Guleʼ ne biniiseʼ ndaaniʼ ti barriu ra nabé pobre binni ni riaana fuera de guidxi Roma. Nabé nagana modo bibaneʼ. Qué ñunebiaʼyaʼ jñaaʼ ne huaxiéʼ galán modo bidxaagaʼ bixhozeʼ. Biziideʼ guneʼ casi runi cani rizá lu calle.

Bizuluáʼ gulanaʼ dxi napaʼ 10 iza ne bireeʼ de ra lidxeʼ primé biaje dxi napaʼ 12 iza, stale biaje yendee bixhozeʼ naa ndaaniʼ cárcel. Guiráʼ si ora maʼ cadindeniaʼ binni ne nabé nagueenda ridxiicheʼ. Dxi maʼ napaʼ 14 iza bireeʼ de ra lidxeʼ sti biaje para maʼ cadi guibiguétaruaʼ. Gulezaʼ lu calle ne gudubaʼ de guiráʼ clase droga. Ca huaxhinni que rigaseʼ ndaaniʼ ti carru dede ora guirá gueelaʼ, oracaruʼ riyubeʼ paraa daʼ nisa para ganda gazeʼ.

Biziideʼ cuanaʼ. Biraruʼ ni bineʼ: dede gaxhaʼ bolsa stiʼ binni ni zeʼ lu calle ne cuanaʼ ra apartamentu sti binni ne ra lídxicaʼ huaxhinni. Pur modo naa que biʼniʼ invitárcabe naa chuaaʼ lu ti banda ni nabé binibiáʼ binni, ngue gucané naa gapaʼ guiráʼ ni gacalaʼdxeʼ purtiʼ bizuluáʼ gulanaʼ ndaaniʼ bancu. Cumu nabé nagueenda ridxiicheʼ que la? bicaani cani nuu lu banda que guni respetarcaʼ naa. Qué riaadiaʼ paxaraa sin guiibaʼ stinneʼ, ne ora maʼ chigaseʼ riguaani xaʼnaʼ almuada stinneʼ. Guendaridinde, ca droga que, guendaribaʼnaʼ, ca cosa dxabaʼ ni bineʼ ne guiráʼ diidxaʼ guidxa riníʼ binni beeda guuyaʼ cani casi xiixa ni naquiiñeʼ guneʼ. Qué nusaana puliciá de nizananda naa ne stale biaje biseguyoocabe naa. Rundaacabe naa ne rinaazecabe naa stiʼ biaje, zacá bibaneʼ caadxi iza.

Tobi de ca biaje bireeʼ ndaaniʼ cárcel que yegannaʼ ti xtiaʼyaʼ. Qué gannaʼ pa maʼ testigu stiʼ Jiobá laabe ne chupa de ca xprimuaʼ. Biʼniʼ invitárcabe naa chiniáʼ laacabe ti reunión stícabe ne yeniáʼ laacabe para si guuyaʼ ximodo rúnicabe ni. Ora yendadu  ra Yoo stiʼ Reinu que, gudxeʼ laacabe cuéʼ gaxha de ra puertaʼ stini para guuyaʼ tu chuʼ ne tu guiree. Peru ziniáʼ huaxa guiibaʼ stinneʼ xa.

Bichaa reunión que xquendanabaneʼ. Rietenalaʼdxeʼ guníʼ iqueʼ: «¡Caníʼ xcaandaʼ ndiʼ!». Guiráʼ ladu guyadxiéʼ cayuuyaʼ binni ni cuxidxi ne nachaʼhuiʼ. Dede yanna qué ziuu dxi guiaandaʼ naa rihuínnica lú ca Testigu que dxandíʼ nacháʼhuicaʼ. ¡Bineʼ sentir nuaaʼ stale millón de kilómetru de ca binni ridxaagaʼ que!

