«¡QUÉ gánnadiaʼ xiñee qué naluʼ guni adorarluʼ ca bixhozególaluʼ! —na jñaaʼ rabi naa—. Ñee qué gannuʼ pa pur laacabe nga nabáninu la? Qué rusisácaluʼ ni bíʼnicabe pur laanu. Xiñee ndiʼ maʼ qué naluʼ chinándaluʼ ca costumbre stiʼ ca bixhozególanu pue. Pa qué guni adorarluʼ laacabe la? zeeda gaca ni casi ora niniʼluʼ qué risaca cani runi crenu.» Cumu maʼ qué ñuni huantarbe la? bizulú biinabe óraque.

Maʼ ziniaaʼ chupa chonna beeu de cayuneʼ estudiar Biblia, peru jñaaʼ nga gunabaʼ ca testigu stiʼ Jiobá gusiidicaʼ naa. Laabe nga gúdxicabe pa zaziidibe de Biblia, peru qué ñuuláʼdxibe, ne para cadi gábibe laacaʼ qué zaziidibe la? gunábabe laacaʼ gusiidicaʼ naa. Yanna, ora gudxeʼ laabe maʼ qué zinanda ca tradición stiʼ ca familia stidu la? guizáʼ bidxiichinebe naa. Cayaca nagana para naa cadi guneʼ ni canábabe naa riʼ, purtiʼ nabé ruzuubaʼ stiidxabe. Peru naquiiñeʼ guneʼ ni riuulaʼdxiʼ Jiobá. Guca ni nagana, peru bidii Jiobá stipa naa.

Cásica stale binni de Japón, laaca budista laadu. Peru dxi maʼ gudiʼdiʼ chupa beeu de cayuneʼ estudiar né ca Testigu, bidieeʼ cuenta dxandíʼ ni rusiidiʼ Biblia. Biziideʼ napaʼ ti Bixhozeʼ guibáʼ ne nagueendaca biale de naa gunebiaʼyaʼ laabe. Naa ne jñaaʼ nabé riuuláʼdxidu guinidu de cani caziideʼ. Bizulú guyaaʼ ra Yoo stiʼ Reinu guiráʼ domingu. Dxi jma maʼ biziideʼ ni cá lu Biblia, gudxeʼ jñaaʼ maʼ qué ziuaaʼ lu ca ritu stiʼ ca budista. Nagueendaca bichaabe modo laabe. Ndiʼ nga ni gúdxibe naa: «Zusituiluʼ lú familia stinu pa qué guni respetarluʼ ca bixhozególanu». Gunábabe naa gusaanaʼ de guneʼ estudiar Biblia ne gusaanaʼ de chaaʼ reunión. Qué ñuu dxi niníʼ iqueʼ pa ninábabe naa xiixa casi ngue. Ruluíʼ maʼ sti binni laabe.

Laaca guyuu bixhozeʼ pur jñaaʼ. Biziideʼ lu capítulo 6 stiʼ Efesios naquiiñeʼ guzuubaʼ stiidxacabe. Primé que guníʼ iqueʼ ti cosa, pa guneʼ ni cayábicabe naa la? zándaca zucaadiágacabe naa ne maʼ qué zadindediidxadu. Cumu maʼ cadxiña dxi guneʼ caadxi examen para chuaaʼ secundaria la? gudxeʼ laacabe zucaaʼ iqueʼ scuela ne qué ziaaʼ reunión chonna beeu. Peru gudxeʼ Jiobá zabiguetaʼ ra Yoo stiʼ Reinu que cásipeʼ guizaa chonna beeu que.

Cadi jneza diʼ ngue ni gudixheʼ iqueʼ guneʼ. Primé la? purtiʼ rabeʼ qué zaxeleʼ de Jiobá lu chonna beeu que, peru nagueendaca bizulú birá fe stinneʼ ne bizulú bixeleʼ de Dios. Guiropa, lugar de ñuni  respetar bixhozeʼ ne jñaaʼ ni biaanadu que, yanna maʼ cucaacaʼ naa guixeleʼ de ca Testigu.

Stale de ca Testigu ni binebiaʼyaʼ ra Yoo stiʼ Reinu que laaca cucaalú familia sticaʼ laacaʼ. Laacabe nga gúdxicabe naa zudii Jiobá stipa naa para guneʼ huantar (Mat. 10:34-37). Ne laaca gucanécabe naa guieneʼ zándaca chuulaʼdxiʼ familia stinneʼ guiziidiʼ de Dios pa guneʼ huantar. Ngue runi gunabaʼ Jiobá gusiidiʼ naa gapaʼ confianza laa.

Biraruʼ ni biʼniʼ familia stinneʼ para nusaanaʼ de ñuneʼ estudiar. Ruyubi jñaaʼ ximodo gucuudxi naa ne dede biaʼ qué guʼnaʼ si ora maʼ cayabi ni naa. Stale biaje qué rinieeʼ gastiʼ, purtiʼ ridindediidxadu pa guicabeʼ laabe. Cásica riniʼbe pur cani runi crebe, zaqueca rinieeʼ pur cani runeʼ cré. Yanna maʼ bieneʼ ti cosa, pa ñuneʼ stipa pur ñeneʼ xi riníʼ íquebe ne xi runi sentirbe, qué nidindediidxadu stale biaje. Laaca rudii bixhozeʼ ne jñaaʼ naa stale dxiiñaʼ ti guiaanaʼ ra yoo. Xcaadxi biaje bisaanacabe naa lu calle o qué nudiicabe ni ñahuaʼ.

