Ora guietenaladxeʼ dxi gucaʼ nahuiiniʼ, rietenaladxeʼ pabiáʼ nayecheʼ bibaneniáʼ bixhozeʼ ne jñaaʼ ndaaniʼ ti yoo ni gúpadu neza guiá stiʼ guidxi Francia. Biʼniʼ bixhozeʼ ti columpiu stinneʼ ne guizáʼ riuuladxeʼ guxooñeʼ ndaaniʼ jardín stidu. Lu iza 1966, guyé ca testigu stiʼ Jiobá ralidxeʼ. Bizulú bixhozeʼ byuiʼné laacabe diidxaʼ ne gadxe beeu despué guyuunísabe ne gúcabe testigu stiʼ Jiobá. Qué nindaa laaca guca jñaaʼ testigu stiʼ Jiobá ne guirópacabe bisiniisicabe naa ndaaniʼ ti familia ni rusihuinni nadxiisaa.

Cumu de España bixhozeʼ ne jñaaʼ la? ngue runi bibiguétadu España. Qué nindaa maʼ bizulú guca huaraʼyaʼ. Bizulú biuubaʼ nayaʼ ne guizáʼ naná biuubaʼ yaniñeeʼ. Chupa iza de canazadu ra nuu stale doctor, guyuudu ra nuu ti reumatólogo ni nabé nanna, ne gúdxibe laadu: «Maʼ gastiʼ zanda gúninu». Bizulú jñaaʼ cayuunaʼ. Despué de gúdxicabe naa napaʼ «trastorno autoinmunitario crónico» ne «poliartritis infantil crónica», guizáʼ feu modo bineʼ sentir ne guizáʼ triste guyuaaʼ. * Napaʼ chii iza, ngue runi huaxiéʼ bieneʼ ni guníʼ doctor que, peru neca nahuiineʼ bidieeʼ cuenta naxoo guendahuará napaʼ que.

Doctor que gudxi laacabe chinécabe naa ti hospital para ca baʼduhuiiniʼ. Bilá ñateʼ ora yendayaʼ lugar feu que, purtiʼ naquiiñeʼ guni binni guiráʼ ni maʼ naguíxhecabe gaca lugar que. Bigá ca monja que guicha iqueʼ ne bigácucaʼ naa ti uniforme feu. Dede maʼ cayuunaʼ riníʼ iqueʼ «qué zanda guneʼ huantar raríʼ».

Cumu dede nahuiineʼ bisiidiʼ bixhozeʼ ne jñaaʼ naa guneʼ ni ná Jiobá la? ngue runi, qué ñuneʼ guiráʼ ni rúnicabe ndaaniʼ hospital que purtiʼ rinándacabe cani runi ca católicu, peru guca nagana para ca monja que guiénecaʼ naa. Guizáʼ gunabaʼ Jiobá cadi gusaana naa ne bineʼ sentir casi ora naguu Jiobá naa ndaaniʼ naʼ ne cayapa naa. Casi ora riguiidxi bixhoze binni laa.

Guiráʼ sábadu rudiicabe lugar chiganna binnilidxi binni laa, ne bixhozeʼ ne jñaaʼ riquiiñecaʼ tiempu que para chinecaʼ libru ne revista ti iguidxi fe stinneʼ jma. Nécapeʼ qué rudii ca monja que lugar gapa ca  xcuidihuiiniʼ que libru sticaʼ la? peru naa bidiicabe lugar gapaʼ libru stinneʼ. Laaca gupaʼ ti Biblia ne ruundaʼ ni guiráʼ dxi. Gunieniáʼ xcaadxi dxaapahuiiniʼ ni nuu raqué de ca cosa ni maʼ guníʼ Dios chiguni lu Guidxilayú dxi maʼ guirutiʼ zaníʼ huará (Apocalipsis 21:3, 4). Neca riuaaʼ triste ne runeʼ sentir stubeʼ, jma gupaʼ fe Jiobá.

