CA TEMA NI ZEEDA LU CA PRIMÉ YAZA: XIÑEE NUU STALE YUUBAʼ PADXÍ GUIREE CANI
¡Guizáʼ huayati binni sin guzaabiʼ gastiʼ!
Ti dxaapahuiiniʼ láʼ Noelle nabé riuulaʼdxiʼ guni dibuju. Ti huadxí tiempu nandáʼ canazabe lu patiu nuu deche lídxibe, málasi birenda ñeebe ne biáʼsipeʼ biábabe ndaaniʼ alberca stícabe. Güeʼbe nisa ne gútibe raqué, bizaaca nga dxi cayaadxaʼ chupa semana para gusaabe tapa iza.
Charlotte, Daniel, Olivia, Josephine... Ndiʼ nga lá chupa chonna de cani gutiʼ ra biiticabe 26 binni ndaaniʼ ti scuela ni nuu Connecticut (Estados Unidos) 14 stiʼ diciembre 2012. Gande de laacabe napa biaʼ xhoopaʼ ne gadxe iza. Ante igaachicabe bizeeteʼ presidente Barack Obama lácabe ne guníʼ ca diidxaʼ riʼ para ca binni ni cayuubaʼ ladxidóʼ pur ni bizaaca que: «Naquiiñeʼ gucueezanu ca desgracia riʼ».
Bano, ti baʼdudxaapaʼ de Irak ni napa 18 iza yendezané familia stiʼ ndaaniʼ guidxi Noruega lu iza 1996. Ca xhamígube rábicaʼ laabe: Gubidxa. Triste guininu ni, peru né laabe nuube lade 77 hombrehuiiniʼ ne dxaapahuiiniʼ ni biiti ti hombre ni nahuati xpiaaniʼ 22 stiʼ julio iza 2011, hombre que dede ruchá bi yanni guníʼ: «Lagutiidilaʼdxiʼ naa [...] purtiʼ qué ñanda ñuuteʼ jma binni».
Lu guidubi naca Guidxilayú runadiáganu historia nabé triste casi cani maʼ bizéʼtenu ca. Guníʼ ique pabiáʼ naná yuubaʼ ridiʼdiʼ binni pur xiixa accidente, pur ruuticabe binni, pur ni runi ca terrorista, pur ca guerra ca ne pur xcaadxi desgracia casi xu. ¡Guizáʼ huayati binni o huayacaná sin guzaabiʼ gastiʼ!
Nuu tu rugaaniʼ donda ique Dios ne riníʼ íquecaʼ qué rizaaláʼdxibe binni guidxilayú. Xcaadxi nacaʼ neca ruuyabe cayacananu qué ruyúbibe gacanebe laanu. Ne nuu tu na maca nexheʼ guizaacanu xiixa desgracia. Nga rusihuinni gadxé gadxé nga ni riníʼ ique binni de tema ca. Paraa zanda guidxélanu xiixa ni gusiene laanu xiñee rizaaca ca desgracia ca yaʼ. Lu xcaadxi tema ca zadúʼyanu xiná Biblia, Stiidxaʼ Dios, ti gánnanu xiñee cayacananu ne ximodo zaree guiráʼ ni runiná laanu.
