Padxí guzulú guendaridinde ni láʼ Armagedón

«Biya dxie ne biiya zuhuaa jma binni [...] dede iruti ñanda nugaba laacaʼ. Za ca de irá ladu ne de irá guidxi ne irá idioma riníʼ binni [...] ca nga nga ni udiʼdi ra jma nagana.» (APOCALIPSIS 7:9, 14)

MAʼ NUU listu guiráʼ ni caquiiñeʼ para guzulú Armagedón. Ximodo nánnanu zacá ni yaʼ.

Yanna riʼ maʼ nuu millón de binni ni maʼ cayuni ni na Jiobá ne nabánicaʼ casi na ca ley ni zeeda lu Biblia. Zácabe de guiráʼ guidxi, de guiráʼ tribu, ne de gadxé gadxé diidxaʼ ne cumu nuuné Dios laacabe la? nadxiisaacabe ne nuucabe tobi si. Ne zacá nga nabani ca testigu stiʼ Jiobá (Juan 13:35).

Maʼ cadi candaa zutagulisaa Binidxabaʼ ca xpinni ne zucaalucaʼ xquidxi Dios, ti guidxi ni nuudxí ne ruluíʼ guirutiʼ tu cayapa ni (Ezequiel 38:8-12; Apocalipsis 16:13, 14, 16). Xiñee nannadxíchinu zacá ni yaʼ. Purtiʼ lu Biblia rieeteʼ caadxi cosa ni zazaaca ne zacané laanu gánnanu padxí guzulú Armagedón, ne stale de laacani maʼ cahuinni cani yanna.

Ca diidxaʼ riguixhená ni maʼ cayaca ni nacaʼ yanna

Ca discípulo stiʼ Jesús gunabadiidxacaʼ laabe ximodo ganna binni «dxi mayaca [...] iluxe guidx[i]layú riʼ» (Mateo 24:3). Ora guníʼ Jesús de cani chiguizaaca, guniʼbe ca diidxaʼ riʼ: «Zucaa lú ti gobiernu sti gobiernu ne zucaa lú ti guidxi sti guidxi, [...] ne zaca gubiña ne xu stale lugar». Ne guníʼrube: «Ne neca ma cayaca irá nga la? laganna raqué ru nga bizulú enda naná que» (Mateo 24:7, 8). Apóstol Pablu laaca guníʼ de tiempu riʼ casi ca últimu dxi ne bisiénebe «jma nagana zaca» ca dxi ca (2 Timoteo 3:1). Ñee cadi rábiluʼ maʼ cayaca ni na ca diidxaʼ riguixhená riʼ yanna la?

Peru xiñee nabé nagana zabani binni lu ca últimu dxi ca yaʼ. Apóstol Juan bisiene  ni ora guníʼ «huaxiéʼ dxi» napa Binidxabaʼ ne ca demonio stiʼ para gúnicaʼ guiráʼ ni gacaláʼdxicaʼ lu Guidxilayú. Ne laaca bisiénebe guizáʼ zadxiichi Binidxabaʼ (Apocalipsis 12:7-12). Cadi dxandíʼ guiráʼ ladu rihuinni cadxiichi binni ne nisi cadíndecaʼ la?

Jesús laaca guníʼ zaca ti dxiiñaʼ naroʼbaʼ ca dxi nagana ca: «Zuiʼ cabe stiidxa Dios de idubi naca guidxilayú para ganna irá xixé guidxi modo runi mandar, ne dxi que ru nga iluxe guidxilayú riʼ» (Mateo 24:14). Ca testigu stiʼ Jiobá cucheechecaʼ ca diidxaʼ nacubi ne galán stiʼ Reinu stiʼ Dios lu jma de 235 guidxi ne nápacabe libru ne revista lu jma de gaayuʼ gayuaa diidxaʼ. Rúnicabe chupa revista ni cusiidiʼ de Biblia, laacani nga revista Torre stiʼ ni rapa ne ¡Despertad!, ne laacani nga jma rusaananécabe binni lu guidubi naca Guidxilayú. Ne laaca maʼ bitiixhicabe Biblia biaʼ ti gayuaa diidxaʼ. Ne qué riáxacabe para gúnicabe dxiiñaʼ riʼ ne randa raca ni pur bueltu ni rudii binni de guidubi ladxidóʼ. Ñee rusihuinni dxiiñaʼ riʼ cayaca ca diidxaʼ ni guníʼ Jesús que la?

