GASTIRUʼ xiixa ni jma nadá que ti baʼduriʼniʼ. Ora gálenu riquiiñenu de bixhózenu ne jñaanu. Dxi cazíʼdinu sanu bidúʼyanu binni casi gigante para laanu. Ridxíbinu ne nagueendaca ruyúbinu bixhózenu o jñaanu. ¡Aque seguru runi sentirnu ora guinaazeʼ tobi de laacabe nanu!

Dxi gúcanu xcuidi la? biquiiñenu gannaxhii bixhózenu ne jñaanu laanu ne gacanecaʼ laanu para chuʼnu galán. Riuʼnu seguru ora gánnanu nadxiicabe laanu, ne ora rábicaʼ laanu biaʼsi cayúninu xiixa, rápanu confianza laca laanu ne jmaruʼ si galán rúninu ni.

Ora maʼ ziniisinu, laaca racané ca xhamígunu laanu para guni sentirnu seguru de laanu. Biʼniʼ sentirnu galán né laacaʼ ne qué nidxíbinu ñuunu scuela.

Galán nga pa guiráʼ cani nahuiiniʼ niniisi zacá. Peru nuu tu laa raca nagana para guidxela xhamigu, ne stale xcuidi qué rizaalaʼdxiʼ bixhoze ne jñaa laa. Melisa * guníʼ sicaríʼ: «Ora guuyaʼ foto ra cá ti familia cayúnicaʼ xiixa juntu, riníʼ iqueʼ: “Ñuuladxeʼ ñapaʼ ti familia zacá”». Zándaca zacaca runi sentirluʼ.

Zándaca qué ñuni sentirluʼ seguru ora ziniisiluʼ. Xiñee raʼbuʼ biʼniʼ sentirluʼ zacá yaʼ. Zándaca qué nusihuínnicabe pabiáʼ nadxiicabe lii dxi nahuiiniluʼ ne qué ñacanépecabe lii. O zándaca nabé gudinde bixhózeluʼ né jñaaluʼ ante guilaa xquendaxheelacaʼ ne riníʼ íqueluʼ lii napuʼ donda. O ni jma feu nga zándaca nabé gudíñecabe lii o gúdxicabe lii diidxaʼ ni bininá lii.

Ximodo zanda guniná ndiʼ ti xcuidi yaʼ. Ora jma maʼ ziniisícabe, nuu tu riaba lu viciu de cuba droga o xhudxi. Ne xcaadxi ruyubi guieeguʼ ti banda para guni sentir nuu lu ti grupu. Nuu tu laa racaluguʼ pur guidxela tu gannaxhii laa, ruzulú raca xnovio o xnovia tuuxa; peru huaxiéʼ rindaacaʼ, ne ora guilúxecaʼ jmaruʼ si qué riuucaʼ seguru de laacaʼ.

Dede nuu de cani nahuiiniʼ qué rápacaʼ confianza laca laacaʼ neca randa rireecaʼ de ca guendanagana riʼ. Casi Ana guníʼ: «Bineʼ sentir cadi jneza runeʼ guiráʼ cosa, purtiʼ ngue nga ni rabi jñaaʼ naa guiráʼ ora. Qué rietenaladxeʼ pa guyuu ti dxi gúdxibe naa biaʼsi bineʼ xiixa».

 Yanna, cadi modo si riniisi ti binni nga ni rucaa laa cadi chuʼ seguru de laa. Nuu biaje ora guilaa xquendaxheelaʼ bixhoze binni ne jñaa nabé runiná ni laa, o maʼ nagola o racalaʼdxiʼ guni xiixa ni maʼ qué zanda, guiráʼ nga rucaa tobi cadi chuʼ seguru de laa. Intiica cosa zanda gucaa lii chuʼluʼ triste ne cadi chuʼluʼ galán né xcaadxi binni. Xi zanda guʼnuʼ para cadi guniná cani lii yaʼ.

Zanda chuʼnu seguru cadi stúbinu nuunu. Nuu tobi ni zanda gacané laanu, laabe nga Dios, ne laapebe nuube gúnibe ni.

