Guleʼ ndaaniʼ ti guidxi huiiniʼ láʼ Texcoco. Ca dxi que cadi nexheʼ diʼ pavimentu ndaaniʼ ca calle stini. Rietenalaʼdxeʼ ca binni ni nabeza ndaaniʼ ca guidxi huiiniʼ nuu gaxha de laani redanecaʼ caadxi burru huiiniʼ ni maʼ nuáʼ ni rutoocaʼ. Biniiseʼ ndaaniʼ ti familia nabé pobre, naa nga zendaʼ lu gadxe de lade gaʼ xiiñiʼ jñaaʼ. Xhiiñaʼ bixhozeʼ nga guni chaahuiʼ guelaguidi, peru gútibe dxi napaʼ gadxe iza. Guizáʼ nadipaʼ guca para jñaaʼ gusiniisi laadu.

Bixhozebiidaʼ bixhidxi violín ne guca director stiʼ ti orquesta ni bixhidxi música clásica stiʼ religión. Stale de ca binnilidxeʼ bixhídxicaʼ xiixa instrumentu, casi jñaaʼ la? guyuu lade ca binni ni ruundaʼ ra yuʼduʼ ne xtiuaʼ guca tobi de cani ruundaʼ ópera ne bixhidxi pianu. Nabé católicu gúcadu. Casi naa la? gucaʼ monaguillo (ni racané sacerdote) ne gucuá iqueʼ ñacaʼ ti misioneru católicu. Peru laaca guyuuladxeʼ guuyaʼ película de karate, ne ra jma biiyaʼ cani jmaruʼ si bicaa cani naa tindeniáʼ binni.

Gucuá laʼyaʼ ndaaniʼ ti scuela ra rusiidicabe de religión ni nuu ndaaniʼ guidxi Puebla, laani nga biquiiñecabe casi seminariu. Nabé gucuá iqueʼ ñacaʼ sacerdote, peru últimu iza guyuaaʼ raqué maʼ qué ñuuladxeʼ stale cosa ni raca ndaaniʼ yuʼduʼ que. Guca nagana para naa purtiʼ stale biaje gucalaʼdxiʼ tobi de ca baʼdudxaapaʼ ni naca monja raqué ñataniáʼ laa, peru bicaa naʼyaʼ laabe, neca bineʼ ngue, bicaani naa gucaaʼ iqueʼ guichaganaʼyaʼ. Laaca biiyaʼ stale de ca sacerdote que rusihuínnicaʼ rúnicaʼ ni jneza peru laaca rúnicaʼ ni cadi jneza. Despué maʼ qué nicá iqueʼ ñacaʼ sacerdote.

 Gudixheʼ iqueʼ guiziideʼ guxhidxeʼ saa ndaaniʼ Conservatorio Nacional de Música ni nuu ndaaniʼ guidxi Méjicu. Dxi binduuxeʼ scuela que bichaganaʼyaʼ ne gupaʼ tapa xiiñeʼ. Ne dxiiñaʼ bineʼ nga guundaʼ ra cayaca mixaʼ.

Dede dxi bichaganaʼyaʼ xheelaʼ nabé gúpadu guendanagana. Naa ne laabe guizáʼ gudíndedu, ne jmaruʼ si purtiʼ celoso naa ne laaca celosa laabe. Nacubigá que ridindediidxasidu, peru despué maʼ rigúʼsaadu golpe laadu. Ngue runi bisabixheeladu dxi nápadu trece iza de bichaganadu ne despué guca divorciardu.

Primé biaje gunieniáʼ ca testigu stiʼ Jiobá que caʼruʼ diʼ gusabixheeladu. Ti dxi bixhidxináʼ chupa Testigu ralidxeʼ ne gúdxicaʼ naa pa zuundanecaʼ naa Biblia. Cumu guníʼ iqueʼ nannaʼ stale de religión la? gudxeʼ laacabe zanda gueedacabe para gulueeʼ laacabe cadi jneza ni rusiidicabe. Gunabadiidxaʼ laacabe stale cosa nagana ne guníʼ iqueʼ qué ñanda nicábicabe naa, peru guizáʼ bidxagayaaʼ ora biiyaʼ biquiiñecabe Biblia para bicábicabe guiráʼ ni gunabadiidxaʼ laacabe; raqué bidieeʼ cuenta huaxiéʼ nannaʼ. Peru dxiqué huaxiéʼ runi respetar xheelaʼ ca Testigu ne naa nabé riuu xhiiñaʼ, ngue runi, maʼ qué ñanda ñuundanécabe naa.

Gudiʼdiʼ si gaayuʼ iza, bidxaagaʼ ca testigu stiʼ Jiobá sti biaje. Dxiqué maʼ nabezaniáʼ Elvira, peru laa qué ridxiichi diʼ ora chécabe ralidxeʼ, ngue runi gunda biindanécabe naa Biblia sti biaje. Neca zaqué, gupa xidé gudiʼdiʼ stale iza para gunda bichaaʼ modo nabaneʼ.

Bidieeʼ cuenta pa rapaʼ gana guneʼ ni na Jiobá la? caquiiñeʼ guchaaʼ stale cosa lu xquendanabaneʼ. Primeca ni caquiiñeʼ guneʼ nga gusaanaʼ de guneʼ dxiiñaʼ ra yuʼduʼ ne guyubeʼ sti dxiiñaʼ para ganda gapaʼ ni guibaneniáʼ (Apocalipsis 18:4). Ne laaca caquiiñeʼ guichaganaʼyaʼ Elvira.

Tobi de ca cosa ni jma nagana guca para naa nga gucueezaʼ naa purtiʼ nabé nagueenda ridxiicheʼ. Lu Biblia zeeda chupa versículo ni nabé gucané naa para bichaaʼ modo naa. Lu Salmo 11:5 biziideʼ nanalaʼdxiʼ Jiobá guendaridinde, ne 1 Pedro 3:7 bisiidiʼ ni naa naquiiñeʼ guneʼ respetar xheelaʼ pa racalaʼdxeʼ gucaadiaga Dios ca oración stinneʼ. Guníʼ iqueʼ ni na ca diidxaʼ zeeda lu ca textu riʼ ne gunabaʼ Jiobá gacané naa; chaahuiʼ chaahuiʼ maʼ gunda bicueezaʼ naa de nidxiicheʼ nagueenda.

Yanna nabaneniáʼ binnilidxeʼ nayecheʼ. Cayuneʼ stipa pur chuaaniáʼ ca xiiñeʼ, ni gupaniáʼ primé xheelaʼ galán ne cayuneʼ stipa pur gacaniáʼ familia ni napaʼ yanna para gaca fe sticaʼ jma naguidxi.

Dxi nahuiineʼ gucuá iqueʼ ñacaʼ sacerdote para gacaniáʼ binni; peru yanna huaxa maʼ nannaʼ ximódopeʼ zanda gacaniáʼ laacabe ne nga ruchá tipa ladxiduáʼ purtiʼ maʼ nannaʼ xi pur nabaneʼ. Yanna riʼ rusiideʼ binni guxhidxi saa ne laani nga racaneni naa gudieeʼ ni caquiiñeʼ binnilidxeʼ. Rudieeʼ xquíxepeʼ Jiobá saca gupa paciencia naa ne pur bidii lugar naa guchaaʼ ne gacaʼ ti binni nachaʼhuiʼ.