.

Rusiecheʼ ni Jiobá. «Guluu xpiaanuʼ xiiñehuiineʼ ne bisiecheʼ ladxiduáʼ, ti ganda guicabeʼ ni cayuni burla naa» (Proverbios 27:11).

Nabé cucaalú Binidxabaʼ Jiobá. Ne neca ñanda nidxiichi Jiobá pur guiráʼ ni riníʼ Binidxabaʼ de laabe, Biblia ná «rindaa para guidxiichi[be]» (Éxodo 34:6). Ora gúninu stipa pur gápanu paciencia ne gácanu nadóʼ casi Jiobá, rusihuínninu nuu xpiaaninu ne nga nabé rusiecheʼ ni laabe (Efesios 5:1).

Nabáninu ndaaniʼ ti guidxilayú nabé malu ne pur nga zadúʼyanu binni ni «zuni ca laaca nandxóʼ ne zaca ca nayáʼ, ne zaguiñe yu ca stiidxa Dios, [...] zaníʼ ca binni. Qué zanda ucueeza ca laca laaca de guni ca ni na ique caʼ. Zuniná cabe binni» (2 Timoteo 3:2, 3). Peru cadi pur nga gusaananu de gúninu stipa pur gácanu binni nadóʼ. Stiidxaʼ Dios rabi laanu sicaríʼ: «Peru ni ma bisiene Dios laa la? [...] zaca nadóʼ ne ziuu razón» (Santiago 3:17). Pa nácanu binni nadóʼ ne riuʼnu razón la? zusihuínninu maʼ bisiene Dios laanu. Pa gudiʼnu lugar gusiene Dios laanu la? qué zacábinu ora chuʼ tu ugaanda laanu. Ne zadxíñanu jma gaxha de Jiobá, ra cadá guendanuuxpiaaniʼ.