1, 2. 1) Xiñee qué ñuu 24,000 israelita lu Layú ni Bizabiruaa Dios gudii laaca. 2) Xiñee racaláʼdxinu gánnanu ni bizaaca ca israelita que.

MAYACA guiuu ca israelita lu Layú ni Bizabiruaa Dios gudii laacaʼ. Peru stale hombre bizulú guyuunecaʼ ca gunaa de Moab. Pur ngue guti 24,000 israelita. ¡Aque triste ni bizaaca que xa! Maʼ stale iza zinécabe de cabézacabe chúʼcabe lu Layú ni Bizabiruaa Dios gudii laacabe ne mayaca chúʼcabe ndaaniʼ ni. Peru maʼ qué ñanda diʼ ñuucabe, purtiʼ qué nuzuubacabe stiidxaʼ Jiobá ne guyuunécabe ca gunaa que (Números 25:1-5, 9).

² Gucuá ejemplu riʼ lu Biblia para gusiidiʼ ni laanu ti cosa (1 Corintios 10:6-11). Biblia rusihuinni maʼ nabáninu lu ca últimu dxi ne mayaca guiluxe cani. Nga runi maʼ cadi candaa para guibáninu ndaaniʼ ti paraísu (2 Timoteo 3:1; 2 Pedro 3:13). Triste guininu ni, peru huayuu xpinni Jiobá ni qué ruzuubaʼ diidxaʼ ne huayuunecaʼ ni cadi xheelacaʼ. Ne yanna nabé cayuniná ni laacaʼ. Ne pa qué gaca arrepentírcabe qué zanda gápacabe ti guendanabani ni qué zaluxe ndaaniʼ Paraísu.

3. Xiñee caquiiñeʼ ca xpinni Cristu gacané Jiobá laacaʼ para gápacaʼ xquendaxheelacaʼ. (Biiyaʼ foto ni zeeda ra ruzulú tema riʼ.)

³ Ca xpinni Cristu caquiiñecaʼ gacané Jiobá laacaʼ para gápacaʼ xquendaxheelacaʼ. Xiñee yaʼ. Purtiʼ binni guidxilayú nisi ricá ique  chuʼné ni cadi xheelaʼ. Biblia na: «Pa Jiobá qué ñacané nibí yoo ca la? pur gana si bíʼnicabe dxiiñaʼ nadipaʼ para gurí ni. Pa Jiobá qué ñapa guidxi ca, pur gana si ñataná ni cayapa ni» (Salmo 127:1). Lu tema riʼ zadúʼyanu caadxi cosa ni zacané laacabe. Hombre ne gunaa ni maʼ bichaganáʼ naquiiñeʼ gúʼyacaʼ xii nga ni riuuláʼdxicaʼ gúnicaʼ, gaca xhamígucaʼ Dios, gápacaʼ ca guenda ni napa Dios, guiníʼnecaʼ xheelacaʼ né diidxaʼ nadóʼ ne respetu, ne gudiicaʼ guiráʼ ni caquiiñeʼ xheelacaʼ.

4. Xi rucaa chupa chonna xpinni Cristu chuʼné ni cadi xheelaʼ.

⁴ Xi zanda gucaa chupa chonna xpinni Cristu chúʼnecaʼ ni cadi xheelacaʼ yaʼ. Nuu biaje ruzulú ni ora qué rúnicabe ni guníʼ Jesús ne ruuyacabe ni cadi naquiiñeʼ gúʼyacabe. Jesús guníʼ: «Neca chuʼlaʼdxi si tuuxa ti gunaa ni cadi xheelaʼ, ne icá ique chuʼ né laabe la? ma bichee, neca qué ñuu né pe laabe» (Mateo 5:27, 28; 2 Pedro 2:14). Stale de laacaʼ ruuyacaʼ pornografía, ruundacaʼ libru ni zeeda guiníʼ de laani o ruyúbicaʼ lu Internet cosa ni cadi jneza guuyaʼ ti xpinni Cristu. Ne nuu tu ruuyaʼ película, obra de teatru o gúʼyacaʼ lu televisión ra nexhenécabe tuuxa. Ne nuu tu rié ca lugar ra ruyaa hombre ne gunaa xieeladi huaxhinni o ca lugar ra ridaabiʼ o riguiichiʼ binni ne rucaani laa guni sentir casi ora nexhené tuuxa.