Biquiiñeʼ Dios profeta Isaías para guníʼ: «Cadi chuʼluʼ xizaa, purtiʼ naa nga Dios stiluʼ. Zudieeʼ stipa lii, ya, zacaniáʼ lii; dxandipeʼ naazeʼ dxiicheʼ lii né nayaʼ derechu» (Isaías 41:10, 13). Ratadxí ladxidoʼno gánnanu rinaaze Dios nanu. Nga runi, ¡cadi chuʼnu xizaa de gastiʼ!

Biblia ruzeeteʼ de caadxi xpinni Dios ni guyuu xizaa, peru gúnnacabe guinaazecabe nabe, gúpacabe confianza zacanebe laacaʼ. Ante gapa Ana Samuel, guníʼ ique maʼ qué zapa xiiñiʼ purtiʼ estéril laa, gupa xidé biʼniʼ huantarbe ora biʼniʼ búrlacabe laabe. Ngue runi, maʼ que ñobe ne nabé biinabe (1 Samuel 1:6, 8). Peru gúdxisibe Dios xi cayuni sentirbe, maʼ qué ñuurube xizaa (1 Samuel 1:18).

David, tobi de cani bicaa Salmo, stale biaje guyuu xizaa. Stale iza guzananda rey Saúl ñuuti laabe. Neca bilabe, guyuu biaje biʼniʼ sentirbe cayuuti ca guendanagana que laabe (Salmo 55:3-5; 69:1). Neca zaqué bicaabe ca diidxaʼ riʼ: «Nuudxi ladxiduáʼ ora gataʼ ne ora gaseʼ, purtiʼ lii, ya, lii si, Jiobá Dios stinneʼ, rápaluʼ naa» (Salmo 4:8).

Cásica Ana ne David gunábacaʼ gacané Dios laacaʼ para ganda guni huantarcaʼ ca yuubaʼ cadxagalucaʼ, ne laabe gucanebe laacaʼ (Salmo 55:22). Ñee zanda gúninu zacaca la?

1. Biziidiʼ gúʼyaluʼ Jiobá casi Bixhózeluʼ

Jesús guluu gana laanu gunibiaʼnu Bixhoze, «tobi lucha Dios ni dxandíʼ» (Juan 17:3). Apóstol Pablu cayabi laanu «gaxha doʼ nuu be de cada tobi de laanu» (Hechos 17:27). Nga runi, Santiagu guníʼ: «Laidxiña gaxha de Dios, ne laa zadxiña gaxha de laatu» (Santiago 4:8).

Para ganda gatadxí ladxidoʼno naquiiñeʼ gánnanu nadxii Bixhózenu ni nuu guibáʼ laanu ne rizaalaʼdxiʼ laanu. Dxandíʼ cadi casi ziuudinu nga zápanu confianza riʼ, peru nuu tu huayacané ni laa. Carolina guníʼ sicaríʼ: «Dxiruʼ gupaʼ confianza Jiobá, bidieeʼ cuenta napaʼ ti Bixhozeʼ ni zanda gabeʼ laa xi guiráʼ cayuneʼ sentir. Ngue gucané naa guneʼ sentir galán».

Sicaríʼ guníʼ Raquel: «Jiobá nga gucané naa cadi chuaaʼ xizaa dxi bisaana bixhozeʼ ne jñaaʼ naa. Rinieniáʼ laabe ne rinabaʼ laabe gacanebe naa gudxieeluáʼ ca guendanagana napaʼ. Ne qué nusaana de ñacanebe naa». *

2. Biyubi ca binni ni nadxii Dios gacané lii

Sicaríʼ gudxi Jesús ca discípulo stiʼ: «Laatu la? biʼchi irá tu» (Mateo 23:8). Ni gucalaʼdxiʼ Jesús nga gannaxhiisaacabe ne gácacabe ti familia naroʼbaʼ ni nadxii Dios (Mateo 12:48-50; Juan 13:35).

