Ximodo zanda gulá guendaguti stiʼ Jesús lii

MAʼ RACA biaʼ chupa mil iza, lu Pascua stiʼ ca judíu ni guca lu iza 33, guti ti hombre ni qué guzaabiʼ gastiʼ para ganda guibani xcaadxi binni. Tu láʼ hombre caninu riʼ yaʼ. Jesús de guidxi Nazaret. Ne tu guiráʼ nga zanda gacané ni bíʼnibe ca yaʼ. Guiráʼ xixé binni guidxilayú. Ti versículo ni nabé nanna binni rusiene guti Jesús para guilá stale binni: «Purti nadxii xhaata Dios binni guidxilayú ngue runi bidii tobi lucha Xiiñiʼ, ti irá tu guni cre Xiiñi be que la? cadi initilú sínuque gapa enda nabani ni qué zaluxe» (Juan 3:16).

Stale binni nanna textu ca, peru huaxiéʼ si binni riene ni na ca diidxaʼ ca, nga runi rinabadiidxacabe: «Xiñee caquiiñeʼ gati Cristu pur laanu. Ñee zanda guilá guiráʼ xixé binni ni nabani lu guidxilayú pur guti ti hombre si la?». Guidúʼyanu xi rusiene Biblia de laani.

Xiñee rati binni guidxilayú

Nuu tu na guyanu para guibáninu caadxi si dxi, ne tiidinu guendanagana, chuʼnu nayecheʼ ne despué gátinu para guibáninu ti lugar jma galán. Para ca binni ni riníʼ ique zacá la? runi crécabe maca bizáʼ Dios binni para gati. Peru Biblia rusiene chaahuiʼ xiñee rati binni, nani sicaríʼ: «Pur tobi hombre biuu enda ruchee ndaani guidxilayú, ne guti be purti bichee be, ne zacá ucuá enda guti que irá xixé binni, purti laca bichee caʼ» (Romanos 5:12). Versículo stiʼ Biblia ca na rátinu purtiʼ binni ruchee laanu, purtiʼ pur «tobi hombre» rati guiráʼ binni. Tu hombre riʼ yaʼ.

Ti libru láʼ The World Book Encyclopedia, na stale de ca científicu runi cré ziúpanu de ti binni si, ne Biblia rusiene tuu nga «tobi hombre» ca. Génesis 1:27 na sicaríʼ: «Dios bizáʼ binni casi laa, casi Dios bizáʼ binni; hombre ne gunaa bizáʼ Dios». Zacá ni, ca primé binni bizaʼbe que gúcacaʼ cani jma sicarú lade guiráʼ ni bizáʼ Dios ni jma nandxóʼ.

Historia ni zeeda lu libru de Génesis cusiene chaahuiʼ laanu ximodo nga gudixhe Dios guibani binni. Ni rihuinni lu historia ca nga qué liica rieeteʼ diʼ de guendaguti luni, ra rieeteʼ si de guendaguti nga ra guníʼ Dios záticabe pa qué guzuubacabe stiidxaʼ (Génesis 2:16, 17). Dios gudixhe guibani binni ndaaniʼ ti paraísu sicarú ndaaniʼ Guidxilayú ne ñuucaʼ nayecheʼ ne nazaaca sin ñuu dxi ñáticaʼ. Laabe qué niguixhe íquedibe ñoʼxhoʼ binni ne oracaruʼ ñati. Peru, xiñee rati binni yaʼ.

Lu capítulo 3 stiʼ Génesis, na ca primé bixhózenu bicheenécabe Dios neca nánnacabe cayúnicabe ni gudxi laacabe cadi gúnicabe. Ngue runi, Dios bisabanáʼ laacabe casi maca gudxi laacabe. Laabe gúdxibe hombre que: «Yu dé lii ne yu dé ca zabiguétaluʼ» (Génesis 3:19). Ne cásipeʼ modo guníʼ Dios que, guti guirópacabe.

 Peru donda stícabe riʼ bigaandani guiráʼ binni. Cumu bicheecabe la? ca xiiñicabe maʼ qué ñanda nibánicaʼ galán sin ñuu dxi ñáticaʼ. Jiobá maca guníʼ ique gudii ti guendanabani ni qué zaluxe ca xiiñiʼ Adán ne Eva ni caʼruʼ gale, ngue runi gúdxibe laacaʼ: «Lagapa xiiñitu ne lagaca stale ne laguchá guidxilayú riʼ ne laguni dxiiñaʼ luni, ne lagapa ca maniʼ nuu ndaaniʼ nisadóʼ ne ca maniʼ ripapa guibáʼ ne guiráʼ maniʼ ni nuu lu Guidxilayú» (Génesis 1:28). Ne zaqué la? ca xiiñicabe nidalecaʼ ndaaniʼ Guidxilayú ne nibánicaʼ nayecheʼ sin ñuu dxi ñáticaʼ. Peru pur «tobi hombre» si, Adán, gúcacabe binni ruchee, ne pur nga ráticabe. Apóstol Pablu, ti hombre za de Adán casi laanu la? bicaa ca diidxaʼ riʼ: «Naa rune ni na iqueʼ, ne caya yaga lu ná pecadu» (Romanos 7:14).

