1, 2. a) ¿Xiñee nánnanu zanda gusihuínninu maʼ gadxé laanu? b) ¿Gunáʼ nga ca cualidad zeeda lu Colosenses 3:10-14 ni rusihuinni maʼ gadxé laanu?

CA DIIDXAʼ «ma adxé laatu yanna» zeeda cani chupa biaje lu Stiidxa Dios Didxazá (Efes. 4:24; Col. 3:10). Caníʼ cani de ti binni ni ribani «modo naguixhe Dios». Peru ¿ñee zanda gácanu gadxé la? Zanda, purtiʼ bizáʼ Jiobá laanu casi laa. Nga runi, zanda gusihuínninu ca cualidad sicarú ni nápabe (Gén. 1:26, 27; Efes. 5:1).

² Dxandíʼ, guiranu bisaanané Adán né Eva guendaruchee ne pur nga rúninu ni cadi jneza. Cani nuu gaxha de laanu laaca zanda gucaa cani laanu gúninu xiixa. Peru zanda gácanu clase binni ni racalaʼdxiʼ Jiobá purtiʼ laabe racanebe laanu né stale guendarannaxhii. Para cadi gusaana de guicá íquenu gácanu clase binni ca la? lu tema riʼ zazíʼdinu de stale cualidad ni zacané laanu gusihuínninu maʼ gadxé laanu casi bizeeteʼ Pablo lu Biblia (biindaʼ Colosenses 3:10-14). Laaca zadúʼyanu ximodo gusihuínninu cani ora guni predicarnu.

3. ¿Xi cualidad risaca napa ca binni ni maʼ gadxé laacaʼ?

³ Despué de guluu Pablo gana laanu gusihuínninu maʼ gadxé laanu, bizeetebe ti cualidad risaca ni napa ca binni ni maʼ gadxé laacaʼ: biaʼca risaca guiráʼ binni para laacaʼ. Sicaríʼ guniʼbe lu Colosenses 3:11: «Ma gasti naca pa judíu binni o pa cadi judíu, nin pa uca circuncidar o pa coʼ. Gasti naca pa de adxé guidxi, ne pa qué ganna gastíʼ, nin pa esclavu o pa coʼ». * Nin tobi de cani nuu ndaaniʼ congregación cadi naquiiñeʼ guni sentircaʼ jma risácacaʼ pur raza sticaʼ, pur xquídxicaʼ o purtiʼ si jma nápacaʼ bueltu que xcaadxi. ¿Xiñee yaʼ? Purtiʼ cani dxandíʼ xpinni Cristu nuucaʼ tobi si (Gál. 3:28).

4. a) ¿Ximodo naquiiñeʼ guni tratarsaa ca xpinni Dios laacaʼ? b) Laanu ca xpinni Cristu, ¿xi zanda gucueeza para cadi chuʼnu tobi si?

⁴ Ora ruchaʼnu modo laanu runi tratarnu guiráʼ binni né respetu ne qué rúninu menu laacaʼ pur raza sticaʼ, pa ricu o pa pobre laacaʼ (Rom. 2:11). Nuu lugar lu Guidxilayú nagana raca para binni guni ni. Casi dxiqué la? guleechú gobiernu stiʼ Sudáfrica cada raza binni. Guyuu barriu ra guleza binni de raza blancu, guyuu guidxihuiiniʼ ra guleza ca binni de raza negru ne guyuu ra guleza ca mestizu. Casi guiráʼ ca Testigu dede yanna nabézarucaʼ ca lugar ca. Peru Grupu ni zaniruʼ nuu cuʼ gana ca hermanu ca para chinándacaʼ conseju ni zeeda lu 2 Corintios 6:13 ra ná: «Rinaba laatu ganaxhii tu». Nga runi, lu beeu octubre 2013 guluucabe ti programa especial para gunibiáʼ chaahuiʼ ca hermanu que laacaʼ. ¿Xi caquiiñeʼ guni ca hermanu que yaʼ?

5, 6. a) ¿Xi bíʼnicabe ndaaniʼ ti guidxi para ganda chuʼ ca hermanu tobi si? (Biiyaʼ foto ni zeeda ra ruzulú tema riʼ). b) ¿Xi huabeendúcabe pur laani?

