1, 2. Xi zuni Reinu stiʼ Dios. 2)Xiñee nanna dxíchinu zeeda Reinu stiʼ Dios.

LU PRIMAVERA stiʼ iza 31, dxi nuu Jesús lu ti dani gaxha de Capernaum, bisiidibe ca discípulo stibe guinábacaʼ lu oración: «Biseendaʼ reinu stiluʼ» (Mat. 6:10, TNM). Ca dxi stinu riʼ, stale binni qué runi cré diʼ pa ziuu dxi gueeda Reinu riʼ. Peru laanu nanna dxíchinu zadxiña dxi zaca ni na ca diidxaʼ riʼ.

² Zaquiiñeʼ Jiobá Reinu riʼ para chuʼ guiráʼ xiiñiʼ tobi si, cásica cani nuu guibáʼ zaqueca cani nuu lu Guidxilayú. Nánnanu zaca cani bizéʼtenu ca (Is. 55:10, 11). Ne laaca nánnanu, ¡maʼ beeda gaca Jiobá Rey ca dxi stinu riʼ! Ne zacá ni pur ca cosa ni nabé ridxagayaanu ni bizaaca lu ti gayuaa iza ni maʼ gudiʼdiʼ ca. Ne cayúnibe caadxi cosa nabé sicarú para millón de ca xpínnibe ni ruzuubaʼ stiidxabe (Zac. 14:9; Apoc. 15:3). Naquiiñeʼ gánnanu gadxé nga ora guzéʼtenu maʼ beeda gaca Jiobá Rey ne gadxé nga ora rieeteʼ maʼ cadi candaa zeeda Reinu stibe ni bizeeteʼ Jesús que. Xiñee rininu maʼ gadxé cani, ne xiñee naquiiñeʼ gánnanu de laacani yaʼ.

3. 1) Padxí bizulú biʼniʼ mandar Jesús ne paraa. 2) Ximodo zanda gusiéneluʼ bizulú biʼniʼ mandar Jesús lu iza 1914. (Biiyaʼ ni cá ñee yaza.)

³ Ra maʼ ziluxe siglu XIX bizulú biene ca xpinni Jiobá ca diidxaʼ riguixhená ni bicaa Daniel raca chupa mil gaayuʼ gayuaa iza. Laa bicaa: «Ne dxi stiʼ ca rey que la? Dios ni nuu guibáʼ zucuí  ti reinu ni qué ziuu dxi guinitilú» (Dan. 2:44). Stale iza ante de 1914 ca Binni Ruundaʼ Biblia maca caniʼcaʼ nabé zaca stale cosa risaca lu iza ca. Ca binni de dxiqué guníʼ íquecaʼ zazaaca stale cosa galán ca iza zeeda que. Ti hombre ni rucaa libru guníʼ sicaríʼ: «Nabé galán bibani binni iza 1914, guníʼ íquecaʼ zazaaca stale cosa galán». Peru iza que, guca primé guendaridinde lu guidubi Guidxilayú. ¡Guca ni na ca diidxaʼ riguixhená que! Despué, qué ñuu ni ñó binni, guca xu ne guyuu stale clase guendahuará, zaqué nga bihuinni maʼ bizulú cayuni mandar Jesús casi Rey lu Reinu stiʼ Dios iza 1914. * Beeda gaca Jiobá Rey ra bíʼnibe Xiiñibe Rey.

4. 1) Xi biʼniʼ Jesús cásipeʼ guca Rey. 2) Xi bíʼnibe pur ca xpínnibe.

⁴ Primé dxiiñaʼ ni biʼniʼ Jesús dxi nacubi guca Rey nga bicaalú Binidxabaʼ, ni jma xhenemigu Bixhózebe. Jesús ne ca ángel stiʼ bisábacabe Binidxabaʼ ne ca demonio stiʼ lu Guidxilayú. Nabé nayecheʼ guyuu guiráʼ cani nuu guibáʼ, peru ndaaniʼ Guidxilayú riʼ bizulú guyuu stale guendanagana (biindaʼ Apocalipsis 12:7-9, 12). De raqué, bizulú Rey que bisiá xquidxi Dios, bisiidiʼ ca xpinni ne gudixhe chaahuiʼ modo gúnicabe xhiiñaʼ Dios. Guidúʼyanu ximodo bizuubacabe stiidxaʼ Dios lu guionnaʼ cosa ni bizéʼtenu riʼ ne ximodo zanda gacané ni laanu yanna.