Biblia laaca ruzeeteʼ caadxi cosa ni zazaaca para guzulú tinde Jiobá Dios ne ca xhenemigu. Guidúʼyanu chonna diidxaʼ riguixhená ni cayaadxaʼ gaca ni na.

Ca diidxaʼ riguixhená ni mayaca gaca ni na

Primé diidxaʼ riguixhená. Biblia cusiene zaníʼ ca xaíque guidxi ca diidxaʼ riʼ: «Gasti chi gaca, nuu dxí guidxi». Zaníʼcabe zacá purtiʼ zaníʼ íquecabe mayaca guni chaahuicabe ca guendanagana ni nuu lu Guidxilayú riʼ. Peru cadi dxandíʼ ziuudxí guidxi despué de guiníʼcabe ca diidxaʼ ca (1 Tesalonicenses 5:1-3).

Guiropa diidxaʼ riguixhená. De racá, caadxi xaíque guidxi zucaalucaʼ ca religión ni nuu lu guidubi naca Guidxilayú. Lu Biblia na zeeda gaca ca xaíque guidxi ca casi ti maniʼ ngola, ne ca religión ni rusiidiʼ ni cadi dxandíʼ ni nuu lu guidubi naca Guidxilayú riʼ zeeda gaca cani casi ti gunaa ni dxiʼbaʼ maniʼ riʼ (Apocalipsis 17:3, 15-18). Ne sin ganna maniʼ ngola riʼ zuni ni na Dios ora gunitilú ca religión ni nacaʼ riniʼcaʼ pur Dios.

Sicaríʼ bisiene apóstol Juan ni chiguizaaca riʼ: «Ne zaca nanalaʼdxi chii cachu ni napa mani que dxa gunaa dxaba que, ne zusaana ca laabe xie ladi be sin gastiʼ. Zo ca xpeela be ne zuzaaqui ca laabe [...,] [purtiʼ] uluu Dios ni ndaani ladxidóʼ cabe para gaca ni ma gudixhe gacaʼ» (Apocalipsis 17:16, 17).

Guionna diidxaʼ riguixhená. Despué de gunitilú Binidxabaʼ ca religión ni rusiidiʼ ni cadi dxandíʼ, zucaabe ca xaíque guidxi gucaalucaʼ ca xpinni Jiobá (Apocalipsis 7:14; Mateo 24:21).

Ximodo zanda gacané ni lii

Pa qué huayanda guʼndaʼ chaahuiluʼ Biblia, zándaca gaca nagana guni creluʼ pa zaca guirá cani maʼ bizéʼtenu ca. Peru nápanu stale razón para guni crenu zaca cani ne maʼ cadi candaa para gaca cani. Guiráʼ ca diidxaʼ riguixhená ni zeeda lu Biblia ni maʼ guca ni na, cusihuínnicani zaca cani maʼ guníʼ Dios chigaca. *

Galán gúniluʼ cueeluʼ ti tiempu huiiniʼ para gánnaluʼ xi rucaa ca testigu stiʼ Jiobá guni crecaʼ maʼ gaxha nuu dxi stiʼ Dios, ni jma nandxóʼ, ne xiñee cadi naquiiñeʼ guidxíbiluʼ dxi ca. Gunabaʼ laacabe guluíʼcabe lii xiná Biblia naquiiñeʼ gúniluʼ para gácaluʼ tobi de ca binni ni chigulá Jiobá (Apocalipsis 16:14). Cani guiziidiluʼ ca zucaacani lii guchaa modo riníʼ íqueluʼ de cani chiguizaaca despué.

[Nota]

[Ni caníʼ yaza 8]

Ñee rusihuinni dxiiñaʼ ni cayuni ca testigu stiʼ Jiobá cayaca tobi de ca diidxaʼ riguixhená ni zeeda lu Biblia la?