⁵ Programa que rinabaʼ ni ca hermanu de chupa congregación de gadxé gadxé idioma o raza chuʼcaʼ juntu ca fin de semana. Runi predicárcabe juntu riécabe reunión juntu ne runi invitársaacabe laacabe ra lídxicabe. Gayuaa congregación yenanda programa riʼ. Stale binni biseendaʼ comentariu galán ra nuu sucursal que dede né cani cadi Testigu. Casi ti ministru religioso guníʼ: «Cadi Testigu diʼ naa, peru zanda guinieeʼ nexheʼ chaahuiʼ dxiiñaʼ rúnitu ne ládetu randa riuu binni de gadxé gadxé raza tobi si». ¿Ximodo gucané programa riʼ ca hermanu yaʼ?

⁶ Nacubi que la? qué ninagá ti hermana láʼ Noma, ni riníʼ idioma xhosa, ñuni invitar ca hermanu hueru de congregación inglés ra lidxi. Peru despué de biʼniʼ predicárnebe laacaʼ ne yenebe laacaʼ ra lídxibe, guniʼbe: «¡Casi laanu laacabe! ¡Binni normal laacabe!». Ngue runi, ora guca caber congregación stibe guidxaagalú ca hermanu de congregación inglés, bíʼnibe ti guendaró ne biʼniʼ invitarbe chupa chonna de laacaʼ ra lídxibe. Tobi de ca hermanu ni guyé ra lídxibe que hueru laa ne naca ancianu. Hermana riʼ guníʼ: «Guizáʼ bidxagayaaʼ purtiʼ qué ñácabe nadá ora guribe lu ti caja de plásticu dede biaʼ qué nibísibe layú». Dede yanna nuuruʼ programa riʼ. Ne pur laani huadxela stale hermanu ne hermana jma xhamígucaʼ ne caruʼ íquecaʼ gunibiáʼ chaahuicaʼ ca hermanu de gadxé gadxé raza ne cultura.

7. ¿Xiñee cadi naquiiñeʼ gusaananu de guianu binni?

⁷ Laga nabánirunu lu guidxilayú stiʼ Binidxabaʼ riʼ, zadídirunu lu guendanagana pur  gastiʼ dxiiñaʼ, pur ca guendahuará malu, pur sanándacabe laanu, pur ca desastre natural, pur ca gubaanaʼ ne xcaadxi guendanagana. Caquiiñeʼ guni sentirnu dxandíʼ rianu para ganda gacanésaanu laanu. Ora rianu binni zucaa ni laanu gácanu nachaʼhuiʼ né laacaʼ (Efes. 4:32). Ca cualidad ni rapa binni ora maʼ bichaa, racané cani laa gusihuinni naca casi Dios ne pur laacani zanda quixhedxí ladxidóʼ xcaadxi (2 Cor. 1:3, 4).

8. ¿Xi zabeendunu pa guianu guiráʼ cani nuu ndaaniʼ congregación stinu ne pa gácanu nachaʼhuiʼ né laacaʼ? Bizeeteʼ ti ejemplu.

⁸ Zándaca nuu hermanu ni zeeda de sti guidxi o ni qué gápapeʼ bueltu ndaaniʼ congregación stinu. ¿Ximodo gusihuínninu nacháʼhuinu né laacabe yaʼ? Ra gaca xhamígunu laacabe ne ra gacanenu laacabe guiénecabe risácacabe ndaaniʼ congregación (1 Cor. 12:22, 25). Guidúʼyanu ni bizaaca Dannykarl, ti hermanu de Filipinas ni yebíʼ Japón. Ra rúnibe dxiiñaʼ, qué ñuni tratárcabe laabe galán casi runi tratárcabe ca japonés. Peru ti dxi guyebe ti reunión stiʼ ca testigu stiʼ Jiobá. Laabe rietenaláʼdxibe: «Casi guiráʼ binni nuu raqué japonés laacaʼ. Peru bidxagalucaʼ naa né stale cariñu, casi ora maca runibiaʼcaʼ naa». Qué nusaana ca hermanu que de ñácacaʼ nachaʼhuiʼ né laabe ne ngue gucané laabe gaca xhamígube Dios. Guyuunísabe ne yanna riʼ maʼ nácabe ancianu. Xcaadxi ancianu que nacaʼ, laabe ne xheelabe Jennifer, guizáʼ racanécabe congregación. Laacaʼ guniʼcaʼ: «Huaxiéʼ cosa riquiiñeʼ guendaxheelaʼ riʼ para guibánicaʼ ne ejemplu stícabe rusihuinni ni dxandíʼ ruyúbicabe Reinu stiʼ Dios primé» (Luc. 12:31).