Ora bichee Adán biʼniʼ feu ni jma sicarú bizáʼ Dios, nga nga binni guidxilayú. Ca xiiñiʼ Adán laaca gúpacaʼ xiiñicaʼ, despué xhiágacaʼ, ne zacá bidale binni. Cada binni ni bibani ti tiempu la? rálecaʼ, riniisicaʼ ne rápacaʼ xiiñicaʼ ne ráticaʼ. Xiñee gúticabe yaʼ. Purtiʼ zácabe de Adán. Biblia na: «Stale tu guti purti bichee Adán» (Romanos 5:15). Cumu Adán qué nizaalaʼdxiʼ ni guizaaca ca xiiñiʼ la? bicheenebe Dios, pur nga raca huaranu, ricá íquenu cosa dxabaʼ ne rátinu purtiʼ xiiñibe laanu.

Lu carta ni bicaa apóstol Pablu ra nuu ca xpinni Cristu de Roma, guniʼbe de yuubaʼ ni ridiʼdiʼ ca binni ruchee casi laabe ne pabiáʼ stipa rúnicabe para gúnicabe ni jneza. Laabe guniʼbe: «Pobre de naa. Nanna xi gueda iree xaʼyaʼ. Tuu nga cuee naa de enda guti ni naaze naa ri pue». Cadi dxandíʼ rucaa ca diidxaʼ riʼ laanu guiníʼ íquenu la? Tuu nga zanda gulá Pablu ne guiráʼ cani racalaʼdxiʼ guilá de lu naʼ guendaruchee ne guendaguti yaʼ. Laaca Pablu ricabi ne ca diidxaʼ riʼ: «Rudiee [...] xquixe Dios purti Jesucristu zabee naa de laani. Laabe nga Señor stinu» (Romanos 7:14-25). Casi maʼ bidúʼndanu ca, Dios ni bizáʼ laanu maʼ biseendaʼ xiiñiʼ Jesucristu para gulá laanu.

 Dxiiñaʼ chiguni Jesús para gulá binni

Jesús peʼ bisiene chaahuiʼ xi dxiiñaʼ chiguni para gulá binni guidxilayú de lu naʼ guendaruchee ora guníʼ beeda lu Guidxilayú para gudii «xpida para ilá stale binni» (Mateo 20:28). Xiñee riquiiñeʼ xquendanabani Jesús para guilá binni yaʼ. Xi ribeendunu pur gútibe yaʼ.

Biblia na guca Jesús ti hombre ni «qué nuchee» ne «qué ñaca né be cani cuchee tobi si». Biaʼ dxi bibani Jesús la? bíʼnibe guiráʼ xixé ni na Ley stiʼ Dios (Hebreos 4:15; 7:26). Nga runi, Jesús guti peru cadi purtiʼ bichee o purtiʼ qué nuzuubaʼ diidxaʼ casi Adán que (Ezequiel 18:4). Sínuque Jesús bidii lugar guuti binni laa, neca qué guzaabiʼ gastiʼ, para guni ni na Bixhoze ti guilá binni de lu naʼ guendaruchee ne guendaguti. Casi maʼ bidúʼyanu ca biale de ndaaniʼ ladxidóʼ Jesús gudii «xpida para ilá stale binni». Ne bisihuínnibe nadxiibe binni purtiʼ gútibe «jlugar irá xixé binni guidxilayú» (Hebreos 2:9).

Guendanabani stiʼ Jesús que bisácani biaʼca bisaca guendanabani ni biniti Adán ora bichee. Xi guleendú binni pur guti Jesús yaʼ. Ora gútibe la? Jiobá biiyaʼ «beda tixe[be] saca ilá» guiráʼ binni, ne biiyabe jneza ngue ni guca que (1 Timoteo 2:6). Dios biquiiñeʼ guendanabani stiʼ Jesús para guiaxa donda stinu ne zacá guilanu de lu naʼ guendaruchee.

Biblia nabé ruzeeteʼ ni biʼniʼ Dios riʼ, ne biluiʼni pabiáʼ nadxiibe binni Guidxilayú. Ne ridúʼyanu zacá ni purtiʼ Pablu bisietenalaʼdxiʼ ca xpinni Cristu ca diidxaʼ riʼ: «Ma uzíʼ Dios laatu» (1 Corintios 6:20; 7:23). Pedru, ti discípulo stiʼ Jesús, bicaa qué niquiiñeʼ diʼ Dios oro ne plata para gulá binni de lu naʼ guendaguti, sínuque biquiiñebe rini stiʼ Xiiñibe (1 Pedro 1:18, 19). Ne Jiobá gudixe biaʼ caquiiñeʼ guiaxa ne guendaguti stiʼ Cristu para guilá binni de lu naʼ guendaguti.