Bizulú gunabaʼ jñaaʼ gacané xcaadxi binni laa. Guníʼnebe maestru stinneʼ, peru qué niná ñuu pur laabe nin pur naa. Yenebe naa ra nuu jefe stibe para gucaa naa guneʼ cré pur gana si nuu guiráʼ religión. Dede maʼ cayuunabe ora riníʼnebe xcaadxi familia stidu para gacanecaʼ laabe. Nabé ruchiichi ca ngue naa. Peru ra Yoo stiʼ Reinu rabi ca binnigola naa guiníʼ iqueʼ zaqué nga cucheeche jñaaʼ diidxaʼ sin gudii cuenta.

Despué maʼ gudxi bixhozeʼ ne jñaaʼ naa chaaʼ universidad. Rápacabe gana gudiicabe guiráʼ ni caquiiñeʼ ne guibaneʼ galán ora maʼ guiniiseʼ. Racaláʼdxicabe gapaʼ ti dxiiñaʼ galán, peru gadxé ni cá iqueʼ. Cumu nabé ridindediidxadu ora maʼ canidu  de laani la? gupa xidé bicaaʼ caadxi carta para gusieneʼ laacabe xi cá iqueʼ guneʼ. Ti dxi guizáʼ cadxiichi bixhozeʼ gudxi naa: «Pa qué guidxeʼluʼ dxiiñaʼ guixíʼ la? maʼ qué ziuuluʼ ndaaniʼ yoo riʼ». Bineʼ orar Jiobá de laani. Sti dxi que, laga cucheecheniáʼ chupa hermana diidxaʼ, cada tobi de laacaʼ gunábacaʼ naa guneʼ dxiiñaʼ ra lídxicaʼ: gudieeʼ clase ca dxaapahuiiniʼ sticaʼ. Qué ñuulaʼdxiʼ bixhozeʼ ngue ne bisaana de guiniʼné naa. Dede rúnibe casi ora maʼ qué guinneʼ ra yoo que. Jñaaʼ na jma galán ñacaʼ ti binni qué iquiiñeʼ que gacaʼ testigu stiʼ Jiobá.

Nuu tiru rinabadiidxaʼ laca naa pa dxandipeʼ nga racalaʼdxiʼ Jiobá cadi guneʼ ni rinabaʼ bixhozeʼ ne jñaaʼ naa. Maʼ nannaʼ rusiidiʼ Biblia nadxii Dios laanu, ngue runi bineʼ orar ne bineʼ meditar de laani, gucaneni naa guchaaʼ modo riníʼ iqueʼ ne guieneʼ cayuni bixhozeʼ ne jñaaʼ guiráʼ ca cosa que purtiʼ nuucaʼ xizaa pur naa. Rudieeʼ xquíxepeʼ Jiobá purtiʼ bisiidiʼ naa gacaʼ ti binni riene ne quixheʼ iqueʼ guneʼ ni jneza. Cumu nabé riuuladxeʼ gucheecheʼ diidxaʼ la? gudixheʼ iqueʼ gacaʼ precursora.

Ora gunna caadxi de ca hermana ni nuu ra congregación ra riaaʼ que racalaʼdxeʼ gacaʼ precursora la? gúdxicaʼ naa cuezaʼ ti tiempu laga tiidiʼ xiana stiʼ bixhozeʼ ne jñaaʼ. Gunabaʼ Jiobá gudii guendabiaaniʼ naa, biyubeʼ xi rusiidiʼ ca publicación stinu, biiyaʼ xii ngue racalaʼdxeʼ ne gunieniáʼ caadxi Testigu ni maʼ huaniisi lu stiidxaʼ Dios. Óraque nga bidieeʼ cuenta naquiiñeʼ guneʼ ni racalaʼdxiʼ Jiobá. Ne pa cuezaʼ tiidiʼ tiempu para gacaʼ precursora la? qué gánnadiaʼ pa zacané ngue para guchaa modo riníʼ ique bixhozeʼ ne jñaaʼ.

Gucaʼ precursora últimu iza canazayaʼ scuela. Gudiʼdiʼ si ti tiempu, gudixheʼ iqueʼ chaaʼ sti lugar ra jma caquiiñeʼ tu gucheeche diidxaʼ. Cumu qué naʼ bixhozeʼ ne jñaaʼ guireeʼ de ra lidxeʼ la? gupa xidé gulezaʼ dede ora bisaaʼ 20 iza. Yanna, para cadi chuʼ jñaaʼ xizaa la? gunieeʼ ra sucursal ne gudxeʼ laacaʼ pa zanda chaaʼ ladu gueteʼ de guidxi Japón, ra nabeza caadxi familia stidu.