9, 10. ¿Xi ndaayaʼ maʼ gucuaa caadxi hermanu pur riacaʼ binni ora guni predicarcaʼ?

⁹ Ora chiguni predicarnu nga nápanu oportunidad gusihuínninu nacháʼhuinu né guiráʼ binni (Gál. 6:10). Stale Testigu maʼ bizulucaʼ caziidicaʼ stiʼ idioma nacubi purtiʼ riacaʼ ca binni ni bedabíʼ xquídxicaʼ (1 Cor. 9:23). Ne galán cani huabeendúcabe pur laani. Casi ti precursora de Australia láʼ Tiffany, rapa gana gacané ti congregación ra riníʼcabe suajili ndaaniʼ guidxi Brisbane. Neca guca nagana para laabe guiziidibe idioma que, peru gucané ni laabe guibánibe jma nayecheʼ. Laabe guniʼbe: «Tutiica gacalaʼdxiʼ gapa experiencia galán lu predicación la? naquiiñeʼ chiguni servir ndaaniʼ ti congregación de sti idioma. Zeeda gaca ni casi ñuni binni ti viaje sin niree de xquidxi. Ne ziuuláʼdxiluʼ pabiáʼ sicarú modo riuu ca hermanu tobi si».

¹⁰ Yanna guidúʼyanu ni bizaaca ti familia de Japón. Xiiñicabe gunaa ni láʼ Sakiko, guníʼ: «Lu década stiʼ iza 1990, nabé bidxéladu binni brasileñu ni bixooñelú de xquidxi ora  maʼ canayuni predicardu. Ora ridúʼndanedu laacabe textu casi Apocalipsis 21:3, 4 o Salmo 37:10, 11, 29, lu Biblia stícabe ni nuu lu diidxaʼ portugués, rucaadiaga chaahuicabe ne nuu biaje dede ruunacabe». Cumu nabé riá familia riʼ binni la? ngue bicaa laacaʼ guyúbicaʼ modo gacanérucaʼ. Sakiko guniʼruʼ: «Ora bidúʼyadu pabiáʼ racaláʼdxicabe gunibiáʼcabe Jiobá, gudixhe íquedu guni estudiardu portugués». Gudiʼdiʼ si ti tiempu, gucanécabe gaca ti congregación de diidxaʼ portugués. Yanna ra maʼ gudiʼdiʼ iza, maʼ gucanécabe stale binni ni yebíʼ xquídxicabe gácacaʼ xpinni Jiobá. Sakiko, guníʼ: «Gupa xidé bínidu stipa para bizíʼdidu idioma riʼ, peru pur ca ndaayaʼ ni maʼ gucuaadu riénedu biaʼsi ngue bínidu. Rudiʼdu xquíxepeʼ Jiobá» (biindaʼ Hechos 10:34, 35).

11, 12. a) ¿Xi naquiiñeʼ gucaa laanu gácanu gadxé? b) ¿Xi zacané laanu para cadi gusaana de gácanu humilde?

¹¹ Ni naquiiñeʼ gucaa laanu gácanu gadxé nga gusisácanu Jiobá ne cadi para gusisaca binni laanu. Cadi guiaandaʼ laanu bichee ti ángel perfectu purtiʼ bichá bi yanni (bichaaga ni né Ezequiel 28:17). Yanna laanu la? jmaruʼ si nagana raca para laanu cadi guchanu bi yánninu purtiʼ imperfectu laanu. Neca zacá, zanda gácanu humilde. ¿Ximodo yaʼ?

¹² Naquiiñeʼ cueenu tiempu guidúʼndanu Biblia guiráʼ dxi ne guiníʼ íquenu ni ridúʼndanu (Deut. 17:18-20). Ti cosa ni zacané laanu stale nga guiníʼ íquenu cani bisiidiʼ Jesús ne ejemplu galán bisaanabe ra bisihuínnibe humilde laabe (Mat. 20:28). Guizáʼ humilde gúcabe dede gudiibibe ñee ca apóstol stibe (Juan 13:12-17). Laaca naquiiñeʼ guinábanu Dios gudii laanu espíritu santu stiʼ gatigá ti ganda gudxíʼlunu intiica cosa ni gucaa laanu guni sentirnu jma risácanu que xcaadxi (Gál. 6:3, 4; Filip. 2:3).