Ca testigu stiʼ Jiobá rúnicaʼ stipa pur gacanecaʼ, gannaxhiicaʼ ne quixhedxicaʼ ladxidóʼ cani caquiiñeʼ ni, casi runi ti familia (Hebreos 10:24, 25). Stale binni maʼ bidii cuenta zeeda gaca reunión stícabe casi ti pomada ni gusianda ra bininá tuuxa.

Eva guníʼ sicaríʼ: «Gupaʼ ti xhamigaʼ ndaaniʼ congregación ni biene naa né yuubaʼ cadideʼ que. Bicaadiágabe naa ne biindanebe naa Biblia ne biʼniʼ orarnebe naa. Biiyabe cadi guiaanaʼ stubeʼ. Gucanebe naa cueeʼ guiráʼ ni nuu ndaaniʼ ladxiduáʼ. Pur gucanebe naa gunda bineʼ sentir jma segura de naa». Raquel na: «Beeda gaca ca hermanu de congregación casi jñaaʼ ne bixhozeʼ. Rusihuínnicabe nadxiicabe naa ne racanécabe naa gatadxí ladxiduáʼ».

3. Gunnaxhii ne guca nachaʼhuiʼ

Ora nadxiinu binni stale tu ridxiña laanu. Sicaríʼ guníʼ Jesús: «Jma nayeche ni rudii que ni ricaa»  (Hechos 20:35). Pa gúninu zacá zadúʼyanu jma zannaxhiicabe laanu ora guluinu nadxiinu binni. Nga runi, gudxi Jesús ca discípulo stiʼ sicaríʼ: «Lagacané stobi de ni caquiiñeʼ, ne laca zacané Dios laatu de ni caquiiñe tu» (Lucas 6:38).

Ora rannaxhiinu ne rannaxhiicabe laanu la? qué zadxíbinu. Purtiʼ casi ná Biblia «qué ziuu dxi initilú enda ranaxhii» (1 Corintios 13:8). Sicaríʼ guníʼ María: «Nannaʼ cadi dxandíʼ diʼ guiráʼ cosa feu ni riníʼ iqueʼ de laaca naa. Ni racané naa para cadi guiníʼ iqueʼ zaca nga gacaniáʼ stiʼ binni, ne zacá maʼ qué ridxibediáʼ. Nabé galán runeʼ sentir ora guneʼ xiixa pur stobi».

Guionnaʼ cosa bizéʼtenu ca cadi magia diʼ cani para guni chaahuiʼ cani ca guendanagana stinu nagueendaca, peru zanda gacané cani laanu. Sicaríʼ na Carolina: «Dede yanna qué riuaapiaʼ segura de naa. Peru jma maʼ napaʼ confianza zanda guneʼ xiixa. Nannaʼ rizaalaʼdxiʼ Jiobá naa ne napaʼ stale xhamiguaʼ ni racané naa chuaaʼ segura». Laaca zacagá nga guníʼ Raquel: «Gatigá riuaaʼ triste. Peru runebiaʼyaʼ stale hermanu ni zanda guinabaʼ conseju. Laacabe nabé racanécabe naa chuaaʼ nayecheʼ. Ne ni jma galán nga rinieniáʼ Dios, Bixhozeʼ ni nuu guibáʼ, guiráʼ dxi. Ne ndiʼ nga ni racané naa».

Peru nuu ti cosa ni zuni chaahuiʼ ca guendanagana ca. Biblia ruzeeteʼ maʼ cadi candaa zaca Guidxilayú riʼ ti paraísu ra ziuʼnu seguru guiranu. Stiidxaʼ Dios na: «Zabí cada tobi de laacaʼ xaʼnaʼ lubáʼ uva ne xaʼnaʼ yaga duʼgaʼ stiʼ, ne qué ziuu tu guchibi laacaʼ» (Miqueas 4:4). Maʼ guirutiʼ zuchibi laanu ne guniná laanu. Ne dede zusiáʼndanu cani nabé bininá laanu dxiqué (Isaías 65:17, 25). Dios ne Xiiñiʼ, Jesucristu, zuuyacaʼ gaca ni jneza. Ziuu guendariuudxi ne maʼ guirutiʼ zadxibi (Isaías 32:17).