Dede nahuiineʼ nabé gunnaxhieeʼ guiráʼ cosa biʼniʼ Dios lu Guidxilayú. Gatigá riniáʼ binnilidxeʼ maʼ zizadu ndaaniʼ ca layú ra nuu stale guixi gaʼ ne yagaroʼ ne ra nuu ca laguna ni naguu leʼ xquídxidu ni láʼ Jyväskylä, laani nuuni galahuiʼ guidxi Finlandia. Laaca nabé nadxieeʼ guiráʼ clase maniʼ. ¡Dxi nahuiineʼ nabé guyuuladxeʼ quiidxeʼ guiráʼ biʼcuʼ ne mistuʼ ni guuyaʼ! Dxi biniiseʼ la? riuubaʼ ladxiduáʼ ora guuyaʼ pabiáʼ stale binni runiná ca maniʼ ca, ngue runi bidaaguaʼ ti grupu binni ni rapa ca maniʼ ca ti cadi chuʼ tu guniná laacame. Raqué binebiaʼyaʼ xcaadxi binni ni riníʼ ique casi riníʼ iqueʼ.

Bínidu stale campaña para gápadu ca maniʼ ca de ca binni ni runiná laacame. Gudíʼzidu revista lu binni ne biluidu binni videu ni caníʼ caquiiñeʼ gápacabe ca maniʼ, bínidu marcha para gusihuínnidu cadi cayuuláʼdxidu xiixa ni cayaca ne bitagulisaadu binni para gucáʼludu ca laboratorio ne ca tienda ni rutoo cosa de guidi. Despué bínidu ti grupu de binni ni ruuyaʼ cadi guninácabe ca maniʼ. Cumu ni jma racaláʼdxidu nga gacanedu para cadi chuʼ tu guniná ca maniʼ ca la? gupanedu ca xaíque guidxi guendanagana pur modo bínidu ni. Ne laaca pur ngue stale biaje gunaazecabe naa ne biʼniʼ juzgárcabe naa.

Peru laaca gucuá iqueʼ gacaniáʼ gaca chaahuiʼ xcaadxi guendanagana ridxaagalú binni, ngue runi guyuaaʼ lade caadxi grupu casi Amnistía Internacional ne Greenpeace ne gudixheʼ iqueʼ iquiiñeʼ tiempu stinneʼ ne guiráʼ stipa stinneʼ para gacaniáʼ laacabe. Laaca biyubeʼ gacaniáʼ ca binni pobre ne cani qué gapa ni gó.

Peru ra gudiʼdiʼ tiempu, chaahuiʼ chaahuiʼ bidieeʼ cuenta qué zanda diʼ guneʼ chaahueʼ guendanagana stiʼ guiráʼ binni. Neca gunda gucanedu guca chaahuiʼ caadxi cosa pur guiráʼ ni rúnidu que, peru jmaruʼ si biroobaʼ xcaadxi guendanagana. Casi ñaca nuu Guidxilayú riʼ ndaaniʼ náʼ ca cosa malu ne guirutiʼ rizaalaʼdxiʼ ni. Bineʼ sentir qué zanda diʼ guneʼ gastiʼ.

Cumu maʼ qué ganda guneʼ gastiʼ la? bisidxágani naa, ngue runi bizulú guníʼ iqueʼ Dios ne guiráʼ ni zeeda lu Biblia. Nécapeʼ maca biindané ca  testigu stiʼ Jiobá naa ante ne bidieeʼ xquíxepeʼ laacabe saca gúcacabe nachaʼhuiʼ né naa ne bizaaláʼdxicabe naa, peru dxiqué cadi nuaaʼ diaʼ listu para guchaaʼ modo nabaneʼ. Peru biaje riʼ maʼ gadxé gúcani para naa.

