Ra bizulú iza 1942, biuu Estados Unidos lu guiropa guendaridinde guca lu guidubi Guidxilayú, dxiqué maʼ ziniaaʼ gaayuʼ iza ndaaniʼ universidad que ne maʼ xhupa xhonna beeu si cayaadxaʼ para gunduuxeʼ de arquitectu. Ca dxi que nabezaniáʼ chupa hombrehuiiniʼ, ne gudxi tobi de laacabe naa guinieniáʼ binni ni riganna «cani nabeza xagueteʼ de ra nabézadu». Hombre que láʼ John (Johnny) Brehmer ne testigu stiʼ Jiobá laabe. Guizáʼ bidxagayaaʼ ora biiyaʼ modo nánnabe iquiiñebe Biblia para guicábibe guiráʼ ni guinabadiidxacabe laabe. Bizulú biindanebe naa Biblia ne despué ora rapaʼ tiempu la? rigucheecheniáʼ laabe diidxaʼ.

Otto nga láʼ bixhoze Johnny, laa guca testigu stiʼ Jiobá dxi naca presidente stiʼ bancu nuu ndaani guidxi Walnut (Iowa), peru bisaanabe dxiiñaʼ que para gúnibe jma lu xhiiñaʼ Dios. Ni bíʼnibe ne ni biʼniʼ binnilídxibe que gucaneni naa quixheʼ iqueʼ guneʼ ti cosa nabé risaca.

Ti dxi gudxi director stiʼ universidad que naa maʼ biete ca calificación stinneʼ, ne neca galán cani gupa dxiqué, qué zugaanda diʼ cani para gunduuxeʼ de ingenieru. Bineʼ orar Jiobá para gacané naa ti gannaʼ xii nga ni jma jneza guneʼ. Bilúxesiaʼ de ingenieru gudxi tobi de ca maestru stinneʼ naa cuyúbicabe ti ingenieru para guni dxiiñaʼ ne guniʼbe zanda guneʼ dxiiñaʼ que. Bidieeʼ xquíxepeʼ laabe ne gudxeʼ laabe maʼ gudixheʼ iqueʼ guneʼ xhiiñaʼ Jiobá lu xquendanabaneʼ. Guyuaanisaʼ 17 stiʼ junio iza 1942, ne nagueendaca gucaʼ precursor regular ne cada beeu rucheecheʼ diidxaʼ 100 hora.

Iza queca biseendacaacabe naa para chuaaʼ lu ejércitu. Ora guyaaʼ ra oficina ra cacá lácabe que, bisieneʼ laacabe qué zanda diʼ chaaʼ lu guerra purtiʼ maʼ biziideʼ cadi jneza guuteʼ binni. Laaca biluéʼ laacabe caadxi guiʼchiʼ ni bicaa ca maestru stinneʼ ra caniʼcaʼ stale cosa galán de naa ne ra cuzeetecaʼ nannaʼ guneʼ dxiiñaʼ casi ingenieru. Neca zaqué, bicaacabe naa ti multa de 10,000 dólar ne biseguyoocabe naa gaayuʼ iza ndaaniʼ ti cárcel roʼ ni nuu Leavenworth (Kansas).

Ndaaniʼ cárcel que laaca nuu 230 Testigu ne rúnidu dxiiñaʼ ndaaniʼ ti granja stini ne nuu soldadu ni cayapa laadu. Caadxi de ca soldadu que nánnacaʼ qué riuudu lu guerra ne runi respetarcaʼ ni runi credu.

 Caadxi de ca soldadu que racanecaʼ laadu para gúnidu ca guendaridagulisaa ra ridúʼndadu Biblia ne dede racanecaʼ laadu para guicaadu libru ne revista ndaaniʼ cárcel que. Dede guca suscribir director stiʼ cárcel que para guicaa revista Consolación (yanna lani ¡Despertad!).

Chonna si iza guyuaaʼ ndaaniʼ cárcel, purtiʼ guleecabe naa biluxe si guerra que 16 stiʼ febrero iza 1946, ngue runi maʼ qué nusaadiáʼ gaayuʼ iza guníʼcabe guiaanaʼ raqué. Nagueendaca gucaʼ precursor sti biaje. Yanna, paraa biseendacabe naa yaʼ. Biseendacabe naa guidxi Leavenworth. Guizáʼ bidxibeʼ ora gunnaʼ ni, purtiʼ nanalaʼdxiʼ ca binni que ca testigu stiʼ Jiobá. Pa maca nagana guidxela binni dxiiñaʼ raqué la? jmaruʼ si nagana guidxela binni ti yoo ra cueza.