13. ¿Xi ndaayaʼ zacaanu pa humilde laanu?

¹³ (Biindaʼ Proverbios 22:4). Ni racalaʼdxiʼ Jiobá nga gaca guiráʼ xpinni humilde. Pa gápanu cualidad riʼ, zacaanu stale ndaayaʼ. Zacanenu chuʼ congregación tobi si ne cadi chuʼdíndecaʼ. Ne Jiobá zaca nachaʼhuiʼ né laanu neca qué runi merecernu ni. Apóstol Pedro guníʼ: «Ne irá tu laizaalaʼdxi saa, sin udxiiba tu laca laatu, purti cá lu guiʼchi ra na ni: “Nanalaʼdxi Dios ni runi cani rudxiiba laca laa, peru racané be cani qué rudxiiba laca laa”» (1 Ped. 5:5).

14. ¿Tu binni nga ni jma napa paciencia ne ni jma nadóʼ ni zanda chinándanu ejemplu stiʼ?

¹⁴ Yanna riʼ, nuu tu laa ruuyaʼ ca binni nadóʼ ne cani napa paciencia casi tuuxa ni qué gapa stipa para gaca defender. Peru cadi zacá diʼ ni. Ca cualidad sicarú riʼ zeeda cani de Jiobá, binni ni jma napa poder lu guidubi naca universu. Ejemplu stibe nga jma naquiiñeʼ chinándanu, purtiʼ laabe nga ni jma napa paciencia ne ni jma nadóʼ (2 Ped. 3:9). Ne ridúʼyanu zacá ni pur modo bicábibe cani gunabadiidxaʼ Abrahán ne Lot laabe ra biquiiñebe ca ángel (Gén. 18:22-33; 19:18-21). Ne laaca ridúʼyanu pabiáʼ gúpabe paciencia guidxi Israel jma de ti mil gaayuʼ gayuaa iza neca qué nuzuubacaʼ diidxaʼ (Ezeq. 33:11).

15. ¿Xi ejemplu bidii Jesús laanu?

¹⁵ Jesús guca ti binni nabé nadóʼ (Mat. 11:29). Nabé gúpabe paciencia ca discípulo stibe ora cucheecaʼ. Dxi guyuube lu Guidxilayú biʼniʼ huantarbe guiráʼ ca xaíque yuʼduʼ, ca xhenemígube, ora guniʼcaʼ mal de laabe ne ora gundísacaʼ falsu luguiabe neca qué gápabe donda. Laaca gúcabe nadóʼ ne gúpabe paciencia dede dxi gútibe. Laga cadíʼdibe yuubaʼ naná lu yaga ra cabe que gunábabe Jiobá guni perdonar cani cayuuti laabe. Laabe guniʼbe: «Qué ganna cabe xi  cayuni cabe» (Luc. 23:34). Casi maʼ bidúʼyanu ca, guca Jesús nadóʼ ne gupa paciencia neca nabé naná yuubaʼ ni cadiʼdiʼ. ¡Guizáʼ galán ejemplu bisaanabe para laanu! (Biindaʼ 1 Pedro 2:21-23).

16. ¿Ximodo zanda gusihuínninu nácanu binni nadóʼ ne nápanu paciencia yaʼ?

¹⁶ ¿Ximodo zanda gusihuínninu nácanu binni nadóʼ ne nápanu paciencia yaʼ? Ti modo zanda gúninu ni nga guni perdonarnu xcaadxi. Pablo bicaa ra nuu ca xpinni Cristu: «Cadi gusaana de guni huantarsaatu, ne laguni perdonar de guidubi ladxidoʼto pa tuuxa napa xiixa queja né laatu. Cásica biʼniʼ perdonar Jiobá guiráʼ xixetu, zacaca laguni» (Col. 3:13, TNM). Rihuinni dxíchica caquiiñeʼ gácanu nadóʼ ne gápanu paciencia para chinándanu ni ná mandatu riʼ. Ra gúninu ni, zacanenu chuʼ congregación tobi si.