5. Xi bizaaca lu iza 1914 ne ra bizulú iza 1919.

⁵ Gulee si Rey que Binidxabaʼ ne ca demonio stiʼ guibáʼ la? bidii Jiobá laabe sti dxiiñaʼ. Xi laani yaʼ. Gúʼyabe pa nuu ca xpínnibe ni nabeza lu Guidxilayú gaxha de Dios ne gusiabe xquidxi. Malaquías, ni riguixhená que, bizeeteʼ zeeda gácani casi ora riá xiixa cosa (Mal. 3:1-3). Ne bizaaca ni lu iza 1914 ne ra bizulú iza 1919. * Para ganda chuʼnu ndaaniʼ familia stiʼ Jiobá, caquiiñeʼ gácanu binni nayá (1 Ped. 1:15, 16). Naquiiñeʼ guni adorarnu Jiobá modo riuulaʼdxiʼ ne cadi gúninu ca cosa ni runi religión ni cadi dxandíʼ ne cadi chuʼnu lu política.

6. 1) Tuu nga rudii laanu guiráʼ ni caquiiñenu ti ganda chuʼnu galán nezalú Dios. 2) Xiñee nabé risaca cani rudii mozo riʼ laanu.

⁶ Cumu maʼ nácabe Rey la? gulibe ti «mozo ni nuu xpiaani ne ni runi jneza». Mozo riʼ qué zusaana de gudii guiráʼ ni iquiiñeʼ ca xpinni Cristu ni nuu «tobi si» (Mat. 24:45-47; Juan 10:16). De lu iza 1919, mozo riʼ cadi cusaana de guni dxiiñaʼ ni biaana lu náʼ: gudii ni caquiiñeʼ ca domésticu. Guiráʼ ni rudii mozo ca laanu para chuʼnu gaxha de Dios, racanécani laanu iguidxi fe stinu ne quixhe íquenu chuʼnu nayá nezalú Dios, guibáninu jneza, guiníʼ íquenu jneza ne gácanu binni nayá. Laaca rusiidibe laanu ne rudiibe guiráʼ ni iquiiñenu para gúninu dxiiñaʼ risaca ni cayaca lu guidubi naca Guidxilayú: gucheechenu diidxaʼ. Ñee riquiiñenu guiráʼ ni rudiicabe laanu ca la?

7. 1) Xi dxiiñaʼ nabé risaca bizulú Jesús dxi guyuu lu Guidxilayú. 2) Padxí guiluxe dxiiñaʼ ca.

⁷ Dxi bizulú Jesús bicheeche diidxaʼ ndaaniʼ Guidxilayú riʼ, guníʼ sicaríʼ: «Napa xidé [...] chi güe nia binni modo runi mandar Dios, purti para nga bendáʼ» (Luc. 4:43). Dxiiñaʼ jma risaca ni bíʼnibe nga gucheechebe diidxaʼ, ne bíʼnibe ni chonna iza arondaʼ. Ne zacaca gúdxibe ca discípulo stibe guni, ora gúdxibe  laacaʼ: «Ne lagabi laaca ma zeda dxiña dxi guni mandar Dios» (Mat. 10:7). Biasa si Jesús lade gueʼtuʼ gúdxibe ca xpínnibe zucheechecaʼ stiidxaʼ Dios lu «idubi naca guidxilayú» (Hech. 1:8). Ne guniʼbe zacanebe ca xpínnibe para gúnicaʼ dxiiñaʼ nabé risaca riʼ dede dxi guiluxe guidxilayú malu riʼ (Mat. 28:19, 20).