Xhoopaʼ beeu despué guníʼ ca doctor que maʼ zanda guibiguetaʼ ra lidxeʼ. Neca huaraʼyaʼ ruaʼ, peru guizáʼ nayecheʼ bineʼ sentir purtiʼ maʼ nuaaʼ ra lidxeʼ. Zeʼ dxi jmaruʼ si zipandu dxita ladeʼ ne jmaruʼ si naroʼbaʼ yuubaʼ rapaʼ. Neca naná ruʼ nuaaʼ, peru guyuaanisaʼ dxi napaʼ 14 iza, ne gudixheʼ iqueʼ guneʼ ni na Jiobá ne guiráʼ stipa stinneʼ. Peru guyuu biaje bidxiicheʼ ne gudxeʼ Bixhozeʼ ni nuu guibáʼ: «Xiñee naa cazaacaʼ guiráʼ ndiʼ pue. ¡Rinabaʼ lii gusiándaluʼ naa! Ñee cadi cayuuyaluʼ pabiáʼ cayacanaʼyaʼ la?».

Nabé nagana gúcani ra maʼ ziniiseʼ. Bidieeʼ cuenta maʼ qué ziandaʼ, peru qué nusaanaʼ de nuchaagaʼ naa né ca xhamigaʼ, laacaʼ nazaacacaʼ ne nabánicaʼ nayecheʼ. Bineʼ sentir qué lica risacaʼ ne ngue runi maʼ huaxiéʼ gunieniáʼ binni. Neca zaqué qué lica nusaana ca binnilidxeʼ ne ca xhamiguaʼ de ñacanecaʼ naa. Nayecheʼ runeʼ sentir ora guietenaladxeʼ Alicia, xhamigaʼ, laabe dídibe gande iza luaʼ. Ne nabé gucanebe naa ti cadi guiníʼ íquepiaʼ guendahuará stinneʼ ne guizaalaʼdxeʼ xcaadxi binni lugar de guiníʼ iqueʼ guiráʼ guendanagana ni napaʼ que.

Dxi napaʼ 18 iza, bisaba guendahuará que naa sti biaje ne guizáʼ ridxagaʼ para chaaʼ ca guendaridagulisaa que. Peru riquiiñeʼ tiempu riaanaʼ yoo que para guundaʼ Stiidxaʼ Dios jma. Libru stiʼ Job ne ca Salmo gucané cani naa para guieneʼ modo rapa Jiobá laanu ca dxi riʼ ne ni jma racanebe laanu nga chuʼnu gaxha de laabe. Cumu qué nusaanaʼ de ñuneʼ orar Jiobá la? bidiibe naa «enda nandxóʼ» stibe ne laaca biiyaʼ pabiáʼ dxandíʼ ni na ca diidxaʼ riʼ: «Zaguixhe dxí [Dios] ladxidóʼ to dede iruti zanda guiene ximodo ni» (2 Corintios 4:7; Filipenses 4:6, 7).

Dxi napaʼ 22 iza, maʼ bizulú biquiiñeʼ silla de rueda. Guyuaaʼ xizaa guʼyaʼ binni naa casi ti binni huará ni zuba lu ti silla de rueda ne maʼ qué zanda guni gastiʼ. Peru lugar de nucaa silla de rueda que naa yaga la? laga gucaneni naa guneʼ xhiiñaʼ Jiobá sin chuʼ tuuxa gacané naa. Ti xhamigaʼ ni láʼ Isabel, guluu gana naa gucheecheniáʼ laa diidxaʼ 60 hora lu ti beeu.

Ora gúdxibe ni naa, guníʼ iqueʼ cayaca íquebe, peru gunabaʼ Jiobá gacané naa, ne cumu laaca gucané ca binnilidxeʼ ne ca xhamiguaʼ naa la? gunda bicheecheniáʼ laabe diidxaʼ. Nabé nagueenda gudiʼdiʼ beeu que purtiʼ guizáʼ guyuu xhiiñadu ne gucaneni naa para gusaana de guidxibeʼ ne maʼ qué guituí luaʼ. Cumu guizáʼ nayecheʼ bineʼ sentir la? ngue runi, lu iza 1996 gucaʼ precursora regular, ne bicheecheʼ diidxaʼ 90 hora cada beeu. Laani nga tobi de ca cosa ni jma galán gudixheʼ iqueʼ guneʼ ne gucaneni naa chuaaʼ jma gaxha de Dios ne guni ni naa jma nadipaʼ. Laaca huayacané ni naa para gusiideʼ xcaadxi binni de cani runeʼ cré ne gacaniáʼ laacaʼ gaca xhamígucaʼ Dios.

