Biniiseʼ ndaaniʼ ti barriu nabé pobre nuu guidxi Montreal. Naa nga baʼduʼ jma nahuiiniʼ lade xhono xiiñiʼ jñaaʼ. Ne jñaasiáʼ nga bisiniisi laadu, purtiʼ guti bixhozeʼ dxi deruʼ napaʼ xhoopaʼ beeu.

Dede nahuiineʼ maʼ rigubaʼ droga, riguiteʼ apuesta ne ridindeniáʼ binni. Lade binni qué iquiiñeʼ nga bibaneʼ. Dxi napaʼ chii iza, mápeca runeʼ mandadu stiʼ ca prostituta ne stiʼ cani ruquixe bueltu nuu barriu que. Riuuladxeʼ gusiguieeʼ binni para cuanaʼ stiʼ. Beeda gácani casi ti droga para naa.

Dxi maʼ napaʼ 14 iza la? guizáʼ maʼ nannaʼ quiteʼ binni para cuanaʼ xpueltu. Chiguzeeteʼ ti ejemplu. Rizieeʼ stale reló, pulsera ne aníu ni ruluíʼ de oro, de raqué maʼ rucaaʼ 14 quilate cueʼ cani ne rutuaaʼ cani lu calle ne ra estacionamientu stiʼ ca centru comercial. ¡Guizáʼ nagueenda raca ganar bueltu zaqué! Ti biaje bineʼ ganar 10,000 dólar de Canadá ti dxi si.

Dxi napaʼ 15 iza, guládxicabe naa ndaaniʼ cárcel ra ruseguyoocabe ca baʼduʼ casi naa, ngue runi guzayaʼ rendaʼ guiráʼ ladu. Guseʼ ndaaniʼ calle, ndaaniʼ parque o ra lidxi ca xhamiguaʼ ni rizayaniáʼ.

Gunaazeʼ puliciá naa chupa chonna biaje para guinabadiidxacaʼ naa paraa ricaaʼ ca cosa ni rutuaaʼ que. Peru qué nuseguyoocabe naa, purtiʼ qué ribanadiáʼ ca cosa que. Stale biaje gudixeʼ multa purtiʼ cadi original cani rutuaaʼ, rusiguieeʼ, ribanaʼ stiʼ binni ne rutuaaʼ sin permisu. Qué ridxibeʼ guirutiʼ; dede yeguneʼ cobrar xpueltu ca binni ni ruquixe bueltu. Cumu riuu xquendanabaneʼ ra naxoo né dxiiñaʼ que la? nuu tiru rizayaniáʼ ti pistola. Ne dede bineʼ dxiiñaʼ stiʼ ca binni nuu lu mafia.

Dxi napaʼ 17 iza nga primé biaje binadiaʼgaʼ de Biblia. Maʼ nabezaniáʼ ti xnovia tiempu que, ne laa bizulú biʼniʼ estudiar Biblia né  ca testigu stiʼ Jiobá. Peru cumu qué ñuuladxeʼ modo na Biblia naquiiñeʼ guibani binni la? bisaanaʼ laabe ne yendezaniáʼ sti baʼdudxaapaʼ ni maca rireeniáʼ.

Peru ngueca si bireeni naa, purtiʼ laaca bizulú biʼniʼ estudiar baʼdudxaapaʼ riʼ Biblia né ca testigu stiʼ Jiobá. Nabé bidxagayaaʼ modo bichaabe: gúcabe jma nachaʼhuiʼ ne maʼ qué nidxiichibe nagueenda. Ti biaje guyaaʼ ti guendaridagulisaa biʼniʼ invitárcabe naa. Biiyaʼ pabiáʼ nachaʼhuiʼ ca binni que ne nabé galán modo bidxaagalucaʼ naa. Qué huayuu dxi guneʼ sentir galán casi bineʼ sentir dxi que. Huaxiéʼ gunnaxhii familia stinneʼ naa dxi nahuiineʼ ne laaca huaxiéʼ bizaalaʼdxiʼ naa. Módopeʼ bidxaagalú ca testigu stiʼ Jiobá naa ne modo guniʼnécabe naa que nga ni caquiiñeʼ. Ora gúdxicabe naa pa zacaaʼ ti cursu de Biblia la? oraqueca gudxeʼ laacabe zacaaʼ ni.