8. Ximodo guluu Rey que gana ca xpinni para gucheechecaʼ diidxaʼ.

⁸ Lu iza 1919, ca xpinni Jesús biénecaʼ caquiiñeʼ gucheechecaʼ stiidxaʼ Reinu (Mat. 24:14). Rey que maʼ cayuni mandar guibáʼ, ne lu Guidxilayú riʼ bicasaabe ti grupuhuiiniʼ de binni ni maʼ bisiabe. Grupuhuiiniʼ riʼ bizuubaʼ diidxaʼ né stale gana ne bizulú bicheeche ca diidxaʼ nacubi ne galán stiʼ Reinu lu guidubi naca Guidxilayú (Hech. 10:42). Ne bihuinni zacá ni purtiʼ guyé biaʼ gande mil binni ti guendaridagulisaa stiʼ stale guidxi ni guca Cedar Point (Ohio, Estados Unidos) lu beeu septiembre 1922. Guxuíʼlunu pabiáʼ biéchecabe ora bidii Rutherford, ti libana ni láʼ «Reinu», guniʼbe: «¡Laguuyaʼ, Rey ca maʼ cayuni mandar! Laatu nga cani chigucheeche stiidxabe. Nga runi, laguiníʼ, laguiníʼ, laguiníʼ de Rey ne reinu stiʼ». Xi bíʼnicabe yaʼ. Chupa mil de cani guyé que bicheechecaʼ diidxaʼ —ti «dxi ni bibí para guireeche diidxaʼ»—, ne yegánnacabe ca binni ni nabeza biaʼ 72 kilómetru de ra cayaca guendaridagulisaa que. Ti xpinni Cristu guníʼ: «¡Qué ziuu dxi guiaandaʼ naa ora gúdxicabe laadu guinidu de Reinu stiʼ Dios ne laaca qué ziaandaʼ naa pabiáʼ nayecheʼ guyuu guiráʼ binni ni guyé que!». Ne stale de cani guyé que laaca zacaca biʼniʼ sentircaʼ.

9, 10. 1) Xi scuela racané ca xpinni Cristu para guiziidicaʼ gucheechecaʼ diidxaʼ. 2) Ximodo huayacané ca scuela ca lii.

⁹ Lu iza 1922 guyuu jma de diecisiete mil de cani rucheecheʼ stiidxaʼ Reinu ndaaniʼ 58 guidxi. Peru caquiiñeʼ guiziidiʼ chaahuicabe modo gúnicabe ni. Lu primé siglu que bisiidiʼ Jesús ca discípulo stiʼ xi guiniʼcaʼ ora gucheechecaʼ diidxaʼ, paraa zanda gúnicaʼ ni ne ximodo gúnicaʼ ni (Mat. 10:5-7; Luc. 9:1-6; 10:1-11). Zacaca nga runi Jesús yanna, rusiidibe ne rudiibe guiráʼ ni caquiiñeʼ cani rucheeche diidxaʼ ti ganda gúnicaʼ ni jneza (2 Tim. 3:17). Ne riquiiñebe ca neza binni ridagulisaa para gusiidibe laacaʼ. Tobi de cani riquiiñebe nga Scuela stiʼ cani Rucheeche Diidxaʼ, racá riziidiʼ jma de ti gayuaa once mil neza binni ridagulisaa ni nuu lu guidubi Guidxilayú. Scuela riʼ huayacané jma de gadxe millón xpinni Cristu para gánnacaʼ gucheechecaʼ diidxaʼ ne gusiidicaʼ guiráʼ clase binni (biindaʼ 1 Corintios 9:20-23).

¹⁰ Laaca maʼ nuu scuela para ca binnigola, ca precursor, ca xpinni Cristu ni caʼruʼ guichaganáʼ, ca guendaxheelaʼ, Scuela  para Grupu ni Ruuyaʼ Modo Raca Dxiiñaʼ Betel ne Xheelacaʼ, ca binnigola ni riganna ca neza binni ridagulisaa ne xheelacaʼ ne ca misioneru. * Ca xpinni Cristu ni guyé Scuela para ca Guendaxheelaʼ ni naca xpinni Cristu guniʼcaʼ sicaríʼ: «Jmaruʼ si gunnaxhiidu Jiobá pur guiráʼ ni biziididu raqué ne laaca gucané scuela ca laadu modo gacanedu binni jma jneza».

11. Xiñee randa runi huantar cani rucheeche diidxaʼ ora rucaalú Binidxabaʼ laacaʼ.

¹¹ Binidxabaʼ ruuyaʼ stipa rúninu para gucheechenu diidxaʼ ne para gusíʼdinu binni de Reinu stiʼ Dios. Nga runi rucaalube cani rucheeche diidxaʼ ne ruyúbibe modo gucueezabe dxiiñaʼ riʼ. Peru qué zanda gúnibe gastiʼ. Biʼniʼ Jiobá Xiiñiʼ «xaíque sti irá cani runi mandar, ne irá cani risaca, ne irá cani nandxóʼ» (Efes. 1:20-22). Cumu maʼ naca Jesús Rey la? rápabe ne rábibe ca discípulo stibe xi gúnicaʼ, ti ganda gaca ni na Bixhózebe. * Cadi cayaanadxí de guireeche diidxaʼ ne pur nga millón de binni ni nayá ladxidóʼ caziidicaʼ de Jiobá. ¡Ti ndaayaʼ naroʼbaʼ nga gúninu dxiiñaʼ riʼ!

