XI RINÍʼ íqueluʼ ora gunadiágaluʼ guinabadiidxaʼ binni ni cá lu primé yaza stiʼ revista riʼ. Nuu tu laa ridxiichi ora gunadiaga ni, peru nuu stale binni rinabadiidxaʼ zacá ne dede riníʼ íquecaʼ malu Dios.

Caadxi binni ni hualá ra guca xiixa desgracia guizáʼ naroʼbaʼ rinabadiidxacaʼ: «Xiñee cudii Dios lugar guizaaca ndiʼ pue. Ñee purtiʼ qué rizaaláʼdxibe laanu la? o purtiʼ malu laabe».

Nuu xcaadxi binni ridxiichicaʼ ora gúʼndacaʼ xiixa relatu zeeda lu Biblia, casi ni cuzeeteʼ de Nisaguié naroʼbaʼ biaba dxi bibani Noé, ne riniʼcaʼ: «Qué guirá guidxagayaaʼ xiñee biiti Dios guiráʼ binni que pa nácabe ti Dios ni rannaxhii. Ñee bíʼnibe zacá purtiʼ malu laabe la?».

Ñee huayuu dxi guni sentirluʼ zacá la? Ñee raca nagana para lii guicábiluʼ ca binni riníʼ malu Dios la? Intiica huazaacaluʼ, peru galán gúʼndaluʼ cani zeeda raríʼ.

Ridxiichinu purtiʼ gadxé laanu de ca maniʼ: nánnanu xii nga jneza ne ni cadi jneza, ne purtiʼ bizáʼ Dios laanu «casi laa» (Génesis 1:27). Textu ca caníʼ bidiibe laanu guendabiaaniʼ para gusihuínninu nánnabe gunáʼ nga ni jneza ne ni cadi jneza ne bidiibe laanu guenda casi ni nápabe ne bisaanabe ley ni naquiiñeʼ chinándanu. Yanna, pa laanu ridxiichinu ora runi binni cosa malu, ñee cadi jma ruchiichini Dios la?

Ne nánnanu jma ruchiichi cani laabe pur ca diidxaʼ zeeda lu Biblia ra na: «Jma nasoo ca neza stinneʼ de ca neza stitu, ne cani riníʼ iqueʼ de cani riníʼ íquetu» (Isaías 55:9). Pa guininu malu Dios la? zeeda gácani casi ora nininu jma jneza cani rúninu que cani rúnibe. Peru ante guiníʼ íquenu zacá, galán gánnanu jma de laabe. Zándaca lugar de guinabadiidxanu pa malu Dios, jma galán guinabadiidxanu xiñee ruluíʼ nabé malu caadxi cosa ni rúnibe. Primeru guidúʼyanu xi guiráʼ runi ti binni malu.

Ora guininu malu tuuxa, zeeda gácani casi ora nininu maca riuulaʼdxiʼ binni riʼ guni cosa malu. Ti binni ni runi cosa malu riecheʼ ora guʼyaʼ cayacaná tuuxa o qué liica riuubaʼ ladxidóʼ ora guʼyaʼ cayacaná binni. Quíxhenu ti ejemplu, pa uguu jneza ti hombre xiiñiʼ para si guniná ladxidoʼbe la? nabé malu laa. Peru pa gúnini para gusiidiʼ laabe o para gapa laabe la? zusihuinni naca ti hombre nachaʼhuiʼ. Ora gúninu xiixa jma nga nagueenda riníʼ ique binni cadi jneza ni cayúninu, ne pa huaníʼ íquecabe zacá ora gúniluʼ xiixa la? huadiiluʼ cuenta dxandíʼ ni.

Yanna, guidúʼyanu guiropaʼ razón ni bizéʼtenu primé que, ni rucaa binni guiníʼ ique malu Dios: ora guizaaca xiixa desgracia, casi ti nisaguié o ti xu, ne ora gúʼndacabe ca relatu ni zeeda lu Biblia ra cayeeteʼ biʼniʼ castigar Dios binni. Ñee rusihuínnicani dxandíʼ malu Dios la?