Biyubeʼ Biblia stinneʼ ne bizuluáʼ biindaʼ ni. Cani biindaʼ que beeda gácani casi ti pomada ni bixuubi ra gucanaʼyaʼ. Biindaʼ stale textu zeeda lu Biblia ni cuzeeteʼ caquiiñeʼ gápanu ca maniʼ ca ne cadi guninanu laacame. Casi Proverbios 12:10 na: «Binni runi ni jneza rapa ca maniʼ stiʼ» (La Palabra de Dios para Todos). Laaca bieneʼ cadi Dios diʼ napa donda pur ca guendanagana nuu lu Guidxilayú riʼ. Ne riroobaʼ ca guendanagana stinu purtiʼ stale binni qué runi ni na Jiobá. Nabé biniibi ladxiduáʼ ora gunnaʼ pabiáʼ nadxii Jiobá laanu ne pabiáʼ nápabe paciencia laanu (Salmo 103:8-14).

Ca dxi que bidxelaʼ ti cupón stiʼ libru Xipeʼ ndiʼ cusiidiʼ Biblia ne biseendaʼ ni pur correu. Cadi xadxí de ngue yeganna ti guendaxheelaʼ Testigu naa ne gúdxicabe naa pa zuundanécabe naa Biblia. Gudxeʼ laacabe zaa. Laaca bizuluáʼ guyaaʼ ca guendaridagulisaa raca ra Yoo stiʼ Reinu. Chaahuidugá gucuaa xcu cani biziideʼ de Biblia que ndaaniʼ ladxiduáʼ.

Gucané Biblia naa bichaaʼ stale cosa lu xquendanabaneʼ. Bisaanaʼ de cubaʼ gueza ne gueeʼ xhaataʼ nisa dxuʼniʼ; bichaaʼ modo rihuinneʼ, modo riniéʼ ne modo ruuyaʼ ca binni ni runi mandar ndaaniʼ xquidxeʼ (Romanos 13:1). Laaca biziideʼ guibaneʼ casi riuulaʼdxiʼ Dios purtiʼ ante bineʼ stale guendaquéiquiiñeʼ.

Ni jma guca nagana para naa nga gudieeʼ cuenta huaxiéʼ ngue racané ca grupu de binni que para gaca chaahuiʼ guiráʼ guendanagana ni napa binni. Peru cadi de ti dxi sti dxi si bichaaʼ modo riníʼ iqueʼ. Nuu biaje guníʼ iqueʼ cudxieedeʼcheʼ ca grupu que. Peru bidieeʼ cuenta Reinu si stiʼ Dios nga zanda guni chaahuiʼ ca guendanagana stiʼ binni, ngue runi, biquiiñeʼ tiempu stinneʼ ne guiráʼ stipa stinneʼ para gusiideʼ binni de laani (Mateo 6:33).

Dxi gucaʼ activista guníʼ iqueʼ nuu chupa si grupu binni: ca binni nachaʼhuiʼ ne ca binni malu, ne qué raxhaʼ iqueʼ rucaaluáʼ ca binni malu. Yanna maʼ gucané Biblia naa gusaanaʼ de gacananalaʼdxeʼ binni ne runeʼ stipa pur gannaxhieeʼ laacaʼ (Mateo 5:44). Stale modo rusihuinneʼ nadxieeʼ binni. Rusihuinneʼ ni ora rigucheecheʼ ca diidxaʼ nacubi ne galán stiʼ Reinu stiʼ Dios. Ne riecheʼ ora guuyaʼ racané dxiiñaʼ riʼ binni chuʼ tobi si, guibani nayecheʼ ne guiziidiʼ ziuu ti dxi zuni chaahuiʼ Dios guiráʼ guendanagana.

Cumu maʼ bisaanaʼ ca cosa ca lu naʼ Jiobá la? maʼ gutadxí ladxiduáʼ. Runeʼ cré de guidubi ladxiduáʼ laabe nga bizaʼbe guiráʼ ni nuu ne qué zudiibe lugar gacanaruʼ binni ne maniʼ ne laaca qué zudiibe lugar guinitilú Guidxilayú riʼ. Mayaca iquiiñebe Reinu stibe para guni chaahuibe guiráʼ ni huayuniná binni (Isaías 11:1-9). Yanna maʼ nabaneʼ nayecheʼ cadi purtiʼ si maʼ biziideʼ cani dxandíʼ rusiidiʼ Biblia, sínuque purtiʼ racaniáʼ xcaadxi binni guni crecaʼ cani zeeda luni. Ne yanna maʼ qué ricá iqueʼ guneʼ chaahueʼ guendanagana stiʼ guiráʼ binni.