Gudixheʼ iqueʼ guʼndané ca Testigu naa. Dxi jma maʼ ziziideʼ de Dios bidieeʼ cuenta naquiiñeʼ guchaaʼ modo nabaneʼ. Yenanda conseju ni zeeda lu Proverbios 13:20, ra na: «Tu canazané binni nuu xpiaaniʼ la? zaca binni nuu xpiaaniʼ, peru tu ridxaaga binni ni nahuati la? qué zieni laa jneza». Bieneʼ naquiiñeʼ gusaanaʼ de guidxaagaʼ cani nuu lu banda que. Nagana gúcani para naa, peru gucané Jiobá naa gusaanaʼ laacabe.

Laaca bisiayaʼ naa. Bineʼ stale stipa para bisaanaʼ de cubaʼ gueza ne xcaadxi droga. Bigayaʼ guicha iqueʼ purtiʼ nabé ziuulaʼ ni ne guxhaʼ ca aru que diagaʼ ne bisaanaʼ de guiniéʼ diidxaʼ guidxa. Ngue nga primé biaje bineʼ sentir zanda gucueezaʼ naa de guneʼ xiixa.

Qué ñuu dxi ñuuladxeʼ ñuundaʼ o nusiidicabe naa, ngue runi nabé nagana guca para naa cadi guiníʼ iqueʼ sti cosa ora maʼ cayuundaʼ Biblia. Peru chaahuiʼ chaahuiʼ bizuluáʼ gunnaxhieeʼ Jiobá. Ni málasi bichaa modo riníʼ iqueʼ: gatigá bichiiñaʼ conciencia stinneʼ naa. Bineʼ sentir ne guníʼ iqueʼ qué ziuu dxi gutiidilaʼdxiʼ Jiobá donda stinneʼ pur ca cosa malu ni bineʼ. Peru ora maʼ nuaaʼ zaqué, ruundaʼ relatu stiʼ rey David ne ruuyaʼ ximodo bitiidilaʼdxiʼ Jiobá stóndabe pur ca cosa malu ni bíʼnibe, ne ngue riguixhedxí ladxiduáʼ (2 Samuel 11:1–12:13).

Sti cosa ni gucaʼ nagana para naa guneʼ nga chigucheecheʼ diidxaʼ ra lidxi binni (Mateo 28:19, 20). ¡Guizáʼ bidxibeʼ guidxaagaʼ tuuxa binni ni binenaʼyaʼ dxiqué! Peru chaahuiʼ chaahuiʼ gunda bisaanaʼ dxiibi que ne bizulú guyuuladxeʼ guinieniáʼ binni pabiáʼ nachaʼhuiʼ Bixhózenu ni nuu guibáʼ, ni rutiidilaʼdxiʼ donda stinu.

Ra binebiaʼyaʼ Jiobá gucaneni naa gulaʼyaʼ xquendanabaneʼ. Stale de cani guca xhamiguaʼ dxiqué maʼ gúticaʼ o nuucaʼ ndaaniʼ cárcel. Peru naa nabaneʼ nayecheʼ ne nannaʼ zanda guibaneʼ galán despué. Maʼ biziideʼ cadi gudxiibaʼ laca naa ne guzuubaʼ diidxaʼ ne cadi guidxiicheʼ nagueendaca, ne pur nga jma maʼ galán nabaneʼ né cani nuu gaxha de naa. Ne nayecheʼ nabezaniáʼ ti gunaa nabé sicarú ni bichaganaʼyaʼ láʼ Carmen. Guirópadu racanedu ca xpecínudu guiene chaahuicaʼ cani zeeda lu Biblia.

¡Ah!, ne yanna maʼ runeʼ dxiiñaʼ para ganda guibaneʼ ne maʼ que ribanaʼ stiʼ binni. Gatigá runeruaʼ dxiiñaʼ ndaaniʼ bancu, peru yanna maʼ cadi para cuanaʼ ndaaniʼ cani, sínuque maʼ para gusiayaʼ ndaaniʼ cani.