5. Xiñee naquiiñeʼ gápanu ladxidoʼno.

⁵ Nuu tu laa riuuné ni cadi xheelaʼ purtiʼ ruzulú rapa confianza sti binni ni cadi xheelaʼ. Ca binni ni nuu lu guidxilayú stiʼ Binidxabaʼ riuuláʼdxicaʼ gúnicaʼ cosa dxabaʼ ne qué riuuláʼdxicaʼ gucueezacaʼ laacaʼ. Ne cumu guiranu nácanu binni ruchee ne riguite ladxidoʼno laanu la? zanda guzulú guni sentirnu xiixa pur ti binni ni cadi xheelanu pa qué gápanu cuidadu. Biblia na: «Ladxidóʼ binni nga ni jma riguite laa que intiica si cosa, ne qué ridxélani xi gúnini. Tu zanda gunibiaʼni yaʼ. Naa Jiobá, cayuuyaʼ chaahueʼ xi nuu ndaaniʼ ladxidoʼto, ne cayuuyaʼ chaahueʼ xi nuu ndaaniʼ riñón stitu, para gudieeʼ cada tobi ni naquiiñeʼ guicaa pur modo nabani, ne cani huabeendú pur cani huayuni» (Jeremías 17:9, 10). Jesús peʼ guníʼ de ndaaniʼ ladxidóʼ binni nga riale guni ni cadi jneza, guuti ne chuʼné ni cadi xheelaʼ (Mateo 15:19).

6, 7. 1) Xi zándaca guizaaca pa nuu xiixa cosa malu ndaaniʼ ladxidóʼ tuuxa. 2) Xi zanda guni ti binni ni maʼ bichaganáʼ para cadi chuʼné ni cadi xheelaʼ.

⁶ Ora riuuláʼdxisaa chupa binni, cadi nagana guiale de ndaaniʼ ladxidóʼcabe gúnicabe cosa malu. Zanda guzulú guiníʼcabe de cosa ni naquiiñeʼ guiniʼnécabe xheelasícabe. Zándaca gúnicabe intiica cosa para gúʼyacabe ne guiníʼcabe málasi bidxaagacabe. Chaahuiʼ chaahuiʼ maʼ guzulú gannaxhiisaacabe. Cada biaje jma nagana zaca para laacabe gusaana de gúʼyacabe. Ne ora jma gannaxhiicabe jma nagana zaca para laacabe cadi guidxaagacabe. Nánnacabe cadi jneza ni cayúnicabe, peru maʼ qué randa rucueezacabe laacabe (Proverbios 7:21, 22).

⁷ Redandá ora maʼ rusiaandacabe ca ley stiʼ Jiobá. Cosa malu ni riuuláʼdxicabe gúnicabe ne cani riníʼcabe rucaani laacabe guinaazecabe nácabe, gudiicabe bixiduʼ, quiidxicabe ne xhubinácabe laacabe. Xheelasícabe nga naquiiñeʼ gúnicabe ca cosa riʼ. Peru ni riuuláʼdxicabe gúnicabe riʼ reeda gácani ti trampa para laacabe. Despué, ni riuuláʼdxicabe gúnicabe riʼ jma nadipaʼ rácani, ne últimu la? rucheenécabe xheelacabe (Santiago 1:14, 15). ¡Aque triste nga xa! Ñándaca ñúnicabe xiixa para cadi nucheecabe. Ni naquiiñeʼ si ñúnicabe nga nudiicabe lugar ñacané Jiobá laacabe ñuni respetárcabe xquendaxheelacabe. Guidúʼyanu ximodo zanda gúnicabe ni.

8. Xiñee riuu ti guendaxheelaʼ galán ora guirópacabe xhamígucabe Dios.

⁸ Biblia na: «Laatu cani nadxii Jiobá, lagaca nanalaʼdxiʼ ni cadi jneza. Laabe cayápabe xquendanabani cani qué rusaana laabe, de lu náʼ ca binni qué iquiiñeʼ rulabe laacaʼ» (Salmo 97:10). Ora xhamigu ti hombre ne ti gunaa ni maʼ bichaganáʼ riʼ Dios, jma nagana para chúʼnecaʼ ni cadi xheelacaʼ. Xiñee yaʼ. Purtiʼ ora jma gunibiáʼcabe Jiobá ne ca guenda stiʼ, jma zúnicabe stipa pur gácacabe casi laa ne zúnicabe stipa pur gannaxhiisaacabe. Ndiʼ zudii stipa laacabe para gucaanácabe xiixa ni cadi jneza ni riuuláʼdxicabe gúnicabe ne qué ziuunécabe ni cadi xheelacabe (Efesios 5:1-4). Ne laaca nánnacabe zuni castigar Dios cani riuuné ni cadi xheelaʼ ne xcaadxi binni ni runi cosa dxabaʼ (Hebreos 13:4). Nga runi, guirópacabe rúnicabe stipa pur cadi gucheenécabe xheelacabe.