Ti biaje, dxi canagucheecheʼ diidxaʼ raqué yendayaʼ ra lidxi tobi de ca soldadu ni runi dxiiñaʼ ndaaniʼ cárcel que. Bireené hombre que ti bate de béisbol ne bicaa ti ridxi naa: «¡Biree de ra lidxeʼ!». Nabé bidxibeʼ ne bireeʼ guxooñeʼ de raqué. Ora yendayaʼ sti yoo biree ti gunaa ni gudxi naa: «Gulezagá naa ti ratuhuiiniʼ», ne biseeguʼ puertaʼ lidxi. Málasi bixhélebe ti ventana lu guiropa pisu ne bindaatebe ti cubeta nisa biidiʼ luguiaʼyaʼ. Neca zaqué, gucuaaʼ stale ndaayaʼ, purtiʼ despué gunnaʼ guca caadxi de ca binni ni bisaananiáʼ libru ne revista testigu stiʼ Jiobá.

Lu iza 1943 bizulú ti scuela para ca misioneru estadu stiʼ Nueva York, despué biree lani Scuela stiʼ Galaad stiʼ Watchtower. Biʼniʼ invitárcabe naa chaaʼ lu clase chii stiʼ scuela que ne gucaʼ graduar 8 stiʼ febrero iza 1948. De raqué biseendacabe naa sti guidxi: Costa de Oro, yanna lani Ghana.

Dxi yendayaʼ raqué bizuluáʼ bicheecheʼ diidxaʼ ra nuu ca binni de Europa ne ra nuu ca oficial runi xhiiñaʼ gobiernu. Guiráʼ sábadu ne domingu rucheecheniáʼ ti neza binni ridagulisaa diidxaʼ ne racaniáʼ ca xpinni Cristu nuu raqué gucheechecaʼ diidxaʼ de yoo pur yoo. Laaca yegannaʼ ca Testigu ni nabeza ndaaniʼ ca guidxi ni nuu jma zitu ne bisiideʼ laacaʼ gucheechecaʼ diidxaʼ. Despué beeda gacaʼ binnigola ni riganna ca neza binni ridagulisaa Costa de Marfil, ti guidxi nuu gaxha de raqué.

Biziideʼ guibaneʼ casi ca binni nabeza lugar que: raseʼ ndaaniʼ ti yoohuiiniʼ de basoo (adobe), qué riquiiñeʼ gudxara para gahuaʼ ne riaaʼ ti guriá guiʼxhiʼ casi guyé ca israelita dxi guyuucaʼ lu desiertu (Deuteronomio 23:12-14). Pur ni bínidu que biiyaʼ ca binni que laadu casi binni xquídxicaʼ. Bizulú biindaʼ xheelaʼ caadxi de ca hombre runi xhiiñaʼ  gobiernu que Biblia, ngue runi, ora rucaa ca xhenemígudu gobiernu gaxhaʼ visa laadu la? rinábacabe xheelacabe gucueeza gobiernu de guni ni.

Laaca gucaʼ huaraʼyaʼ de paludismo, cásica guca huará stale misioneru ni guyé África. Gudxiʼbaʼ ti xindxáʼ nanda naa dede racadiʼteʼ. Guyuu biaje gunaazeʼ ruaaʼ para maʼ cadi gacaditi ni. Peru qué ñuu dxi nusaanaʼ de ñuaaʼ nayecheʼ.

Ante guireeʼ de Estados Unidos binebiaʼyaʼ ti baʼdudxaapaʼ láʼ Eva Hallquist, ne guidapaʼ iza guyuaaʼ África bicaaʼ carta ra nuube ne laaca bicaabe ra nuaaʼ. Gunnaʼ chigaca graduarbe lu clase 21 stiʼ Scuela stiʼ Galaad 19 stiʼ julio iza 1953 ne chigácani lu ti guendaridagulisaa stiʼ stale guidxi roʼ ndaaniʼ Estadiu stiʼ ca Yankees ni nuu Nueva York. Ngue runi, gunieniáʼ capitán stiʼ ti barcu ne gudxeʼ laa pa zanda chiné naa Estados Unidos ndaaniʼ ni sin quixeʼ peru guneʼ dxiiñaʼ ndaaniʼ barcu que. ¡Guizáʼ biecheʼ ora gúdxibe naa zanda chaaʼ!