Ñee zacaaluʼ ca ndaayaʼ ni chiguicaa binni pur guti Jesús la?

Apóstol Pablu bicaa xi guiráʼ ndaayaʼ zacaa binni pur guti Cristu: «[Jesucristu] gudixe [...]saca bixá stonda nu, ne cadi sti si nu, sínuque ne sti irá xixé binni guidxilayú» (1 Juan 2:2). Ca diidxaʼ ca rusihuinni cani guti Cristu pur guiráʼ binni. Peru, ñee guiráʼ binni nga zacaa ca ndaayaʼ ni chigudii Jesús ca neca qué gúnicaʼ gastiʼ la? Coʼ, cadi zacá diʼ ni. Bietenalaʼdxiʼ ni bizaaca ca hombre bizéʼtenu lu tema ni maʼ gudídinu ca. Ca hombre bilá laacabe que gundétecaʼ ti jaula dede ra nuu ca hombre que, peru cada tóbicabe gupa  xidé guyuu ndaaniʼ ni. Zacaca naquiiñeʼ guni cani racalaʼdxiʼ guicaa ca ndaayaʼ ni zacaa binni pur guendaguti stiʼ Cristu. Laaca naquiiñeʼ gúnicaʼ xiixa.

Xii nga canabaʼ Dios laacabe gúnicabe yaʼ. Juan 3:36 na: «Tu runi cre Xiiñi be la? napa enda nabani ni qué zaluxe, peru tu qué uzuuba stiidxa Xiiñi be, qué zapa di enda nabani, sínuque xiana stibe nuu luguiáʼ». Nga runi, Dios canabaʼ laanu gápanu fe Cristu. Peru cayaadxaruʼ gúninu xiixa: «Pa cayuni nu ni gudixhe Cristu guni nu la? zacá nanna dxichi nu runibiáʼ nu laa» (1 Juan 2:3). Para ganda gusaananu de gácanu binni ruchee ne qué gátinu la? naquiiñeʼ gápanu fe Jesucristu ne guzúʼbanu stiidxabe.

Ti modo nabé risaca gusihuínninu runi crenu guti Cristu pur binni nga chuunu ra guietenaláʼdxicabe guendaguti stiʼ Jesús, casi biʼniʼ mandarbe gácani. Ante gati Jesús gudoxhiné ca discípulo stiʼ ne gúdxibe laacaʼ: «Laguni casi cayuni nu riʼ para guietenaladxi tu naa» (Lucas 22:19). Ca testigu stiʼ Jiobá rúnicaʼ ni biʼniʼ mandar Cristu laacaʼ, purtiʼ dxandíʼ xhamígucaʼ xiiñiʼ Dios. Guiráʼ iza rietenaláʼdxicabe guendaguti stiʼ Jesucristu 14 stiʼ beeu nisán guiaaziʼ si Gubidxa, ne dxi ca zeedani lu calendariu ni biquiiñeʼ dxi gucuá Biblia. Runi invitardu lii cheluʼ guendaridagulisaa ca ne zacá gúniluʼ ni biʼniʼ mandarbe gaca. Ca testigu stiʼ Jiobá ni nuu neza ra liʼdxuʼ zábicaʼ lii pora ne paraa gácani. Ne racá zábicabe lii xi caquiiñeʼ gúniluʼ para guireeluʼ de lu naʼ guendaguti ne guendaruchee ni gúpanu pur bichee Adán.

Huaxiéʼ si binni nga riene pabiáʼ risaca ni biʼniʼ Dios ne ni biʼniʼ Xiiñibe para guilá binni. Peru ca binni ni runi cré guti Jesús para guilá binni la? zanda chuʼcaʼ nayecheʼ casi na ca diidxaʼ bicaa apóstol Pedru ra nuu ca xpinni Cristu, nabe: «[Laatu] runi cre tu [Jesús] ne rieche tu dede qué ridxela tu xi iníʼ tu, de tantu ridxá ladxidóʼ to de enda nayecheʼ. Purti nanna tu bilá be xhialma tu. Ne biʼni be ni purti bini cre tu» (1 Pedro 1:8, 9). Pa gannaxhiiluʼ Jesucristu de guidubi ladxidoʼloʼ ne guni creluʼ gútibe para guilá guiráʼ binni la? nabé nayecheʼ ziuuluʼ yanna ne zanda cuézaluʼ guilaluʼ de lu naʼ guendaruchee ne guendaguti.

[Dibuju/foto ni zeeda lu yaza 6]

Jesús bidii xquendanabani para guiree guiráʼ guendananá ni bisaanané Adán laanu

[Dibuju/foto ni zeeda lu yaza 7]

Iza riʼ bietenaláʼdxidu guendaguti stiʼ Jesucristu sábadu 22 stiʼ marzo, biaaziʼ si Gubidxa