9. 1) Xiñee qué nucheené José Dios. 2) Xi rizíʼdinu de ejemplu stiʼ José.

⁹ Pa qué chinándanu guiráʼ ca ley stiʼ Jiobá, zápanu guendanagana ni gucaa laanu guchéʼnenu Dios. Nuu tu rapa ca guendanagana riʼ purtiʼ nabé ridxaagacaʼ ca xcompañérucaʼ despué de dxiiñaʼ. Ne nuu tu rapa ca guendanagana riʼ ra runi dxiiñaʼ. Ne nga nga ni bizaaca ti hombrehuiiniʼ láʼ José. Ra rúnibe dxiiñaʼ bidiibe cuenta riuulaʼdxiʼ xheelaʼ patrón stibe laabe. Guiráʼ dxi ruyubi gunaa riʼ modo ucuudxi laabe para gatanebe laa. Ti dxi gudapi gunaa que xhábabe ne gudxi laabe: «Gutané naa». Peru laabe qué ninabe ne biree guxooñebe de raqué. Xiñee qué ninabe ñatanebe gunaa que yaʼ. Purtiʼ xhamígube Jiobá ne qué ninabe nucheenebe laa. Pur qué ninabe nucheenebe Dios binítibe xhiiñabe ne biseguyoocabe laabe. Peru despué guluu ndaayaʼ Jiobá laabe (Génesis 39:1-12; 41:38-43). Xi rizíʼdinu de ejemplu stibe yaʼ. Rizíʼdinu naquiiñeʼ gucáʼnanu guiráʼ cosa ni zanda gucaa laanu guchéʼnenu Dios ra tiica si nuunu.

10. Ora gapa tuuxa ca guenda napa Jiobá, xiñee racané ni laa para cadi gucheené xheelaʼ.

¹⁰ Biblia cayabi laanu naquiiñeʼ gápanu ca guenda ni napa Jiobá. Ca binni ni napa ca guenda riʼ rúnicaʼ ni jneza ne qué rucheenecaʼ stobi, casi runi Jiobá. Ne pa hombre ne gunaa ni maʼ bichaganáʼ riʼ gápacaʼ ca guenda ni napa Jiobá la? zápacaʼ xquendaxheelacaʼ de ca cosa ni zanda guchiá ni (Efesios 4:24). Pa gápacabe ca guenda ni napa Dios, zucaani laacabe gucueezacabe laacabe ne gucaanácabe ca cosa malu ni ruquiinde laacabe, ne chuuláʼdxicabe ni cadi stícabe, purtiʼ ca cosa riʼ zanda gucaacani laacabe gucheenécabe Dios (biindaʼ Colosenses 3:5, 6). Ti binni ni nanna gucueeza laca laa runi stipa pur gucaanáʼ ca cosa malu ni riuulaʼdxiʼ guni. Ne laaca rucaanáʼ intiica cosa ni gucaa laa guchee (Job 31:1). Ne ora rinándacabe ca ley stiʼ Jiobá, raca nanaláʼdxicabe cosa malu ne rúnicabe stipa pur gúnicabe ni jneza (Romanos 12:2, 9).

11. Xiñee raca xquendaxheelaʼ binni jma naguidxi ora rusihuinni ca guenda ni napa Jiobá.

¹¹ Pa hombre ne gunaa ni maʼ bichaganáʼ racaláʼdxicaʼ gaca xquendaxheelacaʼ naguidxi, naquiiñeʼ gápacaʼ ca guenda ni napa Jiobá (Colosenses 3:10). Jiobá naca ti Dios ni riá, nachaʼhuiʼ, qué rudxiibaʼ laca laa, galán xpiaʼ ne rapa paciencia. Pa cani maʼ bichaganáʼ racaláʼdxicaʼ gápacaʼ ca guenda ni napa Jiobá la? zaca xquendaxheelacaʼ jma naguidxi ne zaguu Jiobá ndaayaʼ laacaʼ (Colosenses 3:12). Ne pa gudiicabe lugar «quixhe dxí» Cristu ladxidóʼcabe la? qué zadíndecabe ne ziuudxícabe (Colosenses 3:15). Ne pa nadxiisaacabe la? cada tobi de laacabe zuni stipa pur gudii ni caquiiñeʼ xheelaʼ ne zuni respetar laabe (Romanos 12:10).