12. Ximodo nga cayaʼtaʼ chaahuiʼ dxiiñaʼ ni cayuni ca xpinni Dios dede iza 1914.

¹² Dede dxi bizulú biʼniʼ mandar Reinu stiʼ Dios lu iza 1914, caguixhe chaahuiʼ Rey riʼ modo guni ca xpinni ni na Bixhoze. Biblia na: «Lugar de guedaniáʼ cobre zeedaniáʼ oro, ne lugar de guedaniáʼ guiibaʼ zeedaniáʼ plata, ne lugar de guedaniáʼ yaga, zedaniáʼ cobre, ne lugar de guedaniáʼ guié, zedaniáʼ guiibaʼ; ne zuneʼ guendariuudxi casi ca xaíque stiluʼ, ne zuneʼ guendaruni jneza casi tuuxa ni gabi lii xi naquiiñeʼ guʼnuʼ» (Isaías 60:17). Lu iza 1919, ndaaniʼ cada neza binni ridagulisaa ribícabe ti xpinni Cristu para quixhe chaahuiʼ modo guireeche diidxaʼ. Chupa chonna iza despué, lu iza 1927, gudíxhecabe guireecheʼ diidxaʼ de yoo pur yoo guiráʼ domingu. ¡Ne guizáʼ nayecheʼ guyuucabe lu iza 1931, purtiʼ iza que nga biree lácabe testigu stiʼ Jiobá casi rieeteʼ lu Biblia! (Is. 43:10-12.) Lu iza 1938, maʼ qué ñuni votárcabe para nibícabe tuuxa xpinni Cristu sániruʼ ládecabe. Dede dxiqué maʼ naquiiñeʼ gúnicabe ni na Biblia para gácacabe ti binni ni zaniruʼ ndaaniʼ ca neza binni ridagulisaa. Lu iza 1972, maʼ ti grupu de binnigola nga guʼyaʼ ni caquiiñeʼ ti neza binni ridagulisaa ne maʼ cadi ti binnigola si. Ne guluucabe gana ca xpinni Cristu ni biiyacabe zanda gaca binnigola ne  siervu ministerial para gápacaʼ «ca xpinni Dios» (1 Ped. 5:2). Lu iza 1976, Grupu ni Zaniruʼ gúcani xhoopaʼ grupuhuiiniʼ para gúʼyacaʼ ximodo guireeche stiidxaʼ Reinu lu guidubi Guidxilayú. Guiráʼ ni bizéʼtenu riʼ rusihuínnicani zeʼ dxi caguixhe chaahuiʼ Rey ni gulí Jiobá riʼ dxiiñaʼ ni cayuni ca xpinni, casi modo na Dios.

13. Ximodo huayacané guiráʼ ni maʼ biʼniʼ Reinu stiʼ Dios lu ti gayuaa iza ca lii yaʼ.

¹³ Guníʼ ique guiráʼ ni maʼ biʼniʼ Rey ni gulí Jiobá lu ti gayuaa iza ni maʼ gudiʼdiʼ ca. Maʼ bisiabe xquídxibe para chinecaʼ labe o xlabe. Maʼ bisiidibe ca xpínnibe modo gucheechecaʼ diidxaʼ lu 239 guidxi ne maʼ gucanebe stale millón de binni gunibiaʼcaʼ Jiobá. Maʼ bitagulisaabe jma de gadxe millón de xpínnibe, ne laacaʼ rúnicaʼ ni na Bixhózebe né stale gana (Sal. 110:3). Cadi dxandíʼ guizáʼ sicarú ne ridxagayaanu guiráʼ ni maʼ biʼniʼ Jiobá pur Rey ni gulí riʼ la? ¡Ne cayaadxaruʼ gúnibe stale cosa!

