Nuu xquendanabáninu ra naxoo pur guiráʼ ni cayuni binni. Ñee zudiiruʼ Dios lugar guni mandar binni lu Guidxilayú riʼ la? Coʼ. Casi maʼ bidúʼyanu, maʼ cadi candaa diʼ para gunduuxeʼ Dios ca gobiernu ni maʼ ziné stale siglu de cayuniná binni ne pur laacaʼ nuu stale binni pobre. Dios ni bizáʼ laanu ne ni bizáʼ Guidxilayú riʼ, racalaʼdxiʼ gánnanu mayaca guni ni. Ximodo rábibe ni laanu yaʼ.

Guníʼ ique cheluʼ paxaraa. Zándaca ni guʼnuʼ primé nga guyubuʼ lu ti mapa pa neza cheuʼ. Despué, laga zeluʼ neza que, zudiiluʼ cuenta biaʼsi neza ngue zeluʼ, purtiʼ cayuuyaluʼ guiráʼ ni cá lu mapa stiuʼ. Nga zucaa lii guni sentirluʼ mayaca chindaluʼ ra zeluʼ. Zacaca nga biʼniʼ Dios ora bidii laanu Stiidxaʼ, Biblia, ni zeeda gaca casi ti mapa para laanu. Luni riete caadxi cosa ni chiguizaaca lu Guidxilayú riʼ ora mayaca gueeda fin. Ra zidiʼdiʼ iza, cudiʼnu cuenta biaʼsi cani riete lu Biblia nga cani cazaaca yanna. Ne nga rucaa laanu gudiʼnu cuenta jma maʼ gaxha nuu fin.

Biblia na nabé nagana zabani binni ora mayaca gueeda fin. Lu tiempu ca, zuuyaʼ binni caadxi cosa ni que huayuu dxi guizaaca. Guidúʼyanu caadxi de laacani.

1. ZIUU GUENDANAGANA LU GUIDXILAYÚ Lu Evangeliu stiʼ Mateo capítulo 24, zeeda ti profecía ni caníʼ de ti seña ra zahuinni stale cosa. Profecía riʼ na zusihuinni seña riʼ «mayaca [...] iluxe guidx[i]layú», laani nga ti tiempu ra zazaaca caadxi cosa dede ora guidxiña dxi gueeda fin (versículo 3 ne 14). Caadxi de ca cosa ni zahuinni nga guerra, guendarindaana, zaca xu roʼ stale lugar, guendaquéiquiiñeʼ, huaxiéʼ zannaxhii binni stobi ne ziuu religión ni zaguite binni (versículo 6 dede 26). Dxandíʼ maca raca ca cosa riʼ. Peru Biblia na juntu zahuinni guiráʼ ni ante gueeda fin. Ne zaca cani tiempu gaca cumplir xhonna profecía riʼ.

2. ZUNITI BINNI CA GUENDA SICARÚ STIʼ Biblia na zuniti binni ca guenda sicarú napa «ora mayaca izaa xhi guidxilayú» malu riʼ. Sicaríʼ nani: «Zuyubi binni para laa si, ne nisi bidxichi zacá ique caʼ. Zuni ca laaca nandxóʼ ne zaca ca nayáʼ, ne zaguiñe yu ca stiidxa Dios. Ma qué zuzuuba ca stiidxa jñaa ca ne bixhoze caʼ ne qué zulabi ca laacabe. Zabani ca modo na ique caʼ ne nin zanna ca pa nuu Dios. Qué zanaxhii ca binni ne qué ziá ca irutiʼ, ne nisi zazá ca zaníʼ ca binni. Qué zanda ucueeza ca laca laaca de guni ca ni na ique caʼ. Zuniná cabe binni ne zaca nanalaʼdxi cabe irá ni jneza. Zutoo cabe xhamigu cabe, ne qué zuni lú cabe guni cabe intiisi, ne zudxiiba cabe laca laacabe. Zuyubi cabe ni chuʼlaʼdxi cabe lugar de nuyubi cabe Dios» (2 Timoteo 3:1-4). Dxandíʼ cadi deruʼ yanna nga ridúʼyanu guni binni cani bizéʼtenu riʼ, peru «ora mayaca izaa xhi guidxilayú» riʼ, zaca ni jma nagana cada dxi. Nga runi na Biblia nabé «nagana zaca» ca dxi que. Cadi dxandíʼ maʼ zacá binni yanna la?

3. CANITILÚ GUIDXILAYÚ Biblia caníʼ «zunitilú [Dios] cani binitilú guidxilayú» (Apocalipsis 11:18). Ximodo nga canitilú Guidxilayú tiempu riʼ. Cásica gúcani tiempu stiʼ Noé que. Biblia na: «Gunna Dios ni dxandíʼ maʼ binitilú guidxilayú, ne maʼ bidale guendaquéiquiiñeʼ lu guidubi guidxilayú. Ora biʼyaʼ Dios lu guidxilayú la? biiyaʼ maʼ binitilú ni». Ngue runi, sicaríʼ gudxi Dios Noé zazaaca ca binni malu que: «Chiguniteluáʼ laacabe né guidxilayú» (Génesis 6:11-13). Cadi dxandíʼ nabé maʼ bidale guendaquéiquiiñeʼ lu Guidxilayú riʼ la? Peru cadi ngasi, cayaca sti cosa ni qué huadúʼyanu: cayuni binni stale guiibaʼ nadipaʼ ni zanda gunitilú Guidxilayú riʼ dede né binni. Ne laaca cunitilúcabe Guidxilayú riʼ sti modo: chaahuiʼ chaahuiʼ cayuni biidicabe cani racané  chuʼ guendanabani luni: casi bi ricaanu, nisadóʼ ne guiráʼ modo runi Guidxilayú riʼ dxiiñaʼ ti ganda chuʼ guendanabani luni.