Ni biziideʼ que nga bilá xquendanabaneʼ. Chitidxeʼ laatu xiñee. Maca biaananiáʼ xhupa gubaanaʼ chindánadu, purtiʼ caquiiñeʼ 50,000 dólar para quixeʼ ra gudxiteʼ apuesta. ¡Galán si bineʼ qué ñaaʼ! Purtiʼ dxi que guti tobi de laacabe ne stobi que biseguyoocabe laa.

Cani biziideʼ lu Biblia que bicaacani naa guiníʼ iqueʼ naquiiñeʼ guchaaʼ modo nabaneʼ. Tobi de ca textu ni biindaʼ lu Biblia nga 1 Corintios 6:10, ra na: «Nin ca gubaanaʼ, nin cani rucaa ique puru si gapa bidxichi, nin ca binni güeʼ, nin cani riguu dí, nin cani ruxhii pobre, nin tobi de ca nga qué ziuu ra runi mandar Dios». Dede biinaʼ ora biindaʼ versículo ca. Bidieeʼ cuenta caquiiñeʼ guchaaʼ modo naa (Romanos 12:2). Nacaʼ ti hombre ni ridxiichi nagueenda, caguiteʼ laca naa; ruluíʼ maʼ qué gapaʼ remediu.

Peru laaca biziideʼ pabiáʼ nachaʼhuiʼ Jiobá ne rutiidilaʼdxiʼ donda (Isaías 1:18). Ngue runi bineʼ orar Jiobá de guidubi ladxiduáʼ para gacané naa gusaanaʼ ca viciu stinneʼ ne guchaaʼ xquendanabaneʼ. Chaahuiʼ chaahuiʼ gucanebe naa para gunda bireeʼ ndaaniʼ guiruyú ra nuaaʼ que. Primeca ni bineʼ nga bichaganaʼyaʼ baʼdudxaapaʼ nabezaniáʼ que.

Napaʼ 24 iza tiempu que, ne maʼ napaʼ chonna xiiñeʼ. Ne para gudieeʼ ni iquiiñecabe la? caquiiñeʼ guneʼ dxiiñaʼ jneza. Peru huaxiéʼ guzayaʼ scuela ne qué gannaʼ guneʼ dxiiñaʼ. Gunabaʼ Jiobá gacané naa sti biaje ne yeyubeʼ dxiiñaʼ. Lu ca entrevista que rabeʼ laacabe rapaʼ gana guchaaʼ ne guneʼ dxiiñaʼ jneza. Nuu biaje rabeʼ laacabe cayuneʼ estudiar Biblia, purtiʼ racalaʼdxeʼ gacaʼ ti binni nachaʼhuiʼ. Peru nin tobi qué nudii dxiiñaʼ naa. Despué, dxi byueniáʼ historia stinneʼ sti hombre lu ti entrevista, laa gudxi naa: «Qué gannadiáʼ, peru nuu xiixa ni cayabi naa gudieeʼ dxiiñaʼ lii». Nannaʼ Jiobá ngue bicabi oración stinneʼ. Qué nindaa, naa ne xheelaʼ gúcadu testigu stiʼ Jiobá.

Nabáneruaʼ purtiʼ zinandaʼ ca conseju zeeda lu Biblia ne purtiʼ zinandaʼ ejemplu stiʼ Cristu. Napaʼ ti familia nabé sicarú ne maʼ qué ruchiiñaʼ xquendabiaaneʼ naa, purtiʼ nannaʼ maʼ bitiidilaʼdxiʼ Jiobá donda stinneʼ.

Cada beeu riquiiñeʼ 70 hora para gacaniáʼ binni ganna xi rusiidiʼ Biblia ne maʼ ziniaaʼ catorce iza de cayuneʼ dxiiñaʼ riʼ. Xheelaʼ laaca maʼ cayuni dxiiñaʼ riʼ yanna. Lu treinta iza ni maʼ gudiʼdiʼ hasta nagasi riʼ, maʼ gucaniáʼ 22 binni runeniáʼ dxiiñaʼ gácacaʼ testigu stiʼ Jiobá. Dede yanna riaaʼ ndaaniʼ ca centru comercial, peru cadi para cuanaʼ stiʼ binni casi bineʼ dxiqué. Stale biaje runeʼ ni para gabeʼ binni ti cosa nabé risaca: zedandá dxi guibáninu ndaaniʼ ti guidxilayú ra maʼ qué ziuu nin ti gubaanaʼ (Salmo 37:10, 11).