14. 1) Xii nga canábanu Dios ora rinábanu laa: «Biseendaʼ reinu stiluʼ». 2) Gunáʼ nga textu stiʼ iza 2014, ne xiñee biáʼsipeʼ textu ca.

¹⁴ Neca guca ni rinábanu lu oración: «Biseendaʼ reinu stiluʼ», lu iza 1914 dxi biʼniʼ Jiobá Xiiñiʼ Rey, nuuruʼ xcaadxi cosa ni cayaadxaʼ gaca (Mat. 6:10). Biblia maca bizeeteʼ zuni «mandar [Jesús] lade ca xhenemigu» (Sal. 110:2). Ca dxi stinu riʼ, Binidxabaʼ rucaa ca xaíque guidxi gucaalucaʼ Reinu stiʼ Dios. Ora rinábanu gueeda Reinu stiʼ Dios, ni canábanu nga gueeda Rey ca ne 144,000 binni ni chiguni mandarné laa para gunduuxecaʼ ca gobiernu ni nuu lu guidxilayú ne cani cucaalú Reinu riʼ. Óraca nga zaca ca diidxaʼ ni zeeda lu Daniel 2:44, ra cuzeeteʼ xi zuni Reinu stiʼ Dios: «Zunideni ne zunduuxeni guiráʼ ca reinu riʼ». Zacá ni, zunduuxebe ca gobiernu ni naca xhenemígube (Apoc. 6:1, 2; 13:1-18; 19:11-21). Maʼ cadi candaa zaca ni maʼ bizéʼtenu riʼ. Lu iza 2014 bizaa ti gayuaa iza de cayuni mandar Reinu stiʼ Dios guibáʼ. Ngue runi, ¡biáʼsipeʼ nga textu stiʼ iza riʼ, Mateo 6:10: «Biseendaʼ reinu stiluʼ»!

15, 16. 1) Xi guiráʼ cosa sicarú nga zaca lu ti mil iza guni mandar Cristu. 2) Xii nga últimu ni chiguni Jesús casi Rey. 3) Ximodo zaca guiráʼ ni maca gudixhe ique Jiobá para guiráʼ cani bizaʼbe.

¹⁵ Ora maʼ binduuxeʼ Rey ni maʼ gulí Jiobá ca xhenemigu Dios ni nuu lu guidxilayú la? zaguube Binidxabaʼ ne ca demonio stiʼ ndaaniʼ ti bizé ti mil iza (Apoc. 20:1-3). Ora maʼ gulee Reinu ca Binidxabaʼ ne ca demonio stiʼ, nagueendaca zadúʼyanu ca ndaayaʼ ni zacaanu ra guti Jesús pur laanu ne zabeebe guiráʼ ni runiná laanu pur pecadu ni bisaanané Adán binni. Rey ca zandisaʼ millón de binni lade gueʼtuʼ ne zaguixhe chaahuiʼ modo guiziidiʼ ca binni ca de Jiobá (Apoc. 20:12, 13). Guidubi naca Guidxilayú zaca ti paraísu, cásica guca ndaaniʼ jardín ni guyuu Edén. Ne guiráʼ cani bizuubaʼ diidxaʼ maʼ qué zápacaʼ donda.

¹⁶ Despué de guni mandar Jesús ti mil iza, zaca ni maca gudixhe ique Dios. Óraca nga zudxiguetaʼ Jesús Reinu ca Bixhoze (biindaʼ 1 Corintios 15:24-28). Maʼ qué zaquiiñenu tu guiníʼ pur laanu nezalú Jiobá. Guiráʼ ca xiiñiʼ Dios, cásica cani nuu guibáʼ zaqueca cani nuu lu Guidxilayú ziuunecaʼ Jiobá tobi si.

17. Xi maʼ gudixhe íquenu gúninu pur Reinu stiʼ.

¹⁷ Guiráʼ cani maʼ bizaaca ti gayuaa iza de cayuni mandar Reinu stiʼ Dios, rusihuínnicani Jiobá nga cayuni mandar ne zaca guiráʼ cani maʼ gudixhe íquebe gúnibe ndaaniʼ Guidxilayú. Nga runi, cadi gusaana de gúninu ni na Dios ne guininu de Rey ca ne Reinu stiʼ. ¡Nanna dxíchinu mayaca guicabi Jiobá oración stinu ora rinábanu laa: «Biseendaʼ reinu stiluʼ»!