Despué de veintidós dxi de zeʼ barcu que lu nisadóʼ bani, yendayaʼ Estados Unidos. Nagueendaca yeyubeʼ Eva ra oficina stiʼ ca testigu stiʼ Jiobá ni nuu Brooklyn. Gudxibaniáʼ laabe dede lu últimu pisu stiʼ edificiu que, ne laga cadúʼyadu pabiáʼ sicarú rihuinni puertu stiʼ guidxi que ne pabiáʼ nasoo ca edificiu que, gudxeʼ laabe pa zachaganabe naa. Bichaganásidu, naa ne Eva guyuudu casi misioneru Costa de Oro.

Dxi maʼ zinedu stale iza de misioneru África biseendaʼ jñaaʼ ti carta ra nuaaʼ ra cayabi naa napa bixhozeʼ cáncer ne mayaca gatiʼ. Cumu bidiicabe permisu laadu para gusaanagadu dxiiñaʼ de misioneru que la? gunda guyuudu Estados Unidos. Nagueenda guca xiroo guendahuará napa bixhozeʼ que ne cadi xadxí de yendadu raqué gútibe.

Bibiguétadu Ghana sti biaje ne biaanadu raqué biaʼ stapa iza. Peru gúnnadu laaca nabé maʼ huará jñaaʼ. Caadxi de ca xhamígudu gúdxicaʼ laadu guibiguétadu para gúʼyadu laabe. Guizáʼ nagana guca ngue para laadu. Naa maʼ ziniáʼ quince iza casi misioneru ne xheelaʼ ziné once. Últimu la? bibiguétadu Estados Unidos.

Stale iza guca turnardu para gápadu jñaaʼ ne yenedu laabe ca guendaridagulisaa stinu dxi gunda, zaqué bínidu dede dxi gútibe 17 stiʼ enero iza 1976, dxi nápabe 86 iza. Peru cadi ngue diʼ nga yuubaʼ ni jma naná para laadu. Gudiʼdiʼ si gaʼ iza bihuinni napa Eva cáncer. Neca bínidu biaʼ gúndatiʼ para ñanda guendahuará que, peru biitini laabe 4 stiʼ junio iza 1985, dxi nápabe 70 iza.

Lu iza 1988 biʼniʼ invitárcabe naa dxi guca dedicar Yoo Betel ni nuu Ghana. ¡Ti dxi guizáʼ sicarú para naa! Dxi bedandayaʼ África, raca cuarenta iza, nuu biaʼ chupa chonna gayuaa Testigu ndaaniʼ guidxi que. Despué, lu iza 1988 gúcacabe jma de 34,000, ne yanna maʼ nuu biaʼ 114,000 xpinni Cristu.

Bichaganaʼyaʼ gunaa ni jma xhamiga Eva ni láʼ Betty Miller 6 stiʼ agosto iza 1990, chupa iza despué de guyaaʼ Ghana. Dede yanna cayúnidu xhiiñaʼ Jiobá. Ne guirópadu racaláʼdxidu guidúʼyanu bixhozebiidadu ne jñaabiidadu, bixhózedu ne jñaadu ne Eva ora guiásacaʼ de lade gueʼtuʼ ne guibánicaʼ ndaaniʼ ti paraísu lu Guidxilayú riʼ (Hechos 24:15).

Dede ridá nisa luaʼ ora guiníʼ iqueʼ biquiiñeʼ Jiobá naa jma de setenta iza para guneʼ xhiiñaʼ. Gatigá rudieeʼ xquíxepeʼ laabe pur gucanebe naa guneʼ xhiiñabe lu xquendanabaneʼ. Neca maʼ napaʼ jma de 90 iza, cudiiruʼ Jiobá, Ingenieru ni jma Nanna, stipa naa ne cayacané naa para cadi gusaanaʼ de guneʼ xhiiñaʼ.