17. ¿Xiñee nabé risaca gaca binni nadóʼ ne gapa paciencia?

¹⁷ Rinabaʼ Jiobá laanu gácanu binni nadóʼ ne gápanu paciencia. Caquiiñeʼ gápanu ca cualidad riʼ pa racaláʼdxinu guibáninu lu guidxilayú cubi (Mat. 5:5; Sant. 1:21). Ne ni jma risaca nga racané cani laanu gusisácanu Jiobá ne gacanenu xcaadxi binni gúnicaʼ ni rusiidiʼ Biblia (Gál. 6:1; 2 Tim. 2:24, 25).

18. ¿Xiñee ruluinu nadxiinu binni ora runi tratarnu laacaʼ tobi si?

¹⁸ Para gápanu guiráʼ cualidad ni maʼ bizéʼtenu lu tema riʼ caquiiñeʼ gápanu guendarannaxhii. Casi discípulo Santiago la? gupa xidé guluu jnézabe ca hermanu stibe purtiʼ jma galán runi tratarcaʼ ca ricu que ca pobre. Bisiénebe laacaʼ cadi zacá diʼ ná mandatu zeeda de Dios riʼ: «Gunaxhii stobi cásica nadxii lu lii». De raqué guniʼbe: «Peru pa rulabi tu tobi jma que stobi la? cuchee tu» (Sant. 2:8, 9). Pa nadxiinu sti binni, qué zúninu menu laa tisi huaxiéʼ guyé scuela, pur raza stiʼ, o huaxiéʼ napa bueltu. Cadi ti luguiá si caquiiñeʼ gusihuínninu qué rúninu menu binni, sínuque guihuinni dxandíʼ nácanu binni ni qué runi menu stobi.

19. ¿Xiñee naquiiñeʼ gannaxhiinu binni?

¹⁹ Ti binni ni nadxii stobi la? «qué zadxiichi né gá» tuuxa «ne ziá» o zaca nachaʼhuiʼ né laabe (1 Cor. 13:4). Nga runi caquiiñeʼ gápanu paciencia, gácanu nachaʼhuiʼ ne gácanu humilde para cadi gusaana de chinenu stiidxaʼ Reinu ra nuu binni (Mat. 28:19). Racané ca cualidad riʼ laanu chuʼnu galán né guiráʼ hermanu de ndaaniʼ congregación stinu. Pa guiranu gusihuínninu guendarannaxhii la? ziuu ca congregación ca tobi si ne zusisaca cani Jiobá. Ne ziuulaʼdxiʼ xcaadxi binni guiziidiʼ ni dxandíʼ. Nga runi, maʼ para guiluxe gusiene Biblia xi guiráʼ caquiiñeʼ guni binni para guihuinni maʼ gadxé laa, ruzeeteʼ ni ca diidxaʼ riʼ: «Peru jma naquiiñe ganaxhii saa tu, purti zacá zaca pe tu tobi si» (Col. 3:14).

20. a) ¿Xi naquiiñeʼ guinabadiidxanu ne xiñee? b) ¿Xi cabézanu né stale gana?

²⁰ Guiranu naquiiñeʼ guinabadiidxanu: «¿Xiruʼ zanda guneʼ para gusaanaʼ modo gucaʼ dxiqué tobi si tiru yaʼ?». Naquiiñeʼ guinábanu Jiobá gacané laanu ne gúninu stipa biaʼ gándatiʼ pur gusaananu ca cosa ni zucueeza laanu de guicaanu Reinu stiʼ Dios, cásica cani riníʼ íquenu zaqueca cani rúninu (Gál. 5:19-21). Laaca naquiiñeʼ guinabadiidxanu: «¿Ñee cayúneruaʼ stipa pur guchaaʼ modo riníʼ iqueʼ para gusiecheʼ Jiobá la?». Laga nácarunu imperfectu, qué zusaananu de gúninu stipa pur gusihuínninu maʼ nacúbinu ne maʼ gadxé laanu (Efes. 4:23, 24). ¡Guizáʼ sicarú zabáninu ora maʼ gaca guiráʼ binni perfectu ne maʼ qué gusaana de gusihuínninu gadxé laanu!