Stale binni riníʼ ique ti símbolo si stiʼ ca cosa malu nga Binidxabaʼ ni rieeteʼ ndaaniʼ Biblia. Peru pa dxandíʼ nga, xiñee ruzeeteʼ Biblia guníʼnebe Jesús ne Dios yaʼ. Guidúʼyanu ni bizaaca riʼ.

Cadi xadxí de guyuunisa Jesús, chonna biaje biquiinde Binidxabaʼ laa nuchee. Primé la? gucalaʼdxiʼ nuquiinde laabe para niquiiñebe poder bidii Dios laabe ne ñúnibe xiixa pur laabe: gudxi laabe ñúnibe caadxi guié pan. Despué gudxi Binidxabaʼ laabe niguube xquendanabánibe ra naxoo para nidxagayaa binni laabe. Ne últimu la? gúdxibe Jesús zudiibe laa guirá reinu nuu lu Guidxilayú pa guzuxibi xañeebe ne guni adorar laabe. Bicaanáʼ Jesús Binidxabaʼ guionna biaje biquiinde laa nuchee ne guionna biaje riʼ biquiiñebe Stiidxaʼ Dios para bíʼnibe ni (Mateo 4:1-11; Lucas 4:1-13).

Tuu ngue caniʼné Jesús yaʼ. Ñee xiixa cosa malu ni nuu lu xquendabiaanibe ngue caníʼnebe la? Coʼ xa. Biblia na qué ñuu dxi nucheebe neca gudíʼdibe lu ca guendanagana ni ridídinu yanna (Hebreos 4:15). Zacá nga laani, «laabe qué nuchee be ne qué nusiguii be» (1 Pedro 2:22). Qué niniʼné diʼ Jesús xiixa cosa malu ni nuu lu xquendabiaaniʼ purtiʼ laabe qué lica nucheebe ne qué ñuu dxi nusaanabe de ñúnibe ni na Dios, ngue runi ni caníʼnebe que dxandíʼ nabani.

Peru cadi ndiʼ si nga ni rusihuinni dxandíʼ nuu Binidxabaʼ:

• Bietenalaʼdxiʼ guníʼ Binidxabaʼ zudii guiráʼ reinu nuu lu Guidxilayú riʼ Jesús pa guzuxibi xañeebe ne guni adorar laabe (Mateo 4:8, 9). Qué nisaca ni guníʼ Binidxabaʼ pa ñaca cadi dxandíʼ nuu. Ne Jesús qué ñuu dxi niníʼ qué gápabe stale poder.

• Biluxe guniʼné si Binidxabaʼ Jesús, biree «bisaana laabe caadxi» dxi (Lucas 4:13). Ti símbolo stiʼ cosa malu qué zanda guni zacá, sínuque ti binni ni dxandíʼ nabani nga zanda guni zacá.

• Mateo 4:11 na: «Beeda caadxi ángel» para uguucaʼ gana Jesús ne gacanecaʼ laabe. Rihuinni dxíchica dxandíʼ nuu ca ángel ca. Yanna, xiñee qué zanda guni crenu laaca nuu Binidxabaʼ yaʼ.

Guininu de relatu stiʼ ti xpinni Dios láʼ Job. Lu relatu riʼ rieeteʼ ra guniʼné Binidxabaʼ Dios chupa biaje. Guiropaʼ biaje byuíʼcabe diidxaʼ, guníʼ Dios qué rucheené Job laa. Bicabi Binidxabaʼ laabe casi ñaca jma runibiáʼ Job que laabe. Gúdxibe Dios runi Job ni na purtiʼ nuu xi rudiibe laa ne laaca gúdxibe Dios cazíʼ Job nga runi ruzuubaʼ diidxaʼ. Óraque bidii Dios lugar gaxhaʼ Binidxabaʼ Job guiráʼ ni napa: xpueltu, ca xiiñiʼ ne bicaabe laa ti guendahuará malu. * Últimu bihuinni rusiguii Binidxabaʼ ne guluu Dios ndaayaʼ Job purtiʼ biʼniʼ huantar (Job 1:6-12; 2:1-7).