Guníʼ ique ndiʼ: ñanda nunitilú binni Guidxilayú riʼ raca ti gayuaa iza la? Coʼ. Peru yanna maʼ zanda gúnicabe ni. Né guiráʼ guiibaʼ maʼ bizáʼcabe ne biaʼ maʼ biʼniʼ biidicabe Guidxilayú riʼ, rusihuínnicani zanda gunitilúcabe ni. Peru ndiʼ nga ni jma triste: cadi cayene diʼ binni pabiáʼ cayuniná Guidxilayú riʼ né guiráʼ tecnología stiʼ ne laaca qué gánnacabe xi naquiiñeʼ gúnicabe para cadi guninani binni. Galán si nga nánnanu qué zunitilú diʼ binni Guidxilayú riʼ. Dios cayabi laanu zunitilú ca binni malu ca ante gunitilucaʼ Guidxilayú.

4. ZAREECHE DIIDXAʼ LU GUIDUBI GUIDXILAYÚ Stobi de ca cosa ni zahuinni lu seña ruzeeteʼ libru stiʼ Mateo nga zaca ti dxiiñaʼ ni qué huayuu dxi gaca: «Zuiʼ cabe stiidxa [reinu] idubi naca guidxilayú para ganna irá xixé guidxi modo runi mandar, ne dxi que ru nga iluxe guidxilayú» (Mateo 24:14). Gadxepeʼ modo guireeche ca diidxaʼ riʼ pa guchaaganu ni né modo huayuni xcaadxi yuʼduʼ. Ora gaca dxiiñaʼ riʼ zunadiaga binni ca diidxaʼ nacubi ne galán stiʼ Reinu. Xi religión cusiidiʼ ca diidxaʼ nacubi ne galán stiʼ Reinu lu «idubi naca guidxilayú» tiempu riʼ yaʼ.

Sitiu jw.org ni napa ca testigu stiʼ Jiobá lu Internet, gúcani para gacaneni guireeche ca diidxaʼ nacubi ne galán stiʼ Reinu. Lu sitiu riʼ nuu stale publicación ni cusiene de Reinu lu jma de 700 idioma. Ñee nuuruʼ sti grupu ni cayuni stipa para gusiidiʼ binni de Reinu stiʼ Dios la? Ante guihuinni Internet, maca runibiáʼ binni laadu, ca testigu stiʼ Jiobá, purtiʼ rucheechedu stiidxaʼ Reinu. Dede 1939, lu cada númeru stiʼ revista Torre stiʼ ni rapa reeda ca diidxaʼ riʼ: «Ni caníʼ de Reinu stiʼ Jiobá». Sicaríʼ ruzeeteʼ ti libru ni caníʼ de religión de dxiiñaʼ ni rúnidu: «Naroʼbaʼ stipa cayuni [ca Testigu] para ganda chindacaʼ ra nuu guiráʼ binni ne guirútiruʼ qué runi dxiiñaʼ casi laacabe». Tobi de ca cosa ni jma risaca rusíʼdidu binni nga zunitilú Reinu stiʼ Dios guidxilayú malu nuu yanna riʼ.

Ñee huayuuyaluʼ gaca cumplir ca profecía bizéʼtenu lu tema riʼ la? Lu ti gayuaa iza ni maʼ gudiʼdiʼ hasta nagasi, cayacané revista riʼ binni para gudii  cuenta gunáʼ nga seña ni cusihuinni maʼ nabáninu lu ca últimu dxi. Peru cani qué runi cré ni cá lu Biblia la? riniʼcaʼ zanda guchaa binni modo riene ni ne cadi dxandíʼ diʼ cuchaa modo nabani binni yanna. Laaca riníʼcabe qué ñanda diʼ ñánnanu xi guendanagana cadiʼdiʼ binni sti ladu pa qué ñuu televisión o radiu. Neca nuu tu riníʼ ique zacá, nuu binni maʼ cayuuyaʼ stale cosa ni cucaa laa gudii cuenta maʼ nabáninu ti tiempu nabé nagana lu Guidxilayú.

Caadxi de ca cosa riʼ nga ni biʼyaʼ ti grupu de científicu ni runi dxiiñaʼ para ti publicación ni láʼ The Bulletin of the Atomic Scientists lu iza 2014, bizeetecabe ni lu Consejo de Seguridad de las Naciones Unidas. Guidúʼyanu xi guníʼ ca científicu riʼ ora caniʼcaʼ de ca cosa ni zanda guniná binni: «Biduʼyaʼ chaahuisidu guiráʼ tecnología nuu yanna riʼ, bidiʼdu cuenta zedandá dxi iquiiñeʼ guiráʼ ni para gunitilú binni Guidxilayú riʼ». Ndiʼ nga ca razón ni cayacané stale binni —dede né cani rucaa revista riʼ— gudii cuenta maʼ nabáninu lu ca últimu dxi ne maʼ gaxha nuu fin. Peru cadi naquiiñeʼ guidxíbinu, sínuque chuʼnu nayecheʼ. Xiñee yaʼ. Purtiʼ zanda guilanu.