Ora riníʼ binni xiixa neca nanna cadi dxandíʼ ni, maʼ cusiguii. Ñee huayuu dxi gusiguiiluʼ la? *... Dede chupa chonna binni huaniisi ni nadxiicaʼ Dios huayúnicaʼ ni. Tobi de laacabe nga ti binni ni rieeteʼ lu Biblia ne zándaca runibiaʼluʼ laa. Labe Pedru, ne gúcabe tobi de ca 12 apóstol stiʼ Jesús. Ñee riuuláʼdxiluʼ gánnaluʼ xiñee bisiguiibe la? Bicaadiaga historia riʼ.

Gunaazesícabe Jesús yenécabe laa ralidxi xaíque stiʼ ca sacerdote. Maʼ gudiʼdiʼ galaa gueelaʼ. Guyuu Pedru lu patiu stiʼ yoo que ne gurí gaxha de ra cayaca ti guí ne guirutiʼ ñunibiáʼ laa. Ora bidxiña criada ni bidii lugar chuʼbe ra yoo que gaxha de ra cayaca guí que, binibiáʼ laabe ne naa: «Lii laca xpinni Jesús [...] lii nja». Guizáʼ bidxibi Pedru óraque ne guníʼ cadi dxandíʼ ni.

Gupa si ratu biʼyaʼ sti criada laabe ne naa: «Ndi laca xpinni Jesús [...] laa». Sti biaje ca guniʼbe cadi dxandíʼ ni. Despué bidxiña xcaadxi binni laabe ne nacaʼ: «Dxandí de laacabe lii».

Cumu maʼ cadxibi Pedru la? ngue runi bisiguiibe ra guionna biaje ne nabe: «Qué racabiaʼya laabe». Casi biluxe guniʼbe biindaʼ ca ti gallu. Óraque biiyadxí Jesús laabe, ne bietenaláʼdxibe raca chupa chonna si ora gudxi laabe «ante guʼnda gallu zaníʼ be chonna tiru qué runibiáʼ be laa». Guizáʼ biinaʼ Pedru dede guyuu yuubaʼ ladxidóʼ.

Ñee rábiluʼ zándaca guizaacaluʼ xiixa zacá la?... Guníʼ ique nuuluʼ ra scuela, ne málasi binadiágaluʼ caníʼ ca xcompañéruluʼ de ca testigu stiʼ Jiobá. Tobi de laacabe na: «Qué runi saludárcabe bandera». Ne óraque na stobi: «Qué ridíndecabe pur xquídxicabe». Ne stobi de laacabe guníʼ: «Cadi dxandíʼ xpinni Cristu laacabe purtiʼ qué rúnicabe Navidad». Ne tobi de laacabe biiyadxí lii ne na: «Testigu stiʼ Jiobá lii njaʼ».  Xi niniʼluʼ óraque yaʼ...

Naquiiñeʼ gánnaluʼ dede ante xi guicábiluʼ. Cumu qué ganna Pedru xi guicabi ora gunabadiidxacabe laa la? ngue runi bisiguiibe. Peru nabé triste guyuube pur ni bíʼnibe que, ngue runi bitiidilaʼdxiʼ Dios stóndabe.

Yanna guininu xi bizaaca Ananías. Laabe gúcabe stobi de ca discípulo stiʼ Jesús ni bibani dxiqué ne laaca bisiguiibe, ne Safira, xheelabe, guníʼ ique jneza ngue ni bíʼnibe. Peru Dios qué nutiidilaʼdxiʼ stóndacabe, guidúʼyanu xiñee.

Maʼ gudiʼdiʼ chii gubidxa de bisaana Jesús ca apóstol stiʼ ne maʼ bibiguétabe guibáʼ para chuʼbe ra nuu Dios. Ne ndaaniʼ guidxi Jerusalén guyuunisa chonna mil binni, stale de laacaʼ zeedacaʼ de zitu para gápacaʼ saa stiʼ Pentecostés, ne biaanacaʼ sti tiempu para guiziidirucaʼ jma. Ngue runi chupa chonna de ca discípulo stiʼ Jesús rudiicaʼ xpuéltucaʼ ti ganda gacanecaʼ cada tobi biaʼ caquiiñeʼ.

Ananías ne xheelaʼ bitoocaʼ ti layú para gacanecaʼ cani nacubi guyuunisa. Ora bidiibe bueltu que ca apóstol la? gúdxibe laacaʼ cudiibe biaʼ bidoo layú que, peru cadi dxandíʼ ni purtiʼ biaananebe ti ndaa bueltu que. Gucané Dios Pedru para gunna xi cá ique Ananías guni ne gúdxibe Ananías: «Cadi binni di nga ucalaʼdxu nusiguiiuʼ, sínuque Dios». Oraqueca guti Ananías. Chonna ora despué bedandá xheelabe. Nin ganna xi bizaacabe, laaca bisiguii, ne laaca guti.

¡Nabé risaca ni rusiidiʼ ejemplu riʼ laanu! Rusiidiʼ ni laanu cadi liica naquiiñeʼ gusiguiinu. Neca zacá guiranu rucheʼnu ne jmaruʼ si ora nahuiininu. Ñee cadi riécheluʼ gánnaluʼ nadxii Jiobá lii ne zutiidilaʼdxiʼ stóndaluʼ cásica bíʼnibe né Pedru la?... Bietenalaʼdxiʼ cadi liica naquiiñeʼ gusiguiinu. Ne pa chuʼ dxi gusiguiinu la? naquiiñeʼ guinábanu Dios gutiidilaʼdxiʼ stóndanu. Ne nánnanu nga nga ni biʼniʼ Pedru, ngue runi bitiidilaʼdxiʼ Dios stóndabe. Ne pa gúninu stipa pur cadi guibiguetaʼ gúninu ni la? laaca zutiidilaʼdxiʼ Dios stóndanu.