Ñee xiixa cosa malu ni nuu lu xquendabiaaniʼ Jiobá ngue caniʼné la? Coʼ, purtiʼ sicaríʼ ruzeeteʼ Biblia de Dios: «Jneza ni runi luʼ» (Apocalipsis 15:4). Ne ruzeeteruʼ ni: «Tobi lucha Señor Dios ni jma nandxóʼ» (Apocalipsis 4:8). Diidxaʼ nandxóʼ ca lu diidxaʼ griegu raca significar ni nayá, ni qué gapa donda. Nga runi, pa nandxóʼ Jiobá la? qué ziuu dxi guchee ne qué zadxélanu xiixa cosa malu luguiabe.

Yanna, nuu tu na cadi dxandíʼ bibani Job ne riníʼ ique si binni byuíʼ Dios ne Binidxabaʼ diidxaʼ. Dxandíʼ nga la? Laaca coʼ. Lu xcaadxi textu stiʼ Biblia, casi lu Santiago 5:7-11 rieeteʼ dxandíʼ bibani Job. Luni rieeteʼ nácabe ejemplu para ca xpinni Cristu ne riguuni gana laacaʼ cadi gusaanacaʼ Dios ora tiidicaʼ lu guendanagana ne para gusietenaláʼdxini laacaʼ riguu Jiobá ndaayaʼ binni ora guni huantar. Pa ñaca cadi dxandíʼ bibani Job ne cadi dxandíʼ ca guendanagana bitiidiʼ Binidxabaʼ laabe que la? qué ñacané ca versículo ca binni. Ne lu Ezequiel 14:14, 20 rieeteʼ de chonna hombre biʼniʼ ni jneza. Chupa de laacabe nga Daniel ne Noé, ne ca hombre riʼ dxandíʼ bibánicaʼ. Ne stobi ca nga Job, nga runi zanda guiníʼ íquenu dxandíʼ bibánibe. Ne pa bibánibe la? ni bitiidiʼ laabe lu ca guendanagana ca laaca dxandíʼ nabani.

Ne guiráʼ ni ruzeeteʼ Biblia, rudiʼnu cuenta dxandíʼ nuu Binidxabaʼ. Nga runi galán guinabadiidxanu laaca laanu: «Ñee zanda guninabe naa ne binnilidxeʼ la?».

Bixuiʼlú yendá ti banda de binni malu xquídxiluʼ. Xi nizaaca yaʼ. Maʼ qué nibani binni seguru ne chaahuiʼ chaahuiʼ nucaacabe xcaadxi ñuni casi cayúnicabe. Yanna bixuiʼlú Binidxabaʼ ne ca demonio, ca ángel bidxiideche Dios ne yenándacaʼ Binidxabaʼ, ñuucaʼ ládenu. Xi nizaaca yaʼ. Guníʼ ique si guiráʼ ni ridúʼyanu lu noticia cayaca lu Guidxilayú.

• Cadi dxandíʼ zidale guendaridinde neca cayuni binni stipa pur gucueeza cani la?

•  

•  

•  

Biblia cusiene nuu tobi ni cucaa binni gapa stale guendanagana ne cayábini laanu tu laabe: «Ulá me ndaani guidxilayú, laame ne ca xpinni me. Laame nga dxa beenda yooxho ni lá diablu ne binidxabaʼ, ni rusiguii irá binni que. [...] Peru lagapa gá si laatu cani nuu ndaani guidxilayú ne ndaani nisadóʼ, purti ma biete binidxaba ra nuu tu ne cayó dí laa ti nanna ma huaxiéʼ dxi napa» (Apocalipsis 12:9, 12). Stale binni despué de guʼyaʼ guiráʼ cani rusiidiʼ Biblia, rudiicaʼ cuenta Binidxabaʼ nga cayuni mandar guidxilayú ne nabé malu laabe.

Nga runi naquiiñeʼ gápanu laanu de ti binni zacá. Peru, ximodo zanda gúninu ni yaʼ. Sti tema ca zacabi guendarinabadiidxaʼ riʼ.