2. Hambre

«Ziuu hambre» (MARCOS 13:8).

● Yendá ti hombre ndaaniʼ ti guidxihuiiniʼ láʼ Quaratadji (Níger), purtiʼ gastiʼ guendaró xquídxibe, laaca yendá ca xprímube, ca bíʼchibe ne ca bizáʼnabe raqué, peru ora bíʼyabe laacaʼ biábabe layú, ¿xiñee yaʼ? Sidi, jefe stiʼ guidxihuiiniʼ ca ná: «Purtiʼ qué ganda diʼ gudiibe ni gó familia stibe, ne pur nga qué gápabe valor para guyadxibe laacaʼ».

¿CAADXI DE CA DATU NI NÁPANU? Tobi de cada gadxe binni nuu lu Guidxilayú qué gapa ni gó, ne jma nagana rácani ndaaniʼ África subsahariana, racá tobi de cada chonna binni qué rizaa ni gó. Guzéʼtenu ti ejemplu, ndaaniʼ ti familia ra nuu hombre, gunaa ne ti xiiñicaʼ, nuu guendaró para chupa de laacabe, ¿tu tobi de laacabe riaana sin gó, ¿hombre ca la? o xheelaʼ? Pue nga nga ni rizaaca stale familia guiráʼ dxi.

¿NI RINÍʼ BINNI? Rudii Guidxilayú riʼ stale guendaró para guiráʼ binni, ni caquiiñeʼ si gúninu nga gánnanu ximodo iquiiñenu ni, ti gapa guiráʼ binni ni gó.

¿ÑEE BIAʼSI NI RINÍʼ BINNI LA? Stale gobiernu huayuni stipa gapa binni ni gó ti cadi gáticaʼ de hambre, peru qué huayanda diʼ gúnicaʼ ni.

¿XI RÁBILUʼ? ¿Ñee biaʼsi ca diidxaʼ ni zeeda lu Marcos 13:8 la? Neca nuu stale tecnología tiempu riʼ, ¿ñee nuuruʼ lugar qué gapa binni ni gó la?

Ca xu roʼ ne hambre ni nuu ndaaniʼ stale guidxi rusihuínnicani maʼ nabáninu lu ca últimu dxi.

[Ni caníʼ/Epígrafe]

«Stale de ca xcuidi ni rati pur neumonia, yuubaʼ ndaaniʼ ne xcaadxi guendahuará, ñanda nilacaʼ pa ñaca nizaa ni rocaʼ». (ANN M. VENEMAN, EX DIRECTORA EJECUTIVA DE UNICEF)

[Ra zeeda lá cani bidii o bisigaʼdeʼ imagen]

© Paul Lowe/Panos Pictures