Guizáʼ biecheʼ ora biiyaʼ guyuunisa caadxi de ca binni bisiideʼ de Biblia raqué. Bizulú biziideʼ inglés, purtiʼ racalaʼdxeʼ guneʼ jma lu xhiiñaʼ Jiobá. Ndaaniʼ congregación stinneʼ que nuu chupa precursor especial ni nabé runi dxiiñaʼ ne riuuláʼdxicaʼ gacanecaʼ stobi. Guluu ejemplu stícabe gana naa para gacaʼ precursora especial. Ca dxi que guca huará jñaaʼ chupa biaje ne nabé malu modo guyuube, ngue runi bibiguetaʼ ra lidxeʼ chupa biaje para gapaʼ laabe. Guizáʼ bidxagayaabe pur ni bineʼ, ne bizulú biʼniʼ tratarbe naa xcaadxi galán.

Gudiʼdiʼ si gadxe iza, bicaa Atsushi ti carta ra nuaaʼ. Laabe nga tobi de ca precursor especial ni bizeeteʼ que. Lu carta que cayábibe naa caníʼ íquebe guichaganabe ne racaláʼdxibe gánnabe pa runeʼ sentir xiixa pur laabe. Qué ñuu dxi ñuneʼ sentir xiixa pur laabe ne qué lica nidiʼdiʼ ndaaniʼ iqueʼ pa runi sentirbe xiixa pur naa. Gudiʼdiʼ ti beeu para bicabeʼ laabe, peru gudxeʼ laabe rapaʼ gana gunebiaʼyaʼ laabe jma. Bidiʼdu cuenta nuu stale cosa ni ñuuláʼdxidu ñúnidu juntu, qué racaláʼdxidu gusaanadu serviciu de tiempu completu ne zacaadu intiica asignación gudiicabe laadu. Despué la? maʼ bichaganadu. ¡Guizáʼ biecheʼ ora biiyaʼ guyé bixhozeʼ, jñaaʼ ne xcaadxi familia stinneʼ dxi bichaganadu!

Bínidu dxiiñaʼ casi precursor. Qué nindaa, guca nombrar Atsushi sustituto stiʼ superintendente de circuito. Despué gúcadu precursor especial de raqué maʼ guca xheelaʼ superintendente de circuito. Bidíʼsidu ti buelta guiráʼ ca congregación nuu lu circuito stidu, guniʼné sucursal stiʼ Japón laadu  pur teléfono ne gunabadiidxaʼ laadu: «Ñuuláʼdxitu ñuni tendertu ti circuito guidxi Nepal la?».

Oraqueca gudiʼdiʼ ndaaniʼ iqueʼ xi guni bixhozeʼ ne jñaaʼ ora gánnacaʼ maʼ chaaʼ ti guidxi zitu. Ngue runi gunieniáʼ laacabe. Bixhozeʼ bicabi teléfono que. Laabe gúdxibe naa: «Guizáʼ sicarú guidxi ra cheluʼ ca». Gudxi bixhozeʼ naa sicaríʼ purtiʼ semana ante guinieniáʼ laabe que, bisigaʼdeʼ tobi de ca xhamígube laabe ti libru ni caníʼ de guidxi Nepal, ne maca guníʼ íquebe galán lugar que para chizá binni.

Nabé nayecheʼ ca binni de Nepal, ne riuuláʼdxidu gúnidu xhiiñaʼ Jiobá raqué. Peru gucuaadu sti asignación: yanna maʼ chichuu Bangladesh lu circuito stidu, ti guidxi roʼ nuu gaxha peru gadxé costumbre stiʼ. Rucheechedu diidxaʼ gadxé gadxé modo. Gudiʼdiʼ si gaayuʼ iza, bibiguétadu Japón, ne dede nagasi naca xheelaʼ superintendente de circuito.

Biziideʼ stale cosa de Jiobá dxi guyaaʼ Bangladesh ne Nepal, peru dede yanna caziideruaʼ stale de laabe ra cayuneʼ ni nabe guidxi Japón. Gadxé gadxé historia ne cultura napa cada tobi de ca guidxi riʼ. Neca gadxé gadxé ca binni nuu ndaaniʼ ca guidxi riʼ, maʼ biiyaʼ ximodo rizaalaʼdxiʼ Jiobá cada tobi de laacabe, rudii lugar guni adorárcabe laa,  racané ne riguu ndaayaʼ laacabe.

Maʼ bidii Jiobá naa stale ndaayaʼ: bidii lugar gunebiaʼyaʼ laa ne guneʼ xhiiñaʼ, bidii naa ti xheelaʼ ni nabé nadxii naa ne maʼ gucané naa quixheʼ iqueʼ guneʼ ni jneza. Yanna jma maʼ xhamiguaʼ Jiobá ne maʼ galán nuaaʼ né familia stinneʼ. Rudieeʼ xquíxepeʼ Jiobá purtiʼ gucané naa gacaʼ xhamigaʼ jñaaʼ sti biaje. Nuaaʼ nayecheʼ purtiʼ nuaaʼ galán né Dios ne laaca nuaaʼ galán né jñaaʼ.