Zanda gacané ca binnilídxinu laanu, ca xhamígunu ne ca xpinni Cristu, purtiʼ riguucabe gana laanu ne rusiéchecabe ladxidoʼno ti ganda guni huantarnu.

Ca diidxaʼ sicarú ni gabi ti xhamígunu laanu zanda gacané cani ne uguu cani gana laanu (Prov. 16:24; 18:24; 25:11). Peru laanu, cani dxandíʼ xpinni Cristu, qué ribézasinu chuʼ tu gusiecheʼ ladxidoʼno, sínuque laaca ruyúbinu modo «usieche nu stobi ni cayacaná ladxidóʼ, cásica bisieche [Dios] laanu» (2 Cor. 1:4; Luc. 6:31). Antonio, ti superintendente de distrito de Méjicu bidii cuenta dxandíʼ ni na ca diidxaʼ bizéʼtenu riʼ.

Dxi bihuinni nápabe linfoma —ti tipu de cáncer lu rini—, nabé guyuube triste. Neca zaqué biyúbibe xi gúnibe para cadi guihuinni pabiáʼ naná nuube. Xi bíʼnibe yaʼ. Bietenaláʼdxibe caadxi diidxaʼ riuundaʼ stiʼ Reinu, biindabe cani ne guníʼ íquebe xi cusiidiʼ cani laabe. Laaca biecheʼ ladxidoʼbe ora biʼniʼ orarbe ne ora bíʼndabe Biblia.

Peru bidii Antonio cuenta jma gucané ca xpinni Cristu laa. Laabe guniʼbe: «Ora maʼ qué ganda guni huantardu, naa ne xheelaʼ rinábadu ti binnilídxidu ni naca binnigola lade ca binni ridagulisaa, para gueeda guni orarné laadu. Nabé guluu ngue gana laadu ne riguixhedxini ladxidoʼdo. Cumu gucané ca binnilídxidu ne ca xpinni Cristu laadu la? qué nindaa guyuʼduʼ nayecheʼ sti biaje». ¡Guizáʼ galán biʼniʼ sentirbe purtiʼ nápabe xhamígube ni rizaalaʼdxiʼ laabe ne rusihuínnicaʼ pabiáʼ nadxiicaʼ laabe!

Nuu sti cosa ni zanda gacané laanu ora cadídinu ra nagana, laani nga espíritu santu, ni guníʼ apóstol Pedru cusigaʼdeʼ Dios laanu (Hech. 2:38). Ne bihuinni dxandíʼ ni bizéʼtenu riʼ dxi biquiiñeʼ Dios espíritu santu para gulí stale de ca discípulo lu Pentecostés stiʼ iza 33 despué de ca dxi stiʼ Jesús. Peru laaca zanda gacané espíritu santu laanu yanna ne naquiiñeʼ guinábanu biaʼ caquiiñenu. Yanna, xiñee qué guinábanu Dios gudii laanu espíritu stiʼ ne gudii laanu jma que biaʼ caquiiñenu yaʼ (Is. 40:28-31).

Nabé biʼniʼ huantar apóstol Pablu stale guendanagana, dede bilá ñátibe chupa chonna biaje (2 Cor. 1:8-10). Peru qué nidxíbibe guendaguti, purtiʼ nánnabe cayacané Jiobá laabe. Guidúʼyanu xi bicaabe: «Udíʼ nu diuxquixe Dios, Bixhoze Jesucristu Señor stinu, purti laca Bixhoze nu laa ne riá laanu. Laabe nga Dios stinu ne riguixhe dxí be ladxidóʼ no. Rusieche be laanu ora tiica acaná ladxidóʼ no» (2 Cor. 1:3, 4). Qué nudii Pablu lugar nusidxaga ca guendanagana que laa, sínuque gucanécani laabe para ganda guiénebe ximodo nuu ca bíʼchibe ne ca bizáʼnabe. Zaqué nga gunda guyuube listu para gusiéchebe ladxidóʼ cani nuu triste.

Bianda si Antonio de guendahuará stiʼ, guca binnigola ni riganna ca neza binni ridagulisaa sti biaje. Nabé bizaaláʼdxibe guiráʼ ca xpinni Cristu dxiqué, peru yanna, laabe ne xheelabe jma rúnicabe stipa para chigánnacabe ne uguucabe gana ca xpinni Cristu ni huará. Ti biaje, dxi yegánnabe ti Testigu ni napa ti guendahuará malu, bidiibe cuenta maʼ qué gapa hombre que gana guidagulisaané ca xpinni Cristu. Guidúʼyanu xi guníʼ Antonio: «Nadxiiruʼ hombre que Jiobá ne ca xpinni Cristu, peru nabé maʼ bininá guendahuará que laabe, dede riníʼ íquebe maʼ pur gana si nabánibe».

Para gunda guluu Antonio gana laabe la? gudxi laabe gúnibe ti oración ra guca ti reunión social. Neca guníʼ íquebe qué zanda gúnibe ni, guniʼbe zúnibe ni. Antonio rietenalaʼdxiʼ: «Guizáʼ sicarú oración bíʼnibe, ne despué maʼ qué nihuinni pa laabe ngue hombre ni huará que. Biʼniʼ sentirbe maʼ zanda gúnibe dxiiñaʼ ni gusiecheʼ laabe».

Cadi guiaandaʼ ndiʼ laanu: guiranu raca huaranu, ne nuu biaje nabé runiná xiixa guendahuará malu laanu. Peru casi guníʼ Pablu que, ca yuubaʼ ridídinu riʼ racanécani laanu para ganda gusiéchenu xcaadxi binni. Nga runi, guizaaláʼdxinu ca bíʼchinu ne ca bizáʼnanu ni cayacaná ne chinándanu ejemplu stiʼ Jiobá ra gusiéchenu ladxidóʼ binni.