12. Gunáʼ nga ca guenda rábiluʼ racané binni gapa ti guendaxheelaʼ nayecheʼ.

 ¹² Ti guendaxheelaʼ bisiene xi ca guenda gucané laacaʼ para guibánicaʼ nayecheʼ. Hombre que guníʼ guendarannaxhii ca nga guenda ni jma risaca ne rúnicabe stipa pur gusihuínnicabe ni. ne laaca guniʼbe naquiiñeʼ gaca xpiáʼcabe galán ne gácacabe nadóʼ. Ne ngaca nga riníʼ ique xheelabe. Gunaa que guníʼ risaca nga gácacabe nachaʼhuiʼ ne guni respetársaacabe. Ne laacaʼ guniʼbe rúnicabe stipa pur cadi gudxiibacabe laca laacabe, neca nuu biaje rácani nagana para laacabe.

13. 1) Xi naquiiñeʼ guni binni para chuʼ xquendaxheelaʼ naguidxi. 2) Xiñee risaca gúnicabe zacá.

¹³ Para chuʼ ti guendaxheelaʼ naguidxi, hombre ne gunaa ni maʼ bichaganáʼ naquiiñeʼ guiziidicaʼ guiniʼcaʼ né diidxaʼ nadóʼ, né guendarannaxhii ne guiá xheelaʼ (Efesios 4:32). Peru stale guendaxheelaʼ qué runi zacá, ne pur nga qué riuu xquendaxheelacaʼ naguidxi. Nuu tu laa jma galán riniʼné ti binni ni qué runibiáʼ o ti manihuiiniʼ napa ra lidxi que xheelaʼ. Ora riníʼ binni né xiana, nisi maʼ cadxiichi, guni ridxi ne cuʼ dí la? qué raca xquendaxheelacaʼ naguidxi (Efesios 4:31). Laaca nabé runiná guiníʼsaacabe laacabe nezalú sti binni o gábicabe laacabe diidxaʼ ni guniná ladxidóʼcabe.

14. Xi cadi naquiiñeʼ guni ca guendaxheelaʼ.

¹⁴ Para gapa ti hombre ne ti gunaa ni maʼ bichaganáʼ ti guendaxheelaʼ nayecheʼ la? naquiiñeʼ guiniʼcaʼ diidxaʼ. Ora riníʼ Biblia nuu «tiempu para cadi guininu», qué riníʼ diʼ nga naquiiñeʼ gusaana de guiníʼ ti guendaxheelaʼ (Eclesiastés 3:7). Ti hermana ni maʼ bichaganáʼ de Alemania guníʼ ora maʼ cadinde diidxaʼ ti guendaxheelaʼ jma nagana para guiete xiana laacaʼ. Peru pa tobi de laacabe gusaana de guiníʼ la? zuniná ni stobi ca. Laaca cadi galán diʼ guiníʼcabe sin gucueezacabe laacabe, purtiʼ zándaca guniná ni sti binni ca ne jma zaroobaʼ guendanagana stícabe. Ora ti xpinni Cristu qué chuulaʼdxiʼ xiixa ni guni xheelaʼ, qué zuni chaahuicabe guendanagana stícabe né ridxi o gusaana de guiníʼcabe. Rúnicabe  stipa pur guni chaahuicabe ni nagueendaca ti cadi tinde diidxacabe.

15. Xiruʼ naquiiñeʼ guni ti hombre ne ti gunaa ni maʼ bichaganáʼ para gápacaʼ ti guendaxheelaʼ jma naguidxi.

¹⁵ Ti hombre ne ti gunaa ni maʼ bichaganáʼ naquiiñeʼ cueecaʼ tiempu para guiniʼcaʼ xi riníʼ íquecaʼ ne xi runi sentircaʼ, zacá zápacabe ti guendaxheelaʼ naguidxi. Nabé risaca ni guiníʼcabe, peru laaca risaca modo guiníʼcabe ni. Dede né ora gápacabe guendanagana, guirópacabe naquiiñeʼ cuícabe xi diidxaʼ guiníʼcabe ne guiníʼcabe né diidxaʼ nadóʼ ne respetu. Zacá qué zaca nagana para sti binni ca gucaadiaga (biindaʼ Colosenses 4:6). Laaca galán iquiiñecabe diidxaʼ ni cuʼ gana laacabe (Efesios 4:29).

16, 17. Xiñee naquiiñeʼ ganna ti hombre ne ti gunaa ni maʼ bichaganáʼ xi runi sentir xheelaʼ ne gatané laabe.