Lu verano stiʼ iza 2001, gupaʼ ti accidente ne guche guiropaʼ chu ñeeʼ. Guizáʼ naná cayuubaʼ ora nexheʼ lu cama ra hospital, bineʼ orar Jiobá de ndaaniʼ ladxiduáʼ: «¡Jiobá rinabaʼ lii de guidubi ladxiduáʼ, cadi gusaanuʼ naa!». Cásipeʼ biluxeʼ de bineʼ orar, gunabadiidxaʼ ti gunaa ni nexheʼ lu sti cama stiʼ hospital que naa: «Ñee testigu stiʼ Jiobá lii la?». Cumu qué gapaʼ stipa para guicabeʼ laabe la? biniibe íquesiaʼ ne gudxeʼ laabe Testigu naa. Óraque gúdxibe naa: «¡Runebiaʼyaʼ laatu! Ruundaʼ ca revista stitu». Ca diidxaʼ guniʼbe que gucané cani naa guneʼ sentir galán. Neca qué ganda guiniéʼ de Dios pur modo nuaaʼ que, peru bidii gunaa que cuenta nacaʼ testigu stiʼ Jiobá ne ngue gucané laabe gánnabe de Dios. ¡Ti ndaayaʼ naroʼbaʼ ngue!

Dxi maʼ nuaaʼ jma galán gudixhe iqueʼ gucheecheʼ diidxaʼ ndaaniʼ hospital que. Nécapeʼ nuuruʼ yesu ñeeʼ, peru riné jñaaʼ naa lu silla de rueda que. Guiráʼ dxi rigánnadu chupa chonna binni huará ne rinabadiidxadu laacaʼ ximodo nuucaʼ ne laaca rusaananedu laacaʼ chupa chonna libru ne revista. Neca nabé ridxagaʼ ora guneʼ ngue, peru Jiobá bidii stipa naa.

 Ca iza riʼ, jmaruʼ si naná ca yuubaʼ rapaʼ, ne dxi gutiʼ bixhozeʼ jmaruʼ triste guyuaaʼ. Neca zacá peru ruyubeʼ modo chuaaʼ nayecheʼ. Ni racané naa gusiaandaʼ ca guendanagana ni napaʼ neca ti ratu nga chuaaniáʼ ca binnilidxeʼ ne ca xhamiguaʼ. Ora maʼ nuaaʼ stubeʼ ruundaʼ Biblia ne rucheecheʼ diidxaʼ pur teléfono.

Ngue runi riuaaʼ nayecheʼ né ca cosa ni rudii Dios laanu, casi ora quiñe ti bi nisa luaʼ ne chuaaʼ xieeʼ modo rindáʼ naxhi xiixa guieʼ. Nga rudii naa stale razón para gudieeʼ xquíxepeʼ Jiobá. Chuʼ binni nayecheʼ laaca nabé racané ni laa. Ti dxi, canagucheecheʼ diidxaʼ né ti xhamigaʼ ne laabe zigucaanabe silla de rueda stinneʼ, peru málasi bizuhuaabe para gucaabe xiixa. Cumu nabé nandagaa neza que la? guizáʼ resiu bietetí silla de rueda stinneʼ que dede yeguidxelasaaʼ cueʼ ti carru ni zuhuaadxí guriá neza que. ¡Guizáʼ bidxíbidu! Peru bidúʼyasidu gastiʼ ñacaʼ la? guizáʼ bixídxidu.

Stale cosa nga qué zanda guneʼ nagasi; rabeʼ cani, ca cosa ni rapaʼ gana guneʼ despué. Stale biaje ruseeguaʼ luaʼ ne ruxuiʼluaʼ casi ora nuxheleʼ ti ventana ra randa ruuyaʼ guidxilayú cubi ni maʼ guníʼ Dios chiguni (2 Pedro 3:13). Ruxuiʼluaʼ maʼ nazaacaʼ ne canazayaʼ cheríʼ chericaʼ ne nayecheʼ nabaneʼ. Ca diidxaʼ guníʼ rey David riʼ, ziniáʼ cani ndaaniʼ ladxiduáʼ: «Guleza gacané Jiobá lii; guca nadxibalú, ne biʼniʼ ladxidoʼloʼ naguidxi» (Salmo 27:14). Nécapeʼ zeʼ dxi jma zirá stipa stinneʼ, peru zeʼ dxi jma racané Jiobá naa gapaʼ stipa. Zacá nga laani, natende rihuinneʼ, peru guizáʼ nadipaʼ.