Ximodo ñuuláʼdxiluʼ nusigáʼdecabe lii xiixa. Ñee cadi dxandíʼ guiranu ñuuláʼdxinu nudiicabe laanu xiixa purtiʼ nadxiicabe laanu ne cadi pur nuu tu cucaa laacabe gudiicabe ni la? Ni jma risaca para laanu nga xi pur cudiicabe ni. Pa risaca para laanu xi pur cudiicabe laanu xiixa la? para Dios laaca risaca ni. Biiyaʼ ca diidxaʼ ni gudxi Dios apóstol Pablu gucaa lu 2 Corintios 9:7.

Xiñee bicaa Pablu ca diidxaʼ ca yaʼ. Purtiʼ canábabe ca xpinni Cristu de Corinto gacanecaʼ ca xpinni Cristu ni nabeza Judea, cani caquiiñeʼ tu gacané laacaʼ. Ñee cucaabe ca binni de Corinto gacanecaʼ neca qué nacaʼ la? Qué zanda diʼ guininu zacá ni pur ca diidxaʼ ni guniʼbe riʼ: «Cada tobi udii biaʼ ruluiʼlaʼdxiʼ, ne cadi acaná ladxidóʼ ti ma bidii ni, nin udii ni purti canaba cabe ni laa, purti nadxii Dios ni rudii ni laa de idubi ladxidóʼ». Guiduʼyaʼ chaahuinu xiná conseju bidii Pablu ca.

«Udii biaʼ ruluiʼlaʼdxiʼ.» Ni na Pablu nga tuuxa ni dxandíʼ naca xpinni Cristu rusigaʼdeʼ xiixa purtiʼ «ruluiʼlaʼdxiʼ» gudii. Ne laaca riníʼ ique dede ante xi caquiiñeʼ xcaadxi xpinni Cristu. Ti hombre ni ruundaʼ de Biblia na diidxaʼ ni biquiiñecabe lu griegu, ni rutiixhicabe casi «biaʼ ruluiʼlaʼdxiʼ» ca, riniʼni «guiníʼ ique binni dede ante». Nga runi, ti xpinni Cristu riníʼ ique xi caquiiñeʼ ca biʼchiʼ ne ca bizaʼnaʼ ne ruyubi modo gacané laacabe (1 Juan 3:17).

«Ne cadi acaná ladxidóʼ ti ma bidii ni, nin udii ni purti canaba cabe ni laa.» Pablu bizeeteʼ xi cadi naquiiñeʼ guni ca xpinni Cristu ora gudiicaʼ xiixa: cadi gacaná ladxidoʼcaʼ ora gudiicaʼ ni o gudiicaʼ ni purtiʼ si naquiiñeʼ gúnicaʼ ni. Diidxaʼ griegu ni bitiixhicabe casi «cadi acaná ladxidóʼ» ca laaca riniʼni cadi chuʼ binni «triste». Ti libru ni cusiene de diidxaʼ riʼ na ora caguicheruaa binni para gudii xiixa «riuu triste ora guiníʼ ique ziaaxha bueltu». Ti binni ni rudii zacá runi sentir cucaacabe laa guni ni. Ñee ñuuláʼdxiluʼ nusigáʼdecabe lii xiixa purtiʼ si guyuu tu bicaa laacabe gúnicabe ni la?

«Nadxii Dios ni rudii [...] de idubi ladxidóʼ.» O casi na La Biblia de Nuestro Pueblo: «Nadxii Dios binni ni riecheʼ ora gudii». Zacá nga naquiiñeʼ gudii ti xpinni Cristu. Ne ziuu binni nayecheʼ pa guiale de ladxidóʼ gudii (Hechos 20:35). Ora guni binni zacá rihuínnica nayecheʼ nuu. Ne diidxaʼ nayecheʼ ca riquiiñenu ni para guininu ni cayuni sentir tuuxa ne ora cayuni binni xiixa ni gusihuinni nuu nayecheʼ. Ora riéchenu gusigáʼdenu binni xiixa la? guizáʼ ziéchebe ne laaca guizáʼ ziecheʼ Dios.

Ca diidxaʼ bicaa apóstol Pablu ca zanda gacanécani ca xpinni Cristu ora gudiicaʼ xiixa. Pa gudiʼnu tiempu stinu, stipa stinu o ni nápanu la? naquiiñeʼ gúninu ni purtiʼ riale de ladxidoʼno gudiʼnu ne purtiʼ riuuláʼdxinu gacanenu xcaadxi, ne jmaruʼ si cani caquiiñeʼ ni. Ora gúninu zacá ziuʼnu nayecheʼ ne laaca ziechené Dios laanu purtiʼ laabe nadxiibe binni ni riecheʼ ora gudii.