¹⁶ Para gapa binni ti guendaxheelaʼ naguidxi la? hombre ne gunaa ni maʼ bichaganáʼ naquiiñeʼ gánnacaʼ xi runi sentir xheelacaʼ ne gatanecaʼ xheelacaʼ (biindaʼ 1 Corintios 7:3, 4). Para nga naquiiñeʼ gusisácacabe jma ni runi sentir xheelacabe que ni runi sentírcabe (Filipenses 2:3, 4).

¹⁷ Nuu biaje, tobi de cani maʼ bichaganáʼ qué riuulaʼdxiʼ guni cariñu xheelaʼ o qué riná gatané xheelaʼ. Nuu hombre riníʼ ique cadi hombre diʼ laa pa gaca nachaʼhuiʼ né xheelaʼ. Peru Biblia riguu gana hombre ni maʼ bichaganáʼ guiene xheelaʼ (1 Pedro 3:7). Hombre ca laaca nanna cadi naquiiñeʼ si gatané xheelaʼ para gudii guiráʼ ni caquiiñebe. Laaca naquiiñeʼ gusihuinni nadxii xheelaʼ ora tiica si. Zacá ziuube jma nayecheʼ ora gatanebe xheelabe. Ora guirópacabe gusihuínnicabe nadxiicabe, qué zaca nagana para laacabe gusihuínnicabe rizaaláʼdxicabe ni runi sentir xheelacabe ne gatanécabe laa.

18. Xi naquiiñeʼ guni hombre ne gunaa ni maʼ bichaganáʼ para gaca xquendaxheelacaʼ jma naguidxi.

¹⁸ Gastiʼ nin ti razón para gucheené binni xheelaʼ. Peru ora tobi de laacabe guchee o chuʼné ni cadi xheelaʼ la? zándaca rizaaca ni purtiʼ qué rudii xheelabe cariñu ni caquiiñebe (Proverbios 5:18; Eclesiastés 9:9). Nga runi Biblia na cadi naquiiñeʼ gusaana binni de gatané xheelaʼ, ne pa gusaana de gúnicabe ni, naquiiñeʼ guiníʼcabe diidxaʼ de laani peru cadi naquiiñeʼ gudiicabe lugar tiidiʼ stale tiempu. Xiñee yaʼ. Purtiʼ zándaca iquiiñeʼ Binidxabaʼ ni para gucaa laacabe gucheecabe (1 Corintios 7:5). Guizáʼ triste nga pa tobi de cani maʼ bichaganáʼ riʼ chuʼné ni cadi xheelaʼ ne zacá guni ni na Binidxabaʼ. Ora ti binni rizaalaʼdxiʼ ni runi sentir xheelaʼ ne gatané laabe la? zusihuinni jma rizaalaʼdxiʼ ni caquiiñeʼ xheelaʼ que ni caquiiñeʼ. Rihuinni dxíchica rúnicabe ni purtiʼ nadxiisaacabe ne cadi purtiʼ si naquiiñeʼ gúnicabe ni. Pa ti hombre ne ti gunaa ni maʼ bichaganáʼ racaláʼdxicaʼ gaca xquendaxheelacaʼ jma naguidxi, naquiiñeʼ gannaxhiisaacaʼ ne gatanecaʼ xheelacaʼ (1 Corintios 10:24).

19. 1) Xi naquiiñeʼ gúninu para gaca xquendaxheelanu jma naguidxi. 2) Xiñee nabé risaca gúninu ni.

¹⁹ Para gapa binni ti guendaxheelaʼ jma naguidxi, hombre ne gunaa ni maʼ bichaganáʼ naquiiñeʼ quixhe íquecaʼ cadi gucheenecaʼ Jiobá ne cadi gucheenecaʼ xheelacaʼ (Mateo 19:5, 6). Nabé triste nga chuʼné binni ni cadi xheelaʼ yanna ra maʼ cadi candaa para chuʼnu ndaaniʼ Paraísu. Despué de bieeteʼ ni biʼniʼ ca 24,000 israelita né ca gunaa de Moab, Biblia riguixhená laanu né ca diidxaʼ riʼ: «Pa nuu tu na ma zuhuaa chaahui la? guuya gá qué guiaba» (1 Corintios 10:12). Yanna nga jma naquiiñeʼ gúninu stipa pur chuʼnu nayá nezalú Dios ne cadi guchiiñaʼ gastiʼ laanu (2 